ՄԵԾԱՄՈՐ METSAMOR CITY Ուրբաթ, 21.07.2017, 22:35
Ողջույն Հյուր | RSS
Կայքի մենյու

Բաժնի անվանակարգերը
Հանրապետություն [426]
Կրթություն և գիտություն [31]
Մարզային [13]
Պաշտոնական [329]
Մշակույթ [13]
Հասարակություն [615]
Սպորտ [1]
Տեսակետ [34]
Տարածաշրջան [65]
Զանազան [124]
Քաղաքականություն [475]
Համայնք [37]

Մինի - չաթ
 
200

Վիճակագրություն

Ընդամենը առցանց: 1
Հյուրեր: 1
Հաճախորդներ 0

Գլխավոր էջ » 2015 » Նոյեմբեր » 19 » Արտադրանքը պետք է համապատասխանի միջազգային չափանիշներին /Քննարկվել են Արմավիրի մարզի սոցիալ—տնտեսական իրավիճակը եւ մարզային գերակայությունը/
15:59
Արտադրանքը պետք է համապատասխանի միջազգային չափանիշներին /Քննարկվել են Արմավիրի մարզի սոցիալ—տնտեսական իրավիճակը եւ մարզային գերակայությունը/

Նախագահ Սերժ Սարգսյանը երեկ Արմավիրի մարզպետի եւ մարզպետարանի պատասխանատուների մասնակցությամբ խորհրդակցություն է անցկացրել Արագածոտնի մարզի 2014թ. եւ 2015թ. հունվար—սեպտեմբեր ժամանակահատվածի սոցիալ—տնտեսական իրավիճակի, առկա հիմնախնդիրների, գերակայությունների եւ զարգացման ծրագրերի քննարկման նպատակով։
«Արմավիրի մարզը մեր հանրապետության գյուղատնտեսության ամենակարեւոր շտեմարաններից մեկն է եւ ունի մի քանի առանձնահատկություն։ Դրանցից մեկն այն է, որ այստեղ գյուղատնտեսական համախառն արտադրանքը երեք անգամ գերազանցում է արդյունաբերական համախառն արտադրանքին, չնայած մարզում է գտնվում մեր արդյունաբերական հսկաներից մեկը՝ հայկական ատոմակայանը։ Եվ մենք, իհարկե, պետք է սրանից եզրակացություն անենք։ Երկրորդ առանձնահատկությունն այն է, որ չնայած մեծածավալ արտադրանքին, չնայած ոռոգելի ու բերրի հողակտորների առկայությանը, մարզում գյուղատնտեսությունը շատ է կախված բնակլիմայական պայմաններից։ Այսինքն՝ վաղ գարնանային ցրտահարություններ, անձրեւների պակաս, կարկուտ եւ այլն։ Սա մեզ պետք է հուշի, որ մարզում գյուղատնտեսության զարգացման վրա ուշադրությունը ավելացնելով՝ մենք պետք է գնանք պաշտպանված եւ ինտենսիվ գյուղատնտեսության ճանապարհով։ Այսինքն՝ պետք է խրախուսենք գյուղացիական տնտեսություններին, խոշոր ֆերմերներին, որպեսզի նրանք սկսեն օգտագործել ցանցեր, ինչպես ամբողջ աշխարհում է, որը բերքի պաշտպանության ամենահուսալի միջոցն է։ Պետք է ընտրենք կաթիլային ոռոգման ճանապարհը, որովհետեւ անկախ նրանից, որ վերջին տարիների ընթացքում մենք շատ միջոցներ ենք ուղղել ոռոգման համակարգի կատարելագործմանը, նոր աղբյուրների հայտնաբերմանը, այդուհանդերձ, եթե ամբողջովին օգտագործենք մեր գյուղատնտեսական նշանակության հողերը, մենք մշտապես ունենալու ենք ջրի պակաս։ Ընդհանրապես, ափսոս է այդքան ջուրը անարդյունավետ օգտագործելն ու վատնելը։ Եվ այստեղ, անշուշտ, մենք պետք է մեր ջանքերը համադրենք։ Պետք է տեսնենք, թե ի՞նչ խթանող միջոցներ կարող ենք ձեռնարկել, որպեսզի մարդիկ մեծ ցանկություն եւ շահագրգռվածություն ունենան այս ճանապարհով գնալու։
Իհարկե, հեշտ է ասել, որ բոլոր այգիները պետք է ցանցապատել, պետք է դնել կաթիլային ոռոգման տակ, բայց անհրաժեշտ է գիտակցել նաեւ, որ դրանք մեծ ծախսեր են եւ առավել եւս՝ անհատ գյուղացիների համար այդ աշխատանքը մեծ դժվարություն կներկայացնի։ Մենք մի քանի տարի առաջ, նաեւ ձեր առաջարկով, սկսեցինք սուբսիդավորել վարկեր, սկսեցինք ավելի մեծ չափով գյուղացիներին տրամադրել վարկեր, անհրաժեշտության պարագայում՝ այդ վարկերը վերաձեւակերպել՝ կապված դժվարությունների հետ, եւ հիմա ես չեմ ասում, որ բոլորը հնարավորություն ունեն օգտվելու մատչելի վարկային ռեսուրսներից, բայց այսօրվա իրավիճակը, իհարկե, չի կարելի համեմատել հինգ տարի կամ տասը տարի առաջվա հետ։
Հաջորդ հանգամանքը, որ ուզում եմ առանձնացնել մարզի համար, Արմավիրում առկա մեր հոգեւոր—մշակութային կենտրոնն է՝ Էջմիածինը։ Մենք պետք է սա հաշվի առնենք ոչ միայն դաստիարակության, ոչ միայն Մայր Աթոռի հնարավորությունների օգտագործման տեսակետից, այլ նաեւ զբոսաշրջության։
Նախորդ խորհրդակցությունների ժամանակ ես շեշտադրում եմ կատարել նաեւ ենթակառուցվածքների զարգացման վրա։ Այդ հնարավորությունները կան։ Գիտեմ, որ մարզպետարանն այդ ուղղությամբ աշխատում է, ուղղակի ջանքերը պետք է կրկնապատկել՝ այս հարցերին արագ լուծում տալ։
Ուրախ եմ, իհարկե, որ այս տարի բերքը համեմատաբար առատ է, բայց, ցավոք, որոշակի բարդություններ եղան, եւ այդ բարդություններին ձեր ջանքերով, գյուղատնտեսության նախարարության, կառավարության ջանքերով, մենք լուծումներ տվեցինք։ Այնուհանդերձ, պետք է մտածենք, թե ինչպե՞ս ենք այս խնդիրները լուծելու հաջորդ տարի։ Գիտեք, որ այդ բարդությունների հիմնական մասը պայմանավորված էր մեր արտադրանքի սպառման շուկաներում եղած բարդությունների հետ։ Եվ այստեղ էլ, կարծում եմ, պետք է փնտրել ժամանակակից եւ արդյունավետ լուծումներ։
Խոսելով գյուղատնտեսության մասին՝ ես չեմ համարում, որ մեր ուշադրությունը միայն այս ուղղությամբ պետք է բեւեռենք, որովհետեւ նախ՝ քաղաքային բնակչության համար աշխատատեղ ստեղծելը շատ կարեւոր է, մյուս կողմից էլ Արմավիրում գյուղական բնակավայրերը բավականաչափ խոշոր են, եւ այստեղ էլ մենք պետք է մտածենք, թե հավելյալ ի՞նչ աշխատանքով պետք է մարդիկ զբաղվեն։ Ուստի մեր ուշադրությունը պետք է ուղղվի առաջին հերթին վերամշակող արդյունաբերությանը, եւ քանի որ այս ուղղությամբ կառավարությունն ունի ծրագիր, օգտվելով այդ ծրագրի ընձեռած առավելություններից՝ պետք է խրախուսել մարդկանց այս ուղղությունը զարգացնելու համար։ Բայց նաեւ հասկանալի է չէ՞ մթերողի կամ սպառողի ցանկությունը՝ ունենալու որակյալ ապրանք։ Այստեղ էլ մենք պետք է գնանք մի ճանապարհով, որն ընդունված է ամբողջ աշխարհում, նկատի ունեմ առաջնակարգ գյուղատնտեսություն ունեցող աշխարհում, եւ այն կամաց—կամաց տարածվում է Հայաստանում։ Մենք պետք է այս առումով համապատասխանենք միջազգային չափանիշներին։ Մեր արտադրած ապրանքը պետք է լինի միանման եւ մրցունակ։ Այսինքն՝ նոր, ավելի արդյունավետ այգիներ հիմնելու մեծ անհրաժեշտություն կա։
Անշուշտ, որպեսզի ե՛ւ գյուղատնտեսության, ե՛ւ արդյունաբերության, առաջին հերթին՝ վերամշակող արդյունաբերության խնդիրները մենք կարողանանք հաջողությամբ լուծել, մեզ անհրաժեշտ են լավ եւ որակյալ կրթական ու առողջապահական ծառայություններ մատուցող համակարգեր։ Առավել եւս, որ, փառք Աստծո, Արմավիրում աշակերտների թվաքանակը պարբերաբար ավելանում է, սա, իհարկե, մի կողմից ուրախալի է, բայց մյուս կողմից՝ պարտավորեցնող է։ Մենք տարբեր ծրագրեր ենք իրականացում, եւ դրանց նպատակն է՝ ստեղծել նոր համակարգ եւ լավ պայմաններ»,–խորհրդակցության սկզբում ասել է նախագահ Սերժ Սարգսյանը։
Մարզպետ Աշոտ Ղահրամանյանը ըստ ոլորտների հանգամանորեն ներկայացրել է Արմավիրի մարզում իրականացված եւ դեռեւս ընթացքում գտնվող աշխատանքները, հիմնախնդիրներն ու գերակայությունները։
Խորհրդակցությանը մասնակցող Հայաստանի տարածքային զարգացման հիմնադրամի (ՀՏԶՀ) գործադիր տնօրեն Աշոտ Կիրակոսյանը զեկուցել է հիմնադրամի առաջին բաղադրիչով մարզի համայնքներում նախատեսվող ներդրումների վերաբերյալ։
Խորհրդակցության ավարտին նախագահ Սերժ Սարգսյանը մի շարք հանձնարարականներ է տվել։ Մասնավորապես, գյուղատնտեսական մթերք արտադրող գյուղացիական տնտեսություններին եւ վերամշակող ձեռնարկություններին շարունակական աջակցության նպատակով ՀՀ էկոնոմիկայի եւ գյուղատնտեսության նախարարներին հանձնարարվել է՝ գյուղատնտեսական մթերք, մասնավորապես, պտուղ—բանջարեղեն եւ խաղող վերամշակող եւ արտահանող ընկերությունների ղեկավարների հետ քննարկել տեղական արտադրանքի արտահանումը խթանելու հնարավորությունները՝ համապատասխան գործուն մեխանիզմների վերաբերյալ առաջարկություններ ներկայացնելով ՀՀ կառավարության քննարկմանը։ ՀՀ գյուղատնտեսության նախարարին հանձնարարվել է՝ մարզպետի հետ համատեղ քննարկել մարզում պտղի եւ հատապտղի տնկարկների ավելացման եւ մշակության ինտենսիվացման, մասնավորապես՝ նոր ինտենսիվ այգիների հիմնման միջոցով ներդրումային ծրագրերի առաջմղման համար համապատասխան միջոցառումների իրականացման ուղիները՝ միաժամանակ, առաջարկություններ մշակելով գյուղացիական տնտեսություններին թիրախային խորհրդատվական ծառայությունների մատուցման, ինչպես նաեւ մթերման եւ թարմ պտուղ—բանջարեղենի արտահանման աշխատանքների պլանավորման կարողությունները շարունակաբար բարելավելու ուղղությամբ։
ՀՀ Արմավիրի մարզպետին հանձնարարվել է՝ ՀՀ գյուղատնտեսության նախարարության ջրային տնտեսության պետական կոմիտեի նախագահի հետ համատեղ քննարկել մարզի ոռոգման համակարգերի շարունակական զարգացման առաջնահերթությունները՝ առաջիկայում նախատեսվող ծրագրերում ներառելու նպատակով համապատասխան առաջարկությունները ներկայացնելով ՀՀ կառավարության հաստատմանը։
Արմավիրի մարզի անասնաբուծական մթերքի վերամշակման շղթայի կատարելագործման եւ սննդամթերքի անվտանգության ապահովման նպատակով ՀՀ գյուղատնտեսության նախարարին հանձնարարվել է՝ քննարկել ՀՀ գյուղատնտեսության նախարարության կողմից իրականացվող առաջիկա ծրագրերի շրջանակներում Արմավիրի մարզում ժամանակակից սպանդանոցների կառուցմանը համակողմանի աջակցության տրամադրման հնարավորությունը՝ համապատասխան առաջարկությունները ներկայացնելով ՀՀ կառավարության հաստատմանը։
Բնական աղետներից գյուղատնտեսական մշակաբույսերի ցանքատարածությունների պաշտպանության մեխանիզմների շարունակական բարելավման նպատակով ՀՀ տարածքային կառավարման եւ արտակարգ իրավիճակների նախարարին հանձնարարվել է՝ միջոցներ ձեռնարկել ՀՀ Արմավիրի մարզում հակակարկտային համակարգերի ազդեցության գոտու ընդլայնման եւ կառավարման արդյունավետության բարձրացման ուղղությամբ՝ համապատասխան ֆինանսական աղբյուրների վերաբերյալ գնահատականները ներկայացնելով ՀՀ կառավարության քննարկմանը։
Մարզի համայնքների գազաֆիկացման ցանցի ընդլայնման նպատակով ՀՀ էներգետիկայի եւ բնական պաշարների նախարարին հանձնարարվել է Արմավիրի մարզպետի հետ համատեղ ուսումնասիրել մարզի գազաֆիկացման պահանջարկ ունեցող համայնքներում անհրաժեշտ ներդրումների ծավալները՝ պոտենցիալ բաժանորդների հստակ թվաքանակներից ելնելով համապատասխան տեխնիկա—տնտեսական արդյունավետության հաշվարկները ներկայացնելով ՀՀ կառավարություն եւ «Գազպրոմ—Արմենիա» ՓԲԸ՝ ներդրումային առաջնահերթություններում հաշվի առնելու նկատառումով։
Արմավիրի առողջապահական համակարգի շարունակական արդիականացման նպատակով ՀՀ առողջապահության նախարարին հանձնարարվել է ուսումնասիրել ՀՀ Արմավիրի մարզի առողջապահական համակարգի արդիականացման միջանկյալ արդյունքները՝ մարզային առողջապահական համակարգի հետագա բարելավման, ինչպես նաեւ Վաղարշապատ քաղաքի հիվանդանոցի եւ ծննդատան արդիականացման վերաբերյալ հստակ առաջարկություններ ներկայացնելով ՀՀ կառավարության հաստատմանը։
Մարզի կրթական, մշակութային, մարզական օբյեկտների հիմնանորոգում եւ շինարարություն, առանձին խոցելի համայնքների ենթակառուցվածքների զարգացման նպատակով՝ ՀՏԶՀ տնօրեն Ա. Կիրակոսյանին հանձնարարվել է՝ ձեռնարկել զեկույցի ընթացքում ներկայացված հրատապ ծրագրերի ցանկով նախատեսված ծրագրերի նախագծանախահաշվային փաստաթղթերի մշակման եւ շինարարական աշխատանքների մրցութային գնման համապատասխան գործընթաց։
Կատեգորիա: Պաշտոնական | Դիտումներ: 92 | Ավելացրեց: Martos | - Վարկանիշ -: 0.0/0
Մեկնաբանություններն ընդամենը՝: 0
avatar
Մուտքի ձև

Որոնել

Զամբյուղ
Ձեր զամբյուղը դատարկ է

Օրացույց
«  Նոյեմբեր 2015  »
ԵրկԵրկՉրկՀնգՈւրՇբԿր
      1
2345678
9101112131415
16171819202122
23242526272829
30

Սոց ցանցեր

Ժամանակահատված

Copyright Metsamorcity.do.am © 2017