Քարոզարշավի շրջանակում ՀՀԿ առաջնորդ Սերժ Սարգսյանը երեկ Արարատի մարզի Այնթապ համայնքում հանդիպեց ընտրողների հետ։ Նա նշեց, որ ՀՀԿ նպատակն է ուժեղ, կայուն եւ բարեկեցիկ գյուղի ստեղծումը։
«Մի շարք օբյեկտիվ պատճառներով ՀՀԿ—ն հնարավորություն չունեցավ ամբողջապես իրականացնել իր առջեւ դրված ծրագրերը։ Ինչպես հայտնի է, միջազգային ֆինանասատնտեսական ճգնաժամի հետեւանքով տուժեց նաեւ Հայաստանը։ Գործադրելով լրջագույն ջանքեր՝ մենք կարողացանք դիմակայել դրան՝ միաժամանակ չկրճատելով ոչ մի սոցիալական ծրագիր։ Ընդհակառակը, որոշ դեպքերում մենք կարողացանք ավելացնել սոցիալական հարցերի կարգավորման համար նախատեսված միջոցները»,–ասաց ՀՀԿ ղեկավարը։
Մասիս քաղաքի կենտրոնական հրապարակում Սերժ Սարգսյանը հորդորեց նրանց՝ հավատով լցվել սեփական ուժերի, սեփական քվեի ու ապագայի նկատմամբ։
Հայանիստում երկրի ղեկավարը հանդիպեց «Գարդման հայրենակցական միության» անդամների եւ համայնքի բնակիչների հետ։ Այստեղ կուսակցության ղեկավարը նշեց, որ գյուղացին պետք է հավատա հողին, քանզի հողը կարող է կերակրել բոլորին։ Դրա համար անհրաժեշտ է բոլոր միջոցները ձեռնարկել գյուղատնտեսությունը զարգացնելու համար։
ՀՀԿ ղեկավարն այցելեց նաեւ մարզի Ավշար համայնք, որից հետո Արարատ քաղաքի կենտրոնական հրապարակում  հանդիպեց տեղի բնակիչների հետ։
«Շնորհիվ Արարատի քաջ զավակների, մենք ապացուցեցինք, որ Արցախը մերն է ու մերն է մնալու. մեծ պատիվ է լինել սպարապետ Վազգեն Սարգսյանի հայրենիքում»,– ասաց Սերժ Սարգսյանը։
Այնուհետեւ Սերժ Սարգսյանը Վեդիի ամֆիթատրոնի դիմաց կայացած բացօթյա հանրահավաքում հանդիպեց քաղաքի բնակիչների հետ։ ՀՀԿ առաջնորդը կոչ արեց Վեդիի բնակիչներին՝ քվեարկել թիվ 18 ընտրատարածքի մեծամասնականով «Դաշնակցության» կողմից առաջադրված, անկուսակցական Արայիկ Գրիգորյանի օգտին։
Այցելության վերջին կետը մարզկենտրոն Արտաշատն էր. քաղաքային հրապարակում երկրի նախագահին դիմավորեցին արտաշատցիները եւ հարակից համայնքների բնակիչները։
«Հնագույն ժամանակներից այս քաղաքն առանձնացել է իր աշխատասիրությամբ։ Այժմ էլ դուք շարունակում եք այդ ավանդույթը։ Մի շարք ցուցանիշներով այս մարզն ու այս քաղաքն առաջատարներից են։ Սա ամենագազաֆիկացված մարզն է, սակայն մենք այդքանով չենք սահմանափակվելու, ու մարզը հետագայում դառնալու է ավելի բարեկեցիկ»,–նշեց Սերժ Սարգսյանը։
Արտաշատում ՀՀԿ ղեկավարը հանդիպեց եւ զրուցեց հրապարակում հավաքված քաղաքացիների հետ։ hhpress.am

Ա.  Գ.