Թեև
անկախության տոնի առթիվ Ադրբեջանի և Հայաստանի բանակների շքերթները շատ
էին տարբերվում իրարից, հատկապես նրանով, որ Ադրբեջանի բանակը փայլում էր
հագուստով և տեխնիկայով, դա ընդամենը շոու էր և մարտունակության առումով
դեռ ոչինչ չի նշանակում, այս մասին այսօր մամուլի ասուլիսում ասաց Արկադի
Տեր-Թադևոսյանը:
«Բոլորը գիտեն մեր բանակի առավելությունների մասին: Նախ այստեղ կարևոր է
մարդու գործոնը, այսինքն այսօր մեր բանակն ունի հաղթողի տրամաբանություն:
Նրանք գիտեն, որ մենք հակառակորդին մի անգամ արդեն հաղթել ենք և երկրորդ
անգամ էլ կկարողանանք հաղթել»,- ասաց Տեր-Թադևոսյանը, ով հայտնի է նաև
Կոմանդոս մականունով:
«Մեր զինվորը գիտի թե ինչպես է պետք գործածել զինվորական տեխնիկան: Այս
ամբողջը կապված է իրար հետ և բարձրացնում է մեր բանակի մարտունակությունը»-
ավելացրեց Կոմանդոսը:
Նրա խոսքով` հայոց բանակի մարտունակության մասին գիտեն նաև միջազգային
կազմակերպությունները, որոնց հետ համագործակցության ժամանակ մեր զինվորները
գրանցել են բարձր ցուցանիշներ:
Անդրադառնալով բանակում շարունակվող սպանություններին՝ նա նշեց, որ
պետությունը պարտավոր է քայլեր ձեռնարկել, բարեփոխումներ իրականացնել և
շտկել իրավիճակը:
«Ցավոք ձեռբերումները ծածկվում են բացասական երևույթներվ»,- ասաց նա`
ավելացնելով, որ հաճախ են կարծիքներ հչնում, թե նման դեպքեր տեղի են
ունենում աշխարհի շատ երկրների բանակներում:
«Բայց դա արդարացում չէ: Բանակում պետք է փոխվի կարգը: Մենք մեր
երեխաներին պետք է (բանակ) ճանապարհենք երաժշտությամբ: Բանակի կեսը
երեխաներ են, որոնք այնտեղ պետք է հավաքեն առողջություն և խելք»,- ասաց
Կոմանդոսը` կարևորելով հատկապես այն, որ բանակը պետք է բաց լինի
քաղաքացիական հասարակության համար:
