Կառավարության երեկվա որոշմամբ Գագիկ Միրիջանյանը նշանակվեց Արմավիրի, իսկ Կարեն Համբարձումյանը՝ Սյունիքի մարզպետ։ Կառավարության երեկվա նիստից հետո երկու մարզպետներն էլ հակիրճ խոսեցին իրականացվելիք աշխատանքների մասին։
Ահա Գ. Միրիջանյանի անելիքը իր իսկ խոսքերով. «Ես մասնագիտությամբ հանրային առողջության կազմակերպիչ եմ, այսինքն՝ իմ մասնագիտությունը զուտ բուժական գործը չէ, այլ հանրության հետ կատարվելիք աշխատանքները։ Կարծում եմ, որ իմ անցած ուղին եւ աշխատանքային փորձը կօգնեն ինձ հետագայում այդ աշխատանքները կատարելու համար։ Իմ մասնագիտության մեջ առաջնայինը եղել է կանխարգելումը, ոչ թե բուժումը։ Մենք մարզում էլ իրականացնելու ենք առաջին կանխարգելիչ աշխատանքները»։
Նորանշանակ մարզպետը հավելեց, թե հստակ հանձնարարականներ ունի վարչապետից, բայց այդ մասին դեռ չի բարձրաձայնի՝ ժամանակին անպայման խոսելու պատրաստակամությամբ։ Իսկ աշխատանքի ընթացքում մարզի խնդիրները բաժանելու է ըստ սոցիալական, կրթական եւ մշակութային ոլորտների։
Ի՞նչ է կարծում մարզպետը, ինչու՞ հենց իրեն առաջադրեցին այդ պաշտոնում։ «Ինձ ԲՀԿ—ն է առաջադրել, շնորհակալ եմ եւ պատրաստ եմ պարզերես անել բոլորին՝ կառավարության ղեկավարությանը»,—անկեղծացավ Արմավիրի մարզպետը։
Սյունիքի նոր մարզպետ Կարեն Համբարձումյանից էլ լրագրողները հետաքրքրվեցին՝ մարզում վախի մթնոլորտ կա՞, ի՞նչ քայլեր է ձեռնարկելու։ «Ոչ ոք չի կարող ինձ վրա ազդեցություն ունենալ,–միանգամից ասաց մարզպետը,–իսկ եթե Սյունիքում ծեծկռտուքներ լինեն, ապա մասնակիցները կպատժվեն օրենքով. ես միանշանակ կլինեմ օրենքի կողքին կանգնած»։
Կադրային ջարդ կանի՞ մարզպետը։ Փոփոխություններ, իհարկե, կլինեն՝ ըստ մարզպետի, բայց ինքն, իհարկե, չի ընդունում «կադրային ջարդ» հասկացությունը։
Վերջում մարզպետը սյունեցիներին կոչ արեց. «Եթե իրականում կա վախի մթնոլորտ՝ ես հավաստիացնում եւ խնդրում եմ՝ չվախենալ ոչնչից։ Որովհետեւ ես պատասխանատու եմ նրանց համար՝ բոլոր սյունեցիների համար»։
Եվ հավելեց, թե ամեն պահի հասանելի է յուրաքանչյուր սյունեցու համար։

Արմենուհի ՄԵԼՔՈՆՅԱՆ