Երեքշաբթի երեկոյան
Սինգապուր ժամանած Հայաստանի նախագահ Սերժ Սարգսյանը այսօր հանդիպումներ է
ունեցել այդ երկրի բարձրագույն ղեկավարության՝ նախագահ Թոնի Տան Քեն Յամի,
վարչապետ Լի Սյան Լունի հետ։ Սերժ Սարգսյանը նաեւ մասնակցել է Սինգապուրի
բիզնես ֆեդերացիայի անունից ի պատիվ Հայաստանի նախագահի տրված ճաշին, որին
ներկա են եղել Սինգապուրի խոշոր գործարարներն ու ամենաազդեցիկ
կորպորացիաների ղեկավարները:
Սինգապուրի եւ Հայաստանի նախագահները քննարկել են երկու երկրների միջեւ
տարբեր ոլորտներում համագործակցությունը զարգացնելու, հայ - սինգապուրյան
քաղաքական երկխոսությունն ակտիվացնելու ուղղությամբ հնարավոր քայլերը:
Սինգապուրի նախագահի խոսքով, չնայած երկու երկրները դիվանագիտական
հարաբերություններ հաստատեցին 20 տարի առաջ, հայ - սինգապուրյան կապերը
գոյություն ունեն 150 տարուց ավելի. հայերն են sինգապուրում տպագրել առաջին
թերթը, հիմնել առաջին քրիստոնեական եկեղեցին:
Սերժ Սարգսյանի դիտարկմամբ` Սինգապուրն արագ զարգացած հաջողված պետության
լավ օրինակ է բազմաթիվ երկրների, այդ թվում՝ Հայաստանի համար:
Հայաստանի նախագահի մամլո գրասենյակի փոխանցմամբ` զրուցակիցները երկուստեք
ցանկություն են հայտնել, որ դիվանագիտական հարաբերությունների հաստատման
հոբելյանական այս տարին նշանավորվի նաեւ որպես Հայաստանի եւ Սինգապուրի
միջեւ համագործակցության ընդլայնման ու ամրապնդման տարի: Նախագահները խոսել
են կրթության, գիտության, քաղաքացիական ծառայության ոլորտներում
համագործակցության, սինգապուրյան փորձը Հայաստանում ներդնելու մասին եւս:
Սինգապուրի վարչապետի հետ Հայաստանի նախագահի հանդիպմանը անդրադարձ է եղել
հատկապես երկու երկրների միջեւ տնտեսական կապերի ամրապնդմանը:
Այս հանդիպմանը եւս երկուստեք ընդգծվել է Սինգապուրի պատմության ընթացքում
հայ համայնքի ունեցած նշանակալի դերակատարումը: Հատկապես հիշելով հայ
գործարարների բարի համբավը եւ Սինգապուրում 19-րդ դարի վերջին առեւտրային
հարաբերությունները զարգացնելու գործում նրանց ունեցած յուրահատուկ
առաքելությունը՝ Լի Սյան Լունը ցանկություն է հայտնել վերականգնված տեսնել
հայ - սինգապուրյան տնտեսական սերտ կապերը:
Սինգապուրի «Իստանա» նստավայրում պաշտոնական բանակցությունները եզրափակվել
են փաստաթղթերի ստորագրմամբ: Մասնավորապես, Հայաստանի եւ Սինգապուրի
կառավարությունների միջեւ ստորագրվել են Փոխըմբռնման հուշագիր մշակույթի
ոլորտում համագործակցության մասին եւ Համաձայնագիր դիվանագիտական եւ
ծառայողական անձնագրեր ունեցող անձանց համար մուտքի արտոնագրի պահանջի
փոխադարձաբար վերացման մասին:
Սերժ Սարգսյանը այսօր այցելել է նաեւ Սինգապուրի բուսաբանական այգի, որտեղ
տեղի է ունեցել այդ երկրի ազգային խորհրդանիշը համարվող ծաղկի՝
«Սինգապուրյան խոլորձի» անվանակոչության արարողությունը: Այսպիսի
միջոցառումներ Սինգապուրում տեղի են ունենում ի պատիվ երկրի բարձրաստիճան
հյուրերի եւ անվանի գործիչների: Այս արարողակարգին Հայաստանի նախագահի
մասնակցությունը մեկ այլ խորհուրդ եւս ուներ. «Վանդա Միսս Ջոակիմ» անունը
կրող խոլորձի տեսակը, որը հայտնի է նաեւ որպես «Սինգապուրյան խոլորձ» կամ
«Ալոհա արքայադստեր խոլորձ», իր անվանումն ստացել է ի պատիվ Սինգապուրում
բնակվող հայազգի ծաղկաբույծ Ագնես Ջոակիմի (Աշխեն Հովակիմյան), ով
հայտնաբերել է այս ծաղկատեսակը:
Հայաստանի նախագահը պատվո հյուրերի գրքում իր գրառման մեջ այս
կապակցությամբ, մասնավորապես, նշել է. - «Հպարտ եմ, որ Սինգապուրի ազգային
ծաղիկը կրում է հայազգի ծաղկաբույծ Ագնես Ջոակիմի անունը: Թող որ այս չքնաղ
ծաղիկը նաեւ հայ - սինգապուրյան բարեկամության հարատեւության խորհրդանիշը
լինի»:
Սինգապուրի ամենաազդեցիկ կորպորացիաների եւ երկրի խոշոր բիզնես
ներկայացուցիչների հետ հանդիպման ժամանակ Սերժ Սարգսյանը քննարկել է
Հայաստանում ներդրումներ անելու հեռանկարները: Սինգապուրի գործարար
շրջանակների ներկայացուցիչները հետաքրքրվել են հատկապես տեղեկատվական
տեխնոլոգիաների, հեռահաղորդակցության, առողջապահության, քաղաքաշինության եւ
քաղաքաշինական ծրագրավորման, ՀԷԿ-երի շինարարության, աղբահանության եւ
ջրային ռեսուրսների կառավարման ոլորտներում Հայաստանի հետ
համագործակցության հնարավորություններով: Հանդիպմանը պայմանավորվածություն է
ձեռք բերվել, որ առաջիկայում Սինգապուր կայցելեն նաեւ հայ գործարարները`
բանակցություններն ու մտադրություններն ավելի որոշակի ծրագրերի վերածելու
նպատակով:
Հայաստանի նախագահի պետական այցի առաջին օրվա ավարտին նախատեսված է նաեւ
ՍերժՍարգսյանի պատվին Սինգապուրի նախագահ Թոնի Տան Քեն Յամի անունից
պետական ընթրիք:
