«Առաջիկա խորհրդարանական ընտրությունները 2013—ի նախագահի ընտրության նախերգանքն են։ Հայաստանում խորհրդարանական ընտրությունների նախաշեմին քաղաքական ուժերի միջեւ պայքարն ավելի է խորանում՝ չնայած քարոզարշավը պաշտոնապես մեկնարկելու է ապրիլին»։ Կովկասի ինստիտուտի տնօրեն, քաղաքագետ Ալեքսանդր Իսկանդարյանի համար իրական են թվում գործող իշխանությունների այն խոստումները, որ ընտրությունները կլինեն ազատ ու արդար. «Սակայն որքան էլ որ դրանք հավատ են ներշնչում, կհամոզվենք միայն ընտրություններից հետո»։
Հրավիրված ասուլիսում քաղաքագետը կարծիք հայտնեց, որ, ամենայն հավանականությամբ, որոշ քաղաքական ուժեր հանդես կգան պնդումներով, որ ընտրությունները, այդուհանդերձ, կեղծվել են. «Եթե ընտրությունները կայանային այս կիրակի, ապա խորհրդարան, ամենայն հավանականությամբ, կանցնեին 6 քաղաքական ուժեր՝ ՀՀԿ—ն, ԲՀԿ—ն, ՀԱԿ—ը, ՀՅԴ—ն, «Ժառանգություն—Ազատ դեմոկրատներ» դաշինքը եւ ՕԵԿ—ը»։
Քաղաքագետը նշեց, որ ՀՀԿ—ն, ԲՀԿ—ն, ՀԱԿ—ը եւ ՀՅԴ—ն բոլոր պայմաններում կանցնեն խորհրդարան։ Իսկ «Օրինաց երկիր» կուսակցությունը դրա համար դեռ շատ աշխատանք պետք է ծավալի։ Ինչ վերաբերում է «Ժառանգություն–«Ազատ դեմոկրատներ» դաշինքին, ապա քաղաքագետի կարծիքով, առանձին—առանձին այս ուժերը խորհրդարան անցնելու հնարավորություն չեն ունենա. «Նրանք ցանկանում են միանալ, որպեսզի ներկայացված լինեն խորհրդարանում, քանի որ ինքնուրույն դա անել չեն կարող։ Ես վստահ եմ, որ եթե նրանք առանձին—առանձին գնային, ավելի քիչ հնարավորություններ կունենային»։ hhpress.am