Նախագահ Սերժ Սարգսյանը երեկ ընդունել է իսրայելցի պատմաբան, ցեղասպանագետ Յաիր Աուրոնին։ Նրան ուղեկցել է գրող, հրապարակախոս Զորի Բալայանը։ Նախագահը ողջունել է հյուրին, ընդգծելով, որ ուրախ է Երեւանում կրկին հանդիպելու հայ ժողովրդի լավագույն բարեկամներից մեկին։ Սերժ Սարգսյանը կարեւորել է հատկապես 2015 թվականին՝ Հայոց ցեղասպանության 100—րդ տարելիցի տարում, մեր ժողովրդի բարեկամների այցելությունները Հայաստան, նաեւ մասնակցությունը ցեղասպանության անմեղ զոհերի հիշատակի ոգեկոչման արարողություններին։
Հանրապետության նախագահը եւս մեկ անգամ շնորհակալություն է հայտնել իսրայելցի նշանավոր մտավորականին՝ Հայոց ցեղասպանության միջազգային ճանաչման եւ դատապարտման գործում իր անգնահատելի վաստակի, մեր ժողովրդի խնդիրներով մշտապես հետաքրքրվելու եւ օգտակար լինելու պատրաստակամության համար։ Սերժ Սարգսյանը ողջունել է այս այցի շրջանակներում Յաիր Աուրոնի այցելությունը նաեւ Լեռնային Ղարաբաղի Հանրապետություն։
Յաիր Աուրոնը շնորհակալություն է հայտնել ջերմ խոսքերի համար եւ նշել, որ մեծապես տպավորված է Լեռնային Ղարաբաղով ու նրա խաղաղասեր եւ արժանապատիվ բնակիչներով։ Նա ընդգծել է, թե Իսրայելում շատերը տեղյակ չեն Ղարաբաղի մասին եւ երբ իմանան ճշմարտությունը, ինչի ուղղությամբ ինքն արդեն սկսել է աշխատել, ապա, վստահաբար, կկանգնեն հայ ժողովրդի կողքին։ Իսրայելցի պատմաբանը շեշտել է, որ համոզված է՝ երբ բարոյական պայքար ես մղում, պետք է հետեւողական լինես այդ ճանապարհին։ Նա վստահեցրել է, որ իր բազմաթիվ ընկերների հետ միասին շարունակելու է այդ պայքարը։
ՀՀ նախագահի մամլո գրասենյակ
|