ՄԵԾԱՄՈՐ METSAMOR CITY երկուշաբթի, 24.07.2017, 02:47
Ողջույն Հյուր | RSS
Կայքի մենյու

Բաժնի անվանակարգերը
Հանրապետություն [426]
Կրթություն և գիտություն [31]
Մարզային [13]
Պաշտոնական [329]
Մշակույթ [13]
Հասարակություն [615]
Սպորտ [1]
Տեսակետ [34]
Տարածաշրջան [65]
Զանազան [124]
Քաղաքականություն [475]
Համայնք [37]

Մինի - չաթ
 
200

Վիճակագրություն

Ընդամենը առցանց: 1
Հյուրեր: 1
Հաճախորդներ 0

Գլխավոր էջ » 2017 » Մարտ » 1 » Ապացուցվեց «ե՛ւ, ե՛ւ»—ի քաղաքականության կենսունակությունը
13:13
Ապացուցվեց «ե՛ւ, ե՛ւ»—ի քաղաքականության կենսունակությունը

Բրյուսելում գտնվող նախագահ Սերժ Սարգսյանը հանդիպում եւ ելույթ է ունեցել «Կարնեգի» կենտրոնում

Նախագահ Սերժ Սարգսյանը Բելգիայի Թագավորություն աշխատանքային այցի երկրորդ օրը սկսել է «Հանուն համաշխարհային խաղաղության»՝ «Կարնեգի» հիմնադրամի Բրյուսելի գրասենյակ այցելությամբ։
Հետազոտական հեղինակավոր այս կենտրոնում հյուրընկալված նախագահ Սարգսյանը հանդիպում է ունեցել կենտրոնի փորձագետների հետ։ Հանդիպման մոդերատորը՝ «Կարնեգի» հիմնադրամի գիտաշխատող Ստեֆան Լեhնեն, ով զբաղվում է Լիսաբոնի համաձայնագրից ի վեր ԵՄ արտաքին քաղաքականության զարգացումների եւ անդամ երկրների հետ փոխհարաբերությունների ուսումնասիրությամբ, լսարանին հակիրճ ներկայացրել է Հայաստանի նախագահին, որից հետո Սերժ Սարգսյանը հանդիպման մասնակիցների առջեւ հանդես է եկել ելույթով եւ պատասխանել նրանց հետաքրքրող հարցերին։ Լսարանին հետաքրքրել են ինչպես Հայաստանի արտաքին եւ ներքին քաղաքականության, այնպես էլ տարածաշրջանային եւ միջազգային արդի խնդիրների շուրջ ՀՀ նախագահի տեսակետներն ու գնահատականները։


Նախագահ Սերժ Սարգսյանի ելույթը «Կարնեգի» կենտրոնում
 

Հարգելի՛ պարոն Լեհնե,
Հարգելի՛ տիկնայք եւ պարոնայք,
Ինձ համար, իհարկե, պատիվ է ելույթ ունենալ «Հանուն համաշխարհային խաղաղության» «Կարնեգի» հիմնադրամի Բրյուսելի գրասենյակի կազմակերպած միջոցառման ժամանակ։ Դուք առաջին անգամ եք ինձ հյուրընկալում, բայց ես ջերմությամբ եմ հիշում Վաշինգտոնի ձեր կենտրոնական գրասենյակում ունեցած հանդիպումներն ու քննարկումները։ Նման հեղինակավոր հարթակները հնարավորություն են ընձեռում մի կողմից՝ ներկայացնելու մեր երկրում տեղի ունեցող զարգացումների տրամաբանությունը, մյուս կողմից՝ հենց մենք աղբյուրից հաղորդակից ենք դառնում փորձագիտական վերջին մշակումներին, վերլուծություններին ու մոտեցումներին։
Եվ վերջապես, համաշխարհային խաղաղության գաղափարը, որ դրված է հիմնադրամի հիմքում, այն նպատակն է, ինչին մշտապես ձգտել եւ ձգտում է ողջ քաղաքակիրթ աշխարհը։
Հարգելի՛գործընկերներ,
Էնդրյու Կարնեգին ասում էր. «Սովորեցրե՛ք մարդկանց լավ քաղաքացիներ լինել եւ դուք կլուծեք կյանքի խնդիրը»։ Անվիճելի է, որ քաղաքացին պետության հաջողության գրավականներից է։ Որքան կայացած ու իրազեկ է քաղաքացիական հասարակությունը, այնքան արդյունավետ են գործում պետական ինստիտուտները։ Ամուր քաղաքացիական հասարակությունը, իշխանության ճյուղերի տարանջատմանը զուգահեռ, զսպումների եւ հակակշիռների լավագույն մեխանիզմներից մեկն է։
Հենց դա էր մեր երկրում սահմանադրական բարեփոխումների գործընթաց սկսելու շարժառիթը, որի մեջ մենք գտնվում ենք արդեն ավելի քան երկու տարի։ Նորացված Սահմանադրությամբ մեր երկրում հստակեցվեց իշխանության տարբեր ճյուղերի իրավասությունների շրջանակը՝ շեշտադրելով բոլոր ոլորտներում մարդու իրավունքների պաշտպանվածությունն ու քաղաքացիների ձայնի լսելիությունը։
Արդյունքում, մեր երկրում արդեն մեկնարկել է այնպիսի քաղաքական համակարգի ձեւավորումը, որտեղ ազդեցիկ դերակատարները կլինեն ոչ թե անձերը, այլ քաղաքական ուժերը, քաղաքական ինստիտուտները։ Այսօր արդեն Հայաստանում ընթանում է կուսակցությունների խոշորացման եւ քաղաքական կոալիցիաների ձեւավորման մի գործընթաց, որը մենք շատ դրական ենք համարում եւ որին ձգտում էինք։ Քաղաքական կուսակցություններն ամրապնդվում են որպես կայուն ինստիտուտներ, աստիճանաբար վերանում կամ ձուլվում են գաճաճ կուսակցությունները։
Հայաստանն իր փոփոխված Սահմանադրությամբ համարձակ քայլ կատարեց՝ ուղղված մի կողմից՝ իշխանության ապակենտրոնացմանը, մյուս կողմից՝ այնպիսի սահմանադրական համակարգի ձեւավորմանը, որը կապահովի հետխորհրդային արատավոր երեւույթների վերացումը, կնվազեցնի կոռուպցիոն ռիսկերը եւ լավագույն պայմաններ կապահովի երկիրը կայուն զարգացման ուղիով առաջնորդելու համար։
Գալիք շաբաթների ընթացքում Հայաստանի քաղաքական համակարգն անցնելու է լուրջ քննություն. ապրիլի սկզբին նորացված Սահմանադրության եւ նոր ընտրական օրենսգրքի համաձայն՝ մենք կանցկացնենք խորհրդարանական ընտրություններ։ Ընտրական օրենսգրքում էլ արմատական փոփոխություններ ունենք, որոնց մի զգալի մասը մեր երկրում նախադեպը չունեցած՝ ընդդիմություն–իշխանություն—քաղաքացիական հասարակություն երկխոսության եւ կոնսենսուսի արդյունք էր։ Ազատ եւ արդար ընտրությունների անցկացման եւ ընտրական գործընթացի հանդեպ հանրային վստահության էական բարձրացման նպատակով մենք սկսել ենք ակտիվորեն ներդնել ընտրությունների վերահսկման ժամանակակից տեխնիկական մեխանիզմներ։ Ավելին, անսալով ընդդիմության ցանկությանը՝ մենք համաձայնեցինք ներդնել ընտրությունների անցկացման այնպիսի թափանցիկ նորամուծություններ, որոնց հանդեպ վերապահումներ ուներ նույնիսկ Եվրոպայի խորհրդի Վենետիկի հանձնաժողովը։ Բայց մենք գնացինք այդ քայլին, քանի որ այս փուլում ամենից կարեւորն ընթացող գործընթացների նկատմամբ վստահության բարձրացումն է։
Այս համատեքստում շնորհակալություն եմ հայտնում միջազգային մեր բոլոր գործընկերներին եւ, մասնավորապես, Եվրոպական միությանը, գործընթացի ամենասկզբից մեզ աջակցելու համար։ Իրականացված բարեփոխումների ընթացքն ու արդյունքները բարձր գնահատականի են արժանացել մեր միջազգային գործընկերների, այդ թվում՝ ԵԱՀԿ/ԺՀՄԻԳ—ի, Եվրոպայի խորհրդի Վենետիկի հանձնաժողովի եւ Եվրոպական միության կողմից։
Մեր սահմանած նշաձողը բարձր է. անցկացնել ժողովրդավարական, ազատ, արդար ու թափանցիկ ընտրություններ։ Վստահ եմ՝ իրականություն կդարձնենք մեր այդ նպատակը, եւ ընտրությունների մթնոլորտն ու ընտրական գործընթացի արդյունքները կհաստատեն մեր մոտեցումների ճշմարտացիությունը։
Սահմանադրական բարեփոխումները նախաձեռնելիս մեր գլխավոր նպատակը ուղղակի խորհրդարանական համակարգի ներդրումը չէր, այլ ժողովրդավարական ինստիտուտների հետագա ամրապնդումը՝ իշխանության ապակենտրոնացման եւ ամբողջությամբ համամասնական ընտրակարգի անցնելու միջոցով։ Կարծում ենք՝ այդ տեսանկյունից Հայաստանը կարող է ուսանելի օրինակ ծառայել թե՛ հետխորհրդային, թե՛ տարածաշրջանային շատ երկրների համար։
Տիկնա՛յք եւ պարոնա՛յք,
2016թ. ապրիլին Ադրբեջանի սանձազերծած քառօրյա ռազմական արկածախնդրությունը Բաքվի երկարամյա ռազմատենչ քաղաքականության եւ քարոզչության կենսագործումն էր։ Այն լուրջ վնաս հասցրեց կարգավորման գործընթացին։ Ադրբեջանի ագրեսիան կրկին ապացուցեց, որ Արցախի ժողովրդի պայքարը սեփական հողի վրա անվտանգ գոյության ու ազատության համար այլընտրանք չի ունեցել ու այսօր էլ չունի։ Սա կարծիք չէ, այլ Ադրբեջանի վարած քաղաքականության արդյունքում ստեղծված եւ մեզ պարտադրված իրականություն։ 
Ահավասիկ, ապրիլյան պատերազմին հետեւած՝ Վիեննայի եւ Սանկտ Պետերբուրգի հանդիպումներում ձեռք բերվեցին հստակ պայմանավորվածություններ 1994—1995թթ. հրադադարի եռակողմ անժամկետ համաձայնագրերի իրականացման, ինչպես նաեւ հակամարտության գոտում այդ ռեժիմի խախտումների հետաքննության մեխանիզմի ստեղծման վերաբերյալ։ Սակայն Ադրբեջանն իր՝ արդեն սովորական դարձած վարքագծի համաձայն շարունակաբար խուսափում է այդ պայմանավորվածությունների իրականացումից՝ հայտարարելով, որ դրանց իրագործումն իբր ամրապնդելու է ձեւավորված ստատուս քվոն Լեռնային Ղարաբաղում։
Եթե Ադրբեջանն իրապես մտահոգված է Լեռնային Ղարաբաղում ստատուս քվոյի փոփոխությամբ, ապա միայն մի տարբերակ կա փոխելու այն՝ դա Լեռնային Ղարաբաղի ժողովրդի ինքնորոշման իրավունքի ճանաչումն է։
Միամտություն կլինի կարծել, որ Ադրբեջանը չէր գիտակցում, թե ինչ ծանր հարված է հասցնում խաղաղությանը, որքան է խորացնում ստատուս քվոն, որքան հետ է մղում բանակցային գործընթացը։
Ակնհայտորեն Բաքուն ղարաբաղյան հակամարտությունն օգտագործում է իր ներքին հարցերի՝ սոցիալ—տնտեսական ահագնացող խնդիրների եւ մարդու իրավունքների կոպտագույն ոտնահարումների դեմ աճող դժգոհությունից հասարակության ուշադրությունը շեղելու նպատակով։
Հենց այդ պատճառով Բաքվում վերջերս հայտարարեցին, թե Լեռնային Ղարաբաղի խնդիրն իբր իրենց «ներքին գործն է»։ Ղարաբաղյան հիմնահարցով արդեն տարիներ շարունակ որպես միջնորդներ զբաղվում են Ֆրանսիան, Ռուսաստանը եւ Միացյալ Նահանգները՝ ԵԱՀԿ Մինսկի խմբի համանախագահների միջազգայնորեն համաձայնեցված ձեւաչափով։ Հավանաբար Բաքվում վատ երազ են տեսել եւ դրանից եզրակացրել, թե միջազգային հանրության այս երեք խոշորագույն դերակատարներն իրենց բոլոր բարդ գործերը թողած՝ հանկարծ սկսել են զբաղվել Ադրբեջանի «ներքին գործով»։
Դա ընդամենը մեկ օրինակ է աբսուրդի այն թատրոնի, որը բեմականացնում են Բաքվում։ Մենք ստիպված ենք շարունակաբար բախվել դրան գրեթե ամենօրյա ռեժիմով։ Սակայն երբեմն լինում են նաեւ անկեղծության պոռթկումներ։ Դրանցից մեկի ժամանակ Ադրբեջանի ղեկավարը, փորձելով իր ենթակաների առջեւ արժեւորել իրեն, հրապարակայնորեն խոստովանեց, որ բանակցությունների փակ դռների հետեւում իրեն ստիպում են ճանաչել Լեռնային Ղարաբաղի անկախությունը, եւ միայն ինքն է, որ կարողանում է դիմանալ ԵԱՀԿ Մինսկի խմբի համանախագահող երկրների ճնշումներին։
ԵԱՀԿ Մինսկի խմբի համանախագահները՝ որպես միջնորդներ, կոչված են նաեւ կանխելու հակամարտության գոտում իրավիճակի հնարավոր սրումները։ Հրանոթների արկերի տակ ընթացող բանակցությունները երբեք խոստումնալից լինել չեն կարող։
Ահա այս հանգրվանում է այժմ գտնվում արցախյան հիմնահարցի կարգավորման գործընթացը։ Ե՛վ Արցախը, ե՛ւ Հայաստանը սկզբունքորեն դեմ են ուժի կիրառմանը եւ հանդես են գալիս հիմնահարցն օր առաջ խաղաղ բանակցային ճանապարհով լուծելու օգտին։
Ադրբեջանի կողմից ռազմական արկածախնդրության նոր փորձերը կարող են անկանխատեսելի հետեւանքներ ունենալ հենց իր՝ Ադրբեջանի համար։ Հայաստանը՝ որպես Լեռնային Ղարաբաղի անվտանգության երաշխավոր, բազմիցս հայտարարել է, որ պատրաստ է համարժեքորեն արձագանքելու ուժի կիրառման ցանկացած փորձի։
Չնայած Ադրբեջանի շարունակական սպառնալիքներին՝ Արցախի ժողովուրդը շարունակում է հաստատակամորեն կերտել սեփական ապագան։ Փետրվարի 20—ին Լեռնային Ղարաբաղի Հանրապետությունում հանրաքվեի դրվեց սահմանադրական փոփոխությունների փաթեթը։
Արցախի ժողովուրդն իր ձայնը տվեց կառավարման լիարժեք նախագահական համակարգի ձեւավորման օգտին։ Ինչպես տեսնում եք, երկրի կառավարման մոդելի հարցում Հայաստանի եւ Արցախի պատկերացումները չեն համընկնում, սակայն նույնն է ժողովրդավարական հասարակարգ կառուցելու անխախտ վճռականությունը։ Արցախի ժողովուրդն այդ կամքը դրսեւորել է տասնյակ տարիներ շարունակ՝ ընտրությունների միջոցով ձեւավորելով իր գործադիր, օրենսդիր եւ տեղական ինքնակառավարման մարմինները։ Արցախի ժողովուրդն այլ ապագա չի պատկերացնում եւ լծված է մարդու իրավունքների ու հիմնարար ազատությունների վրա հիմնված ազատ հասարակության կառուցման գործին։
Արցախցին, ժողովրդավարական աշխարհի հետ հավասար, իրավունք ունի վայելելու համամարդկային բոլոր հիմնարար ազատությունները, շատ ավելի լավ գիտի ազատ ապրելու գինը, ինչի համար նա վճարել է իր սեփական զավակների արյան գնով։ Այսօր էլ Արցախը ժողովրդավարություն է կառուցում թշնամական կրակահերթերի ներքո։ Իսկ Ադրբեջանն ամեն ինչ անում է ազատության այս ձայնը լռեցնելու համար, կոչ է անում դատապարտել ժողովրդավարական գործընթացը Արցախում։ Մինչ Արցախը հաստատուն քայլեր է կատարում դեպի ավելի ամուր ժողովրդավարություն, նրա հարեւան Ադրբեջանը հատկապես վերջին շրջանում հաստատուն քայլեր է կատարում դեպի ժառանգաբար փոխանցվող լիակատար բռնապետություն։
Այստեղ հավաքվածներդ, ես տեսնում եմ, հայտնի փորձագետներ եք։ Եթե կա կառավարման, ինքնակազմակերպման այլընտրանքային մեխանիզմ չճանաչված միավորների համար, շնորհակալ կլինեմ, եթե հուշեք։ Դժվար է բացատրել արցախցի գործընկերներին, թե ինչու ՄԱԿ—ի անդամ չհանդիսացող Կոսովոն կարող է համագործակցել ԵԱՀԿ/ԺՀՄԻԳ—ի հետ եւ այդ կերպ ձեւավորել իր կառավարման ինստիտուտները, իսկ իրենք դա անել չեն կարող։
Հայաստանը թեեւ չի ճանաչել Կոսովոյի անկախությունը, այնուամենայնիվ ԵԱՀԿ—ի բյուջեն ֆինանսավորելու միջոցով մասնակից է այդ գործընթացին։ Վստահ եմ, որ միջազգային հանրությունը պետք է աստիճանաբար սկսի նպաստել Արցախի ժողովրդավարական գործընթացներին՝ անկախ Լեռնային Ղարաբաղի Հանրապետության կարգավիճակից։
Հարգելի՛ գործընկերներ,
Հայտնի է, որ կայուն զարգացումը հանրային անվտանգության կարեւորագույն բաղադրիչներից է։ Իսկ պետության կտրվածքով առհասարակ որեւէ զարգացում չի կարող կայուն լինել, եթե այն հիմնված չէ ամուր տնտեսության վրա։
Վերջին տարիների զարգացումները փաստում են, որ Հայաստանը կարողացավ սուղ ռեսուրսների պայմաններում ձեւավորել ճկուն տնտեսական համակարգ։ Այդ հաջողությունները գալիս են ապացուցելու, որ մեր տնտեսության զարգացման հիմնական աղբյուրը մարդկային կապիտալն է։ Որպես օրինակ բերեմ տեղեկատվության եւ հաղորդակցության ոլորտը, որ վերջին տարիներին դարձել է մեր տնտեսության շարժիչներից մեկը։ Այս ոլորտում Հայաստանում աշխատում են այնպիսի հեղինակավոր կազմակերպություններ, ինչպիսիք են «Մայքրոսոֆթը», «ԱյԲիԷմը», «Սիսկոն», «Դ—Լինկը», «Օրաքլը», «Սինոփսիսը», «Մենթոր Գրաֆիքսը» եւ այլն։ Այս ոլորտում Հայաստանում գործում է շուրջ 400 կազմակերպություն, զբաղվածների թիվը հասնում է 15 հազարի։ Հայաստանում տեղեկատվական տեխնոլոգիաների ոլորտում կանայք ամենաներգրավվածներից են աշխարհում։ Այս ուղղությամբ տարեկան մենք արձանագրում ենք շրջանառության 20—25 տոկոս միջին աճ։ ՀՆԱ—ում ոլորտի տեսակարար կշիռը կազմում է շուրջ 4 տոկոս, ինչը համադրելի է զարգացած շատ երկրների հետ։
Տնտեսական զարգացման ստանդարտ մոդելներով դժվար է ապահովել առաջընթացի այն մակարդակը, որը թույլ կտա դիմագրավելու առկա համաշխարհային մարտահրավերները։ Ուստի, մեզ անհրաժեշտ էր նոր տեսլական՝ նորարարական մոտեցումներով եւ լուծումներով։ Մենք կարողացանք ձեւավորել հանքահումքային ռեսուրսներից անկախ տնտեսական համակարգ։ Ի տարբերություն տարածաշրջանի մի շարք երկրների, որոնցում վերջին տարիների տնտեսական ճգնաժամը հանգեցրեց տնտեսության ապակայունացման, ազգային տարադրամի արժեզրկման՝ Հայաստանն ապացուցեց, որ նույնիսկ շրջափակման եւ ռեսուրսային սահմանափակման մեջ գտնվելով՝ կարողացավ ձեւավորել կայուն եւ կանխատեսելի տնտեսություն, գրանցելով առաջընթաց մի շարք միջազգային ինդեքսներով, մասնավորապես՝ Համաշխարհային բանկի «Դուինգ բիզնես 2017», ինչպես նաեւ վարկանիշային «Ֆիտչ» գործակալության վերջին զեկույցներում։ «Դուինգ բիզնես 2017» զեկույցի համաձայն՝ Հայաստանը բարելավել է իր դիրքերը հինգ հորիզոնականով՝ զբաղեցնելով 38—րդ տեղը աշխարհի 190 երկրների շարքում։
Եվ անցած տարվա վերջին ձեւավորված մեր նոր կառավարությունը հանդես է եկել բարեփոխումների լուրջ օրակարգով, որի նպատակն է բարձրացնել երկրի ճանաչելիության մակարդակն ու ներդրումային գրավչությունը, հատկապես՝ եվրոպական ներդրողների համար, խթանել պետություն—մասնավոր հատված համագործակցությունը, պետության կողմից համակողմանի աջակցություն ցուցաբերել այն գործարար նախագծերին, որոնք թույլ կտան ապահովել արագ տնտեսական աճ։
Հարգելի՛ գործընկերներ,
Հայաստանի միջազգային միջավայրը քննարկելիս՝ չեմ կարող չանդրադառնալ սիրիական ճգնաժամին։ Ճգնաժամի սկզբից մինչ օրս Հայաստանում ապաստան է գտել շուրջ 20 հազար սիրիահայ փախստական։ Իհարկե, ցավով եմ այս բառն արտասանում, քանի որ նրանք մեր ընկալման մեջ փախստականներ չեն։ Նրանք մեր մի մասնիկն են, որ պատմական զարգացումների բերումով ժամանակին փրկություն են գտել Սիրիայում։ Այսօր, ողբերգական աշխարհաքաղաքական անցքերի արդյունքում նրանք ապաստանել են մեզ մոտ։
Սակայն մենք անում ենք ավելին։ Հայաստանը պարբերաբար մարդասիրական օգնություն է ուղարկում Սիրիա. օգնությամբ բեռնված հերթական օդանավն օրեր առաջ վայրէջք կատարեց սիրիական հողում։ Այն նախատեսված է ոչ միայն մեր սիրիահայ հայրենակիցների համար, այլեւ բոլոր սիրիացիների՝ անկախ կրոնական եւ էթնիկական պատկանելությունից։ Սա նվազագույնն է, որ մենք կարող ենք անել՝ ի երախտագիտություն մեր բարեկամ Սիրիայի ժողովրդի, որը ժամանակին իր դռները բացեց ցեղասպանությունը վերապրած հայերի համար։
Հարգելի՛ տիկնայք եւ պարոնայք,
Երեկ մենք նախագահ Տուսկի հետ հայտարարեցինք Հայաստան—Եվրոպական միություն նոր շրջանակային համաձայնագրի բանակցությունների ավարտի մասին։
Հայաստան—ԵՄ նոր պայմանագիրն առաջին հերթին քաղաքական փաստաթուղթ է, որը վկայում է տարբեր շահերի համադրումը՝ միտված, այսպես կոչված, «ե՛ւ, ե՛ւ»—ի քաղաքականության կենսունակությանը։ Ճիշտ է, դեռեւս 1996թ. մենք ստորագրել էինք Հայաստան—ԵՄ հարաբերությունները կարգավորող՝ Գործընկերության եւ համագործակցության մասին շրջանակային համաձայնագիրը, սակայն այն վաղուց արդեն չի արտահայտում ո՛չ Հայաստան—ԵՄ համագործակցության ընդգրկումը, ո՛չ էլ դրա խորությունը եւ առավել եւս՝ ո՛չ էլ հավակնությունները։ Ուստի, նոր համաձայնագրով, ամրագրելով տարիների ընթացքում արձանագրված ձեռքբերումներն ու զարգացման ուղենիշները, մենք ազդարարում ենք, որ շարունակելու ենք բոլոր ոլորտներում զարգացնել երկկողմ օրակարգը։
Կարեւորն այն է, որ մեր համագործակցությունն ունի արժեքային հենք։ Հայաստանն անգամ պատմության ամենադժվարին պահերին իր առջեւ քաղաքակրթական ընտրության խնդիր չի դրել։ Ոչ ոք մեզ չի պարտադրում ժողովրդավարական բարեփոխումներ իրականացնել, դա մեր ընտրությունն է։ Մեր ժողովուրդն իրեն լիովին եվրոպացի է համարում. թե՛ մեր հոգեւոր—մշակութային ժառանգությունը եւ թե՛ մեր կենսակերպը եվրոպական են։ Պատահական չէ, որ այսօր էլ հարյուր հազարավոր հայեր ապրում են Եվրոպայում եւ հանդիսանում օրինավոր քաղաքացիներ՝ իրենց տաղանդն ու աշխատասիրությունը ծառայեցնելով այդ երկրներին։ Սա եւս կարեւոր կապող օղակ է Հայաստանի եւ Եվրոպական միության միջեւ։ 
Այսպիսով, մենք պարզապես ավելի ամուր իրավական հիմք ենք ապահովում այն համագործակցության համար, որը փաստորեն առկա է։ Համոզված ենք, որ դա թույլ կտա եւ նաեւ կպարտավորեցնի ունենալ ավելի արդյունավետ պետություն։ 
Ճիշտ է, ԵԱՏՄ—ին Հայաստանի անդամակցությունը սկզբնական շրջանում փշոտ ընդունվեց մեր որոշ արեւմտյան գործընկերների կողմից, սակայն ուրախ եմ, որ ժամանակն ամեն բան իր տեղը դրեց։
Մենք պատրաստ ենք նպաստելու ԵԱՏՄ—ԵՄ հարաբերությունների փոխշահավետ մերձեցմանը։ Հայաստանը շահագրգռված է համաեվրոպական համագործակցությամբ։ Մենք քաջ գիտակցում ենք, որ եղած խնդիրները լուծելու լավագույն ուղին համագործակցությունն է, իսկ հակամարտության ու նոր բաժանարար գծերի ստեղծման քաղաքականությունը ապագա չունի։
Միաժամանակ, Հայաստանը, պատմականորեն հարաբերությունների մեծ փորձ ունի Իրանի հետ, իսկ ներկա սերտ տնտեսական, քաղաքական եւ մշակութային կապերը դարձնում են Հայաստանը լավ հարթակ Իրան մուտք գործելու ցանկություն ունեցող եվրոպական ընկերությունների համար։ Իրանի հետ զարգացնելով տարածաշրջանային օրինակելի համագործակցություն՝ Հայաստանն այսօր լավ նախադրյալներ ունի՝ դառնալու Պարսից ծոցը սեւծովյան նավահանգիստների հետ կապող ամենաապահով եւ ամենակարճ տարանցիկ ուղին։ Դրան էր միտված Հյուսիս—հարավ ավտոմայրուղին՝ վրացական նավահանգիստներից դեպի Երեւան եւ ապա դեպի Իրանի սահմանակետ տանող ավտոճանապարհը ԵՄ—ի հիմնական երթուղում ներառելը։ 
Հայ—վրացական բարեկամական հարաբերությունները Հարավային Կովկասի անվտանգության կարեւորագույն օղակներից են։ Վրաստանի հետ մենք մշտապես բոլոր ընթացիկ հարցերը կարգավորել ենք բարիդրացիության եւ փոխըմբռնման մթնոլորտում։ Մեր համագործակցությունը երբեւէ չենք պայմանավորել երրորդ երկրների հետ հարաբերություններով։ 
Հայաստանի՝ որպես ԵԱՏՄ—ի անդամի, եւ Վրաստանի՝ որպես ԵՄ—ի ասոցացված գործընկերոջ, այսօրվա համագործակցությունը փաստում է փոխշահավետ հարաբերությունների նոր հնարավորությունների մասին։
Հայաստանը պատրաստակամ է դառնալու այն կայուն գործընկերը տարածաշրջանում, որը կնպաստի խոշոր դերակատարների միջեւ հակասությունների հարթման, տնտեսական զարգացմանն ուղղված ուղիների մշակման եւ ներդրումային արդյունավետ քաղաքականության ձեւավորման գործընթացին։
Հարգելի՛ գործընկերներ,
Եզրափակելով իմ ելույթը՝ ցանկանում եմ մեկ անգամ եւս շեշտել աշխարհում եւ մեր տարածաշրջանում տեւական խաղաղության հաստատման կարեւորությունը։ Համոզված եմ, որ ցանկացած հակամարտություն հնարավոր է լուծել միջազգային հանրության համախմբված ջանքերի շնորհիվ։ Եվ խորհրդանշական է, որ Երեւանի կոնյակի գործարանում պահվում է այսպես կոչված «խաղաղության տակառը»՝ շրջապատված Հայաստանի, Լեռնային Ղարաբաղի, Ադրբեջանի եւ ԵԱՀԿ ՄԽ համանախագահ երկրների դրոշներով։ Դա հաշտության եւ խաղաղության ակնկալիքի սոսկ մեկ խորհրդանշական դրսեւորում է։ Մենք անհամբեր սպասում ենք այն օրվան, երբ աշխարհահռչակ հայկական կոնյակով կազդարարենք մեր տարածաշրջանում երկար սպասված խաղաղության հաստատումը՝ զարգացման նոր հնարավորություններ ստեղծելով Հարավային Կովկասի բոլոր բնակիչների համար։ 

Շնորհակալություն։

ՀՀ նախագահի մամլո գրասենյակ

 

Կատեգորիա: Պաշտոնական | Դիտումներ: 23 | Ավելացրեց: Martos | - Վարկանիշ -: 0.0/0
Մեկնաբանություններն ընդամենը՝: 0
avatar
Մուտքի ձև

Որոնել

Զամբյուղ
Ձեր զամբյուղը դատարկ է

Օրացույց
«  Մարտ 2017  »
ԵրկԵրկՉրկՀնգՈւրՇբԿր
  12345
6789101112
13141516171819
20212223242526
2728293031

Սոց ցանցեր

Ժամանակահատված

Copyright Metsamorcity.do.am © 2017