ՄԵԾԱՄՈՐ METSAMOR CITY Ուրբաթ, 15.12.2017, 21:52
Ողջույն Հյուր | RSS
Կայքի մենյու

Բաժնի անվանակարգերը
Հանրապետություն [455]
Կրթություն և գիտություն [33]
Մարզային [14]
Պաշտոնական [369]
Մշակույթ [14]
Հասարակություն [639]
Սպորտ [1]
Տեսակետ [37]
Տարածաշրջան [69]
Զանազան [136]
Քաղաքականություն [522]
Համայնք [38]

Մինի - չաթ
 
200

Վիճակագրություն

Ընդամենը առցանց: 1
Հյուրեր: 1
Հաճախորդներ 0

Գլխավոր էջ » 2017 » Մարտ » 3 » Հաջողվել է ձեւավորել արտաքին քաղաքական բավականին հագեցած եւ դրական օրակարգ
14:28
Հաջողվել է ձեւավորել արտաքին քաղաքական բավականին հագեցած եւ դրական օրակարգ

Նախագահ Սերժ Սարգսյանը Դիվանագետի օրվա կապակցությամբ այցելել է արտգործնախարարություն

Նախագահ Սերժ Սարգսյանը երեկ Դիվանագետի օրվա կապակցությամբ այցելել է արտաքին գործերի նախարարություն եւ հանդիպում է ունեցել ԱԳՆ կենտրոնական ապարատի, ՀՀ դիվանագիտական ներկայացուցչությունների եւ հյուպատոսական հիմնարկների ղեկավարների հավաքի մասնակիցների հետ։
Հանրապետության նախագահը եւս մեկ անգամ շնորհավորել է հավաքի մասնակիցներին մասնագիտական տոնի կապակցությամբ, ապա իր ելույթում հանգամանորեն անդրադարձել անկախացումից ի վեր Հայաստանի անցած ճանապարհին, արտաքին քաղաքականության մեջ ունեցած ձեռքբերումներին, հաղթահարած խոչընդոտներին, արտաքին քաղաքականության առաջնայնություններին եւ մարտահրավերներին։ Հանրապետության նախագահը նաեւ մի շարք ուղղություններով հանձնարարականներ է տվել դիվանագետներին դեսպանընկալ երկրներում եւ միջազգային կազմակերպություններում Հայաստանը պատշաճ ներկայացնելու ուղղությամբ իրականացվելիք աշխատանքների վերաբերյալ, անդրադարձել է այն խնդիրներին, որոնք այսօր դրված են դիվանագետների առջեւ, տվել համապատասխան ցուցումներ։
«Ոմանք կարծում են, թե դիվանագետները շատ արտոնություններ ունեն։ Դիվանագիտական ծառայությունը որքան արտոնյալ, նույնքան էլ, միգուցե բազմապատիկ անգամ ավելի պատասխանատու ծառայություն է, եւ արտոնություններն էլ սահմանվում են ոչ թե վայելքի, այլ սեփական երկրի շահերին արդյունավետորեն ծառայելու համար։ Ձեր առաքելությունն է՝ արժանավայել կերպով աշխարհին ներկայացնել Հայաստանը՝ որպես երկխոսության համար բաց, խաղաղասեր եւ ժողովրդավար երկիր, որ կառուցում է ժամանակակից կենսունակ քաղաքական եւ տնտեսական համակարգ»,–ասել է նախագահ Սերժ Սարգսյանը։
Հանրապետության նախագահը խոսել է նաեւ դիվանագիտական աշխատանքի նրբությունների մասին՝ նշելով, որ այդ աշխատանքը հաճախ իրականացվում է փակ դռների հետեւում, սակայն անգամ ամենագաղտնի բանակցություններն ունենում են հրապարակային դրսեւորումներ, արդյունքներ եւ հետեւանքներ։ «Պահպանելով այս աշխատանքի բնույթից բխող գաղտնապահությունը՝ Հայաստանի դիվանագիտությունը միեւնույն ժամանակ պետք է լինի ըմբռնելի մեր հասարակության համար։ Ձեռնարկվող գործողությունների տրամաբանությունն անհրաժեշտ է հետեւողականորեն ներկայացնել հանրությանը՝ առանց երկնչելու հնարավոր քննադատությունից։ Ձեր խոսքը, ձեր ուղերձը պետք է լինի վստահ, պետք է լինի հասկանալի եւ այդպիսով վստահություն կներշնչի նաեւ հանրությանը»,–ասել է նախագահը։
Սերժ Սարգսյանն իր ելույթում անդրադարձել է նաեւ Լեռնային Ղարաբաղի հիմնախնդրի ուղղությամբ արտերկրում եւ միջազգային տարբեր հարթակներում ՀՀ դիվանագիտական ծառայության առջեւ դրված խնդիրներին ու Ադրբեջանի ապակառուցողական քաղաքականությանը, տարածաշրջանում լարվածության ստեղծման քայլերին հակազդելուն. «Երեւանը եւ Ստեփանակերտը պատերազմ չեն ցանկանում, մինչդեռ Բաքուն վաղուց ամենաբարձր մակարդակում անընդհատ խոսում է պատերազմի մասին, մեծացնում է լարվածությունը շփման գծում, հերոսացնում է այն զինվորներին, որոնց գործած, այսպես ասած, «սխրանքները» համարվում են պատերազմի հանցագործություն։ Եթե Ադրբեջանը շարունակի նույն ոգով եւ իրավիճակը հասցնի պատերազմականի, ապա Արցախի ժողովրդի անվտանգությունն ապահովելու համար մենք մեկ վայրկյան անգամ կանգ չենք առնի կիրառելու մեր զինանոցում եղած բոլոր հնարավորությունները։ Այսօր տարածաշրջանում լայնածավալ պատերազմի զսպող գլխավոր գործոնը հայ զինվորն է, ով ամուր կանգնած է եւ հստակ գիտակցում է, թե ինչի համար է պայքարում եւ ինչ խնդիր է լուծում»։
Ընդգծելով, որ անցած քառորդ դարում Հայաստանին հաջողվել է ձեւավորել արտաքին քաղաքական բավականին հագեցած եւ դրական օրակարգ, հանրապետության նախագահը նշել է, որ մեր երկիրն իր փորձն ու ջանքերը ներդնում է հանուն համամարդկային նշանակության հարցերի բարձրաձայնման եւ իր նպաստը բերում միջազգային հանրության կողմից դրանց լուծման գործին. «Որպես ցեղասպանություն վերապրած ժողովուրդ՝ մենք պետք է մշտապես գտնվենք մարդկության դեմ կատարվող հանցագործությունների կանխարգելման միջազգային պայքարի առաջնագծում։ Ձեր հետեւողական քայլերի շնորհիվ 2015 թվականին ՄԱԿ—ի մարդու իրավունքների խորհրդում միաձայն ընդունվեց Հայաստանի կողմից ներկայացված ցեղասպանության կանխարգելման վերաբերյալ բանաձեւը, իսկ Գլխավոր ասամբլեայի 69—րդ նստաշրջանում դեկտեմբերի 9—ը հռչակվեց ցեղասպանության հանցագործության զոհերի հիշատակի օր։ Այս ուղղությամբ հսկայական ջանքեր ներդրվեցին հատկապես Հայոց ցեղասպանության 100—րդ տարելիցին նվիրված միջոցառումների շրջանակներում»։
Հայաստանի արտաքին քաղաքականության կարեւոր նվաճումներից մեկը համարելով Հայաստանում 2018 թվականին Ֆրանկոֆոնիայի միջազգային կազմակերպության գագաթնաժողովն անցկացնելու որոշումը՝ հանրապետության նախագահը դա նախաձեռնողական դիվանագիտության արդյունք, ինչպես նաեւ մեր երկրի նկատմամբ ութ տասնյակից ավելի պետությունների վստահության եւ համերաշխության դրսեւորում է որակել «Համոզված եմ, որ ձեւավորված պետական հանձնաժողովի համակարգմամբ եւ ձեր ջանքերով կանենք հնարավորը՝ այդ միջոցառումն ամենաբարձր մակարդակով հյուրընկալելու եւ դրա հնչեղությունն ապահովելու համար։ Այս գագաթնաժողովը լինելու է Հայաստանի անկախությունից ի վեր հյուրընկալվող ամենաներկայացուցչական միջոցառումներից մեկը։ Այն նաեւ կնպաստի մեր երկրի հեղինակության բարձրացմանն ու մշակույթն ավելի ճանաչելի դարձնելուն։ Այն հիանալի հնարավորություն կընձեռի գործընկերային առավել սերտ կապեր հաստատելու բազմաթիվ պետությունների հետ, որոնցում մենք ներկայացված չենք»,–ասել է նախագահ Սարգսյանը։
Նշելով, որ անցյալ տարի քայլեր ձեռնարկվեցին Հայաստանի արտաքին քաղաքական գլխավոր ուղղություններից մեկը՝ տնտեսական դիվանագիտությունը, ինստիտուցիոնալ հիմքերի վրա դնելու ուղղությամբ, Սերժ Սարգսյանը ՀՀ դիվանագետների խնդիրն է համարել առավել ակտիվացնել ջանքերն արտերկրում Հայաստանի ներդրումային գրավչության եւ համեմատական առավելությունների ճիշտ ներկայացման, համապատասխան գործարար շրջանակներին հնարավոր բիզնես նախագծերի վերաբերյալ տեղեկատվության տրամադրման, Հայաստանում արտադրված ապրանքատեսակների եւ ծառայությունների համար նոր շուկաների բացահայտման ուղղությամբ։
Նախագահը կարեւորել է նաեւ արտերկրում Հայաստանի զբոսաշրջային հնարավորությունների պատշաճ ներկայացումը՝ ակնկալելով ակտիվ աշխատանք այս ուղղությամբ։ «Վերջին շրջանում որոշ երկրների հետ ազատականացրել կամ զգալիորեն դյուրացրել ենք արտոնագրային ռեժիմը։ Սա պետք է որ իր դրական ազդեցությունն ունենա այս ոլորտի զարգացման վրա։ Դեսպաններից ակնկալում ենք կոնկրետ եւ չափելի աշխատանք։ Ուզում եմ նաեւ ավելացնել, որ մենք հատուկ հաստիք սահմանեցինք, փոխնախարարի պարտականություններն այս ուղղությամբ հստակեցրեցինք եւ ակնկալում ենք, որ նախ տնտեսական ակտիվության որոշակի չափանիշներ կհաստատվեն դեսպանների համար եւ ապա՝ գոնե ամեն տարի մենք կամփոփենք, կտեսնենք, թե կոնկրետ ի՞նչ է կատարվել եւ ի՞նչ արդյունքներ ունենք այս ուղղությամբ»,–ասել է հանրապետության նախագահը։
Ելույթի ավարտին նախագահը եւս մեկ անգամ ընդգծել է, որ, ի վերջո, հանդիպման բոլոր մասնակիցների մշտական ուշադրության կենտրոնում պետք է լինի Հայաստանի քաղաքացին. «Հայաստանի Հանրապետության քաղաքացուն տրամադրված անձնագրում գրված է, որ անձնագրի կրողի հովանավորն է Հայաստանի Հանրապետությունը, եւ արտերկրում Հայաստանի քաղաքացիները պետք է զգան, որ այդ բառերի հետեւում կանգնած է իր հովանավոր պետությունը՝ բոլոր ծառայություններով եւ հնարավորություններով։ Եվ ձեր առաջնային խնդիրներից է նաեւ արտերկրում մեր ժողովրդի ինքնության եւ մշակութային ժառանգության պահպանումը, հայրենիք—սփյուռք կապերի ամրապնդմանն ուղղված նախաձեռնությունների սատարումը։
Առհասարակ, պետք է համախմբված աշխատելու մշակույթն ամրապնդենք մեր մեջ եւ նպաստենք յուրաքանչյուրիս առջեւ դրված խնդիրների լուծմանը, որովհետեւ Հայաստանի շենացմանը պետք է ուղղված լինեն մեր բոլորի ջանքերը շատ պարզ պատճառով՝ Հայաստանը մեր հայրենիքն է։ Մենք այլ հայրենիք չունենք, եւ ա՛յս հայրենիքն են ժառանգելու մեր ապագա սերունդները։ Հարատեւելու այլ բանաձեւ գոյություն չունի։ Ով այս բանաձեւը չի ընկալում, նա մնում է պատմության կեռմաններում»,–ընդգծել է նախագահ Սերժ Սարգսյանը։

 

Կատեգորիա: Հանրապետություն | Դիտումներ: 42 | Ավելացրեց: Martos | - Վարկանիշ -: 0.0/0
Մեկնաբանություններն ընդամենը՝: 0
avatar
Մուտքի ձև

Որոնել

Զամբյուղ
Ձեր զամբյուղը դատարկ է

Օրացույց
«  Մարտ 2017  »
ԵրկԵրկՉրկՀնգՈւրՇբԿր
  12345
6789101112
13141516171819
20212223242526
2728293031

Սոց ցանցեր

Ժամանակահատված

Copyright Metsamorcity.do.am © 2017