Վարչապետ Կարեն Կարապետյանը երեկ ընդունել է պաշտոնական այցով Հայաստանում գտնվող Իսրայելի Պետության տարածաշրջանային համագործակցության նախարար Ցախի Հանեգբիի գլխավորած պատվիրակությանը։
Կառավարության տեղեկատվության եւ հասարակայնության հետ կապերի բաժնի հաղորդմամբ, ողջունելով պատվիրակության այցը մեր երկիր՝ վարչապետ Կարապետյանը նշել է, որ Հայաստանը հետաքրքրված է Իսրայելի հետ համագործակցության զարգացման եւ հատկապես տնտեսական կապերի ակտիվացման մեջ։ Կառավարության ղեկավարը դրական է համարել վերջերս Հայաստան—Իսրայել ուղիղ չվերթերի գործարկումը։
Ընդգծելով Հայաստանի հետ հարաբերությունները խորացնելու Իսրայելի պատրաստակամությունը՝ Ցախի Հանեգբին նշել է, որ այցի նպատակն է հայաստանյան գործընկերների հետ քննարկումների արդյունքում տնտեսական, տեղեկատվական տեխնոլոգիաների, զբոսաշրջության, առեւտրի, գյուղատնտեսության բնագավառներում բացահայտել այն ուղղությունները, որոնց շրջանակում երկու երկրները կարող են գործնական փոխշահավետ համագործակցություն ծավալել։
Զրուցակիցները մտքեր են փոխանակել Հայաստանի եւ Իսրայելի միջեւ տնտեսական հարաբերությունների եւ գործարար կապերի աշխուժացման հեռանկարների շուրջ։ Վարչապետն անդրադարձել է ՀՀ կառավարության ծրագրով մեր երկրում իրականացվող բարեփոխումներին՝ նշելով, որ դրանց հիմնական նպատակը արդյունավետության բարձրացումն է բոլոր ոլորտներում։ Այս համատեքստում Կարեն Կարապետյանը կարեւորել է Իսրայելի հետ փորձի փոխանակումը եւ ներդրումային ծրագրերի իրականացումը ՏՏ, գյուղատնտեսության, պետական կառավարման, թվայնացման, առողջապահության ու գիտության ոլորտներում։ Վարչապետի խոսքով, օտարերկրյա ներդրողների համար Հայաստանը կարող է հետաքրքիր հարթակ հանդիսանալ ինչպես երկկողմ գործակցություն ծավալելու, այնպես էլ երրորդ շուկաներ դուրս գալու առումով։
Ցախի Հանեգբին համակարծիք է եղել, որ երկու երկրների միջեւ համագործակցությունը զարգացնելու բազմաթիվ հնարավորություններ կան, եւ Իսրայելի կառավարությունը պատրաստ է ՀՀ կառավարության հետ ակտիվ աշխատել դրանք կյանքի կոչելու ուղղությամբ։
|