Գլխավոր էջ » 2011»Հուլիս»29 » Ադրբեջանական եւ թուրքական լրատվամիջոցները խեղաթյուրել են ՀՀ նախագահի խոսքը
19:15
Ադրբեջանական եւ թուրքական լրատվամիջոցները խեղաթյուրել են ՀՀ նախագահի խոսքը
Ծաղկաձորում հայագիտական առարկաների օլիմպիադայի մասնակիցների հարցերին ՀՀ նախագահ Սերժ Սարգսյանը պատասխանել է հավասարակշռված եւ ճիշտ շեշտադրումներով։ Նման տեսակետ հայտնեց քաղաքագետ Հրանտ Մելիք—Շահնազարյանը երեկ լրագրողների հետ հանդիպման ժամանակ։ «Նախագահ Սերժ Սարգսյանն առավել կազմակերպված քաղաքական պատասխան չէր էլ կարող տալ։ Այնտեղ անմիջական ագրեսիայի կոչ չի եղել»,—ասաց Հ. Մելիք—Շահնազարյանը։
Քաղաքագետը նշեց, որ պետք է ուշադրություն դարձնել ինֆորմացիոն հոսքին, որովհետեւ ՀՀ նախագահի խոսքը թուրքական եւ ադրբեջանական լրատվամիջոցները ոչ ճիշտ են ներկայացնում։ «ՀՀ նախագահի խոսքը միանշանակ խեղաթյուրված է ներկայացվում եւ մատուցվում այնպես, իբր Սերժ Սարսգյանն անմիջականորեն ագրեսիայի կոչ է արել։ Ադրբեջանական լրագրողները ներկայացնում են, թե Ս. Սարգսյանն ասել է. «Մենք գրավել ենք մեր տարածքները»։ Նա հստակ ասել է, որ հայերը պաշտպանել են թշնամիներից իրենց տարածքները»,–ասաց Հ. Մելիք Շահնազարյանը։ Քաղաքագետը նշեց, որ երկու հանցագործ պետությունների ներկայացուցիչներն իրավունք են վերապահում մեղադրել Հայաստանի իշխանությանը, որն արդար պահանջատիրության կողմնակից է։ Հ. Մելիք Շահնազարյանի խոսքով՝ լավ կլիներ, որ այդ պետությունները հիշեն բոլոր այն հանցագործությունները, որոնք իրականացվել են ոչ միայն հայերի, այլեւ Կովկասի այլ ժողովուրդների նկատմամբ։
