Սենատոր Մենենդեսը հայտարարել է, որ նրան ավելի երկար ժամանակ է հարկավոր վերանայելու համար Հեֆերնի Հայաստանում ԱՄՆ դեսպան նշանակելու թեկնածության հարցը, ինչպես նաեւ նա նշել է, որ շարունակում է մտահոգվել ԱՄՆ—ի վարչակազմի՝ Հայոց ցեղասպանության ճանաչման վերաբերյալ մոտեցումների առնչությամբ։
«Մենք գնահատում ենք սենատոր Մենենդեսի շարունակական գործունեությունը եւ հաստատակամությունը։ Այս վարչակազմը պետք է ուշադրություն դարձնի Մենենդեսի կոչին եւ իր դիրքորոշումը հաստատելու համար ընդունի հաջորդ տրամաբանական քայլը՝ միանշանակ հաստատելով մարդկության դեմ կատարած այդ հանցագործությունը՝ որակելով որպես ցեղասպանություն։ Ցեղասպանության ճանաչումը կօգնի կանխել հետագա նմանատիպ երեւույթները եւ բարձրացնել ԱՄՆ—ի վստահելիությունը տարածաշրջանում»,–երեկ այս մասին նշել է ԱՀՀ գործադիր տնօրեն Բրայան Արդունին։
Հեֆերնի թեկնածության հաստատման վերաբերյալ լսումների ժամանակ սենատոր Մենենդեսը հայտնել է իր վրդովմունքը ԱՄՆ վարչակազմի՝ Հայոց ցեղասպանության վերաբերյալ ունեցած մոտեցումների առնչությամբ։
Նա հայտարարել է, որ սա «ոչ խորամանկ մի պար է, որը մենք պարում ենք»։ «Մենք ունենք պետական վարչություն, որի պատմությունը լի է զեկույցներով, որտեղ նշվում է այն դաժանությունների մասին, որը կատարվել է այդ ժամանակահատվածում։ Մենք ունենք ստորագրված կոնվենցիա, որում այդ բոլոր գործողությունները սահմանվում են որպես ցեղասպանություն։ Ունենք նաեւ պատմական փաստեր, սակայն մենք չենք ցանկանում դրանք որակել որպես ցեղասպանություն։ Եթե մենք չենք կարող ընդունել անցյալը, ապա մենք չենք կարող առաջ շարժվել։ Ես կարծում եմ, որ շատ դժվար է ուղարկել Միացյալ Նահանգների դիվանագետներին մի երկիր, որտեղ ցեղասպանության զոհերի հիշատակին նվիրված վայր են այցելում, սակայն չեն օգտագործում ցեղասպանություն բառը»,–ասել է Մենենդեսը։
ԱՀՀ—ից տեղեկացնում են, որ Հեֆերնի թեկնածությունը կհետաձգվի մինչեւ հաջորդ՝ Սենատի արտաքին հարաբերությունների հանձնաժողովի հանդիպումը, որը, ըստ աղբյուրի, հավանական է՝ տեղի կունենա սեպտեմբերին։