Ադրբեջանական
համացանցային ագրեսիայի քայլերը սկսել են նվազել։ Երեկ լրագրողների հետ
հանդիպմանը նման տեսակետ է հայտնել ԵՊՀ հայագիտական հետազոտությունների
ինստիտուտի գիտական քարտուղար Մհեր Հովհաննիսյանը։ «Էլեկտրոնային
պատերազմում» մենք ադրբեջանցիներից ավելի առաջ ենք. այստեղ մենք տանուլ
չենք տվել, քանի որ պատերազմը դեռ շարունակվում է։ Եթե տարեկան փակվում է
չորսից հինգ ադրբեջանական կայք եւ բացվում է երկուսը, ապա հայկական որեւէ
կայք չի փակվել, ընդհակառակը, դինամիկ կերպով բացվում են»,–«Արմենպրեսի»
հաղորդմամբ՝ նկատել է Հովհաննիսյանը։ Նա նշեց, որ սփյուռքում եւս այդ
գործընթացը բավականին ակտիվ է, ընդ որում՝ հայագիտական բնույթի կայքերը
բացվում են ոչ հայերի կողմից։
Փորձագետը հայագիտական կայքերի
առկայությունը կարեւորում է, քանի որ թեմային անծանոթ մարդը, համացանցով
տեղեկանալով հակամարտության մասին, փորձում է ծանոթանալ նրա արմատներին եւ
գտնել այնպիսի ռեսուրս, որտեղ խնդիրը գիտական ձեւով է ներկայացված։ «Նմանատիպ
կայքեր ստեղծելը բավականին աշխատատար է։ Հայկական կողմը եւ հայագիտական
այլ կառույցներ իրենց տեսակետները ներկայացնում են բավականին լավ՝ փորձելով
բացթողումներ չանել»,–տեղեկացրել է Հովհաննիսյանը։ Նրա խոսքով՝
հայկական կողմը պետք է փորձի հասկանալ ադրբեջանցիների գիտական պոտենցիալը։
Նրանց առաջին քայլերից էր, որ Բաքվում բացվեց հայագիտական կենտրոն, որը
ապատեղեկատվություն է տարածում հայագիտության վերաբերյալ։ Այս աշխատանքները
նրանք փորձում են տարածել ոչ միայն հայկական, այլեւ ռուսական
ռեսուրսներով։
|