ՄԵԾԱՄՈՐ METSAMOR CITY Ուրբաթ, 29.03.2024, 11:59
Ողջույն Հյուր | RSS
Կայքի մենյու

Բաժնի անվանակարգերը
Հանրապետություն [614]
Կրթություն և գիտություն [38]
Մարզային [14]
Պաշտոնական [464]
Մշակույթ [15]
Հասարակություն [846]
Սպորտ [1]
Տեսակետ [49]
Տարածաշրջան [86]
Զանազան [192]
Քաղաքականություն [647]
Համայնք [38]

Մինի - չաթ
 
200

Վիճակագրություն

Ընդամենը առցանց: 1
Հյուրեր: 1
Հաճախորդներ 0

Գլխավոր էջ » 2018 » Սեպտեմբեր » 27 » Մենք մտադիր չենք զարգացնել մեր հարաբերությունները մեկ գործընկերոջ հետ՝ մյուսի հաշվին
09:46
Մենք մտադիր չենք զարգացնել մեր հարաբերությունները մեկ գործընկերոջ հետ՝ մյուսի հաշվին

Վարչապետ Նիկոլ Փաշինյանը Նյու Յորքում ՄԱԿ—ի կենտրոնակայանում Գլխավոր ասամբլեայի 73—րդ նստաշրջանին հանդես է եկել ելույթով, հայտնում են ՀՀ կառավարության տեղեկատվության եւ հասարակայնության հետ կապերի վարչությունից։ Այն ներկայացնում ենք ամբողջությամբ. «Գլխավոր ասամբլեայի հարգարժան նախագահ,
Ձերդ գերազանցություններ,
Տիկնայք եւ պարոնայք,
Նախ եւ առաջ ցանկանում եմ շնորհավորել տիկին Մարիա Ֆերնանդա Էսպինոսա Գարսեսին՝ Գլխավոր ասամբլեայի 73—րդ նստաշրջանի նախագահ ընտրվելու կապակցությամբ եւ մաղթել բոլորիս արդյունավետ քննարկումներ նրա նախագահության ներքո։
Տիկնայք եւ պարոնայք,
Պատիվ ունեմ ձեզ դիմել որպես մի առաջնորդ, ով վերջերս դարձել է Հայաստանի վարչապետ ժողովրդական հեղափոխության արդյունքում, որն այժմ առավել հայտնի է որպես «Հայկական թավշյա հեղափոխություն»։
Կցանկանայի հակիրճ անդրադառնալ ավտորիտար իշխանության նկատմամբ մեր տարած հաղթանակին։ Հայաստանի ժողովրդին հաջողվեց իրականացնել անկանխատեսելի եւ աննախադեպ հեղափոխություն՝ առանց բռնության, զոհերի կամ հասարակական անկարգությունների։
Եվ դա պատահական չէր։ Մեր նպատակը սիրո եւ համերաշխության հեղափոխություն կատարելն էր։ Ի սկզբանե մենք հայտարարեցինք, որ բացառելու ենք ցանկացած բռնություն։ Մենք հայտարարեցինք, որ եթե նույնիսկ բռնություն գործադրվեր մեր դեմ, մենք չէինք արձագանքի բռնությամբ։ Մենք հայտարարեցինք, որ մեր պատասխանը դրսեւորվելու էր վեր բարձրացրած բաց ձեռքերով, սիրով ու ժպիտով։
Մենք այս քաղաքական գործընթացն սկսեցինք ընդամենը մեկ տասնյակ մարդկանց հետ քայլարշավ կատարելով Հայաստանի երկրորդ քաղաքից՝ Գյումրիից դեպի մայրաքաղաք։ Երբ հասանք Երեւան եւ ցույց տվեցինք մեր վճռականությունն ու հավատարմությունը բռնություն չկիրառելու սկզբունքին, մեր ամբողջ ազգը միահամուռ եւ համերաշխ կերպով ոտքի կանգնեց ընդդեմ իշխող վարչակարգի։ Եվ մենք հաղթեցինք բացառապես խաղաղ ցույցերի միջոցով՝ առանց գեթ մեկ կրակոցի եւ առանց զոհերի։ Մենք հաջողեցինք՝ հակառակ բոլոր կանխատեսումների. նույնիսկ հայտնի փորձագետները թերահավատ էին մեր հաղթանակի նկատմամբ։
Այդուհանդերձ, ես ընտրվեցի վարչապետ։ Ես ընտրվեցի մի խորհրդարանում, որտեղ ունեի ընդամենը չորս վստահելի ձայն, այդ թվում՝ իմ սեփականը։ Սակայն դա հնարավոր եղավ։ Դա տեղի ունեցավ, քանի որ մարդիկ պահանջատեր էին, եւ ընդամենը մեկ տարի առաջ ընտրված խորհրդարանն անսաց ժողովրդի կամքին՝ չունենալով այլընտրանք։ Այսօր խորհրդարանը շարունակում է աշխատել, բայց այն չի ներկայացնում մեր ժողովրդի կամքը, ճիշտ այնպես՝ ինչպես նախկինում էր եւ հեղափոխության ժամանակ։ Ինչո՞ւ է այդպես։ Պատասխանը կարճ է՝ քանի որ այն ընտրվել է ընտրական գործընթացի կոպիտ խախտումներով, այդ թվում՝ վարչական ռեսուրսի եւ ճնշումների գործադրմամբ։
Իրապես ազատ, արդար եւ մրցակցային ընտրություններ անցկացնելու համար կարեւոր քննություն էին Երեւանի ավագանու ընտրությունները, որոնք տեղի ունեցան Նյու Յորք մեկնելուցս անմիջապես առաջ։ Այն, որ Հայաստանի անկախությունից ի վեր առաջին անգամ բոլոր թեկնածուները շնորհավորեցին հաղթող թեկնածուին, խոսում է Հայաստանում միանգամայն նոր քաղաքական մշակույթի հաստատման մասին։
Այդ նույն ոգով մենք պատրաստվում ենք արտահերթ խորհրդարանական ընտրությունների։ Ազատ, արդար եւ թափանցիկ ընտրությունները պետք է դառնան եւ կդառնան Հայաստանում անշրջելի իրականություն, որը կհանգեցնի ուժեղ ու կենսունակ ժողովրդավարական ինստիտուտների եւ հակակշիռների գործուն համակարգի կայացմանը։ Մեր քաղաքացիների իրավունքների պաշտպանությունը, խոսքի, խղճի եւ հավաքների ազատությունն ապահովելը մեր օրակարգի առանցքային կետերից մեկն է։ Այսուհետ ընտրական գործընթացը կեղծելու եւ քաղաքացիների վստահությունը չարաշահելու ու խարխլելու հնարավորություն չի լինի։
Ցանկանում եմ շեշտել, որ Հայաստանում ստեղծված իրավիճակը սոսկ կառավարության կամ իշխող կուսակցության փոփոխություն չէ։ Ստեղծվում է նոր քաղաքական եւ կառավարման համակարգ, որը մենք կոչում ենք ժողովրդի ուղղակի, անմիջական իշխանություն եւ կառավարում։ Այս համակարգն ինստիտուցիոնալ հիմքերի վրա դնելու համար մենք մտադիր ենք երաշխավորել ժողովրդի կամարտահայտությունը ոչ միայն ընտրությունների, այլեւ տեղական եւ ազգային հանրաքվեների միջոցով, որպեսզի մարդիկ ներգրավվեն որոշումների կայացման գործընթացում։ Ինքս լինելով նախկին քաղաքական բանտարկյալ՝ գիտեմ, թե որքան թանկ է խնդիրները բարձրաձայնելու եւ սեփական ապագան որոշելու հնարավորությունը։
Ստանձնելով պատասխանատվություն՝ մեր թիմն ունի հստակ տեսլական եւ հզոր քաղաքական կամք՝ իրականացնելու հիմնարար բարեփոխումներ՝ ուղղված կոռուպցիայի վերացմանը, թափանցիկ, հաշվետու եւ արդյունավետ կառավարմանը, մարդու իրավունքների եւ օրենքի գերակայության, դատական համակարգի անկախության ապահովմանը, ինչպես նաեւ խթանելու տնտեսական աճն ազատ եւ մրցակցային գործարար միջավայրի ու ներդրումների համար նպաստավոր մթնոլորտի միջոցով։
Պարոն նախագահ,
Չնայած ներքաղաքական կյանքում տեղի ունեցող արմատական փոփոխություններին, մեր արտաքին քաղաքականության օրակարգում չկան կտրուկ շրջադարձեր։ Հայաստանի արտաքին քաղաքականության շարունակականությունը վկայում է այն մասին, որ Հայաստանը կանխատեսելի եւ հուսալի գործընկեր է։ Մեր միջազգային պարտավորությունները ենթակա չեն վերանայման։ Մեր դիրքորոշումը հստակ է. Հայաստանը պատրաստ է կառուցողական երկխոսության եւ համագործակցության բոլոր գործընկերների հետ։ Մենք մտադիր չենք զարգացնել մեր հարաբերությունները մեկ գործընկերոջ հետ՝ մյուսի հաշվին։ Մենք կարեւորում ենք բազմակողմանիության դերը գլոբալ եւ տարածաշրջանային մակարդակներում։
Միավորված ազգերի կազմակերպության հովանու ներքո Հայաստանը ներգրավված է համապարփակ եւ կենսունակ համագործակցության ծրագրերում։ Թույլ տվեք առանց մանրամասնելու հիշատակել մեր մասնակցությունը ՄԱԿ—ի հովանու ներքո իրականացվող խաղաղության գործողություններին, որոնց աշխարհագրությունն ավելի քան տպավորիչ է՝ Աֆղանստանից Լիբանան, Կոսովո, Մալի եւ այլն։ Սա առանձնահատուկ նշանակություն ունի մեր երկրի համար, որն ինքն ունի անվտանգության հետ կապված լուրջ մտահոգություններ։ Մենք գիտակցում ենք, որ մեկ երկրի անվտանգությունը սերտորեն առնչվում է մյուս երկրների անվտանգության հետ, եւ որ գլոբալ խաղաղությունը պահանջում է համաձայնեցված գործողություններ։
Մենք իսկապես համաշխարհային ազգ ենք, հարյուրավոր աշխարհասփյուռ համայնքներով հանդերձ։ Այստեղից էլ բխում է Հայաստանի մտահոգությունը համամոլորակային սպառնալիքների առնչությամբ, որոնք կարող են վտանգի ենթարկել մեր հայրենակիցներին աշխարհի տարբեր անկյուններում։ Սիրիական ճգնաժամի պատճառով այսօր վտանգված է մեծաթիվ սիրիահայ համայնքի գոյությունն ընդհանրապես։ Հայաստանը փորձում է սատարել ճգնաժամային տարածաշրջաններին մարդասիրական օգնության միջոցով։ Մենք պատրաստ ենք ընդարձակել Հայաստանի մարդասիրական առաքելությունը՝ ուղղված Սիրիայի մեր համայնքի հրատապ կարիքների բավարարմանը։ Որպես ցեղասպանության սարսափներ վերապրած ազգ, հայերն առավել զգայուն են իրենց մերձավորների անվտանգության հարցում եւ պատրաստ են ամեն ինչ անել նրանց պաշտպանելու համար։
Պարոն նախագահ,
Լեռնային Ղարաբաղի հակամարտության խաղաղ կարգավորումը շարունակում է գերակշռել մեր արտաքին քաղաքական օրակարգում։ Արցախի Հանրապետության կարգավիճակը եւ անվտանգությունը լինելու է Հայաստանի Հանրապետության բացարձակ առաջնահերթությունը բանակցային գործընթացում։ Հակամարտությունը ռազմական ճանապարհով լուծելու ցանկացած փորձ ուղղակի սպառնալիք է տարածաշրջանային անվտանգության, ժողովրդավարության եւ մարդու իրավունքների համար։ Հայաստանը կշարունակի իր կառուցողական ներգրավվածությունը հակամարտության կարգավորման խաղաղ գործընթացում ԵԱՀԿ Մինսկի խմբի համանախագահների ձեւաչափով, որին էլ տրված է հակամարտության կարգավորման միջազգայնորեն ճանաչված միակ մանդատը։ Ադրբեջանը պետք է փոխի բանակցությունների հանդեպ իր անհարգալից վերաբերմունքը, պետք է լիովին հրաժարվի ցանկացած ռազմական լուծման գաղափարից եւ իրագործի բոլոր նախորդ համաձայնագրերը։
Ավելին, եթե Ադրբեջանն իսկապես հավատարիմ է խաղաղ գործընթացին, ապա պետք է սկսի երկխոսել այս հակամարտության հիմնական սուբյեկտի՝ Լեռնային Ղարաբաղի հետ։ Ադրբեջանն ամեն առիթով հայտարարում է, որ Ղարաբաղը պետք է լինի իր տարածքի մի մասը։ Միեւնույն ժամանակ հայտարարում է, որ չի բանակցելու Լեռնային Ղարաբաղի հետ։ Խնդիրն այն է, թե ինչպե՞ս կարող է Ադրբեջանը Լեռնային Ղարաբաղի նկատմամբ հավակնություն ներկայացնել առանց նույնիսկ ԼՂ—ի հետ երկխոսելու։ Դա հնարավո՞ր է։ Դա հնարավոր է, եթե միայն Ադրբեջանի ղեկավարությանը հետաքրքրում է ոչ թե ժողովուրդը, այլ բուն տարածքը։ Այսպիսով, ակնհայտ է դառնում, որ Ադրբեջանի ղեկավարության մտադրությունն այն է, որ Ղարաբաղը մաքրվի հայերից, ինչպես եղավ Նախիջեւանում։ Սա իրավունք է տալիս Լեռնային Ղարաբաղին ասել, որ Ադրբեջանի մաս կազմելը Ղարաբաղի բնակչության համար կնշանակի լիակատար բնաջնջում։ Հետեւաբար Ղարաբաղը չպետք է լինի Ադրբեջանի կազմում, եթե որեւէ մեկը չի ցանկանում թույլ տալ հայ ժողովրդի նոր ցեղասպանություն։
Ամփոփելով՝ թույլ տվեք վերահաստատել. հակամարտությունը կարող է եւ պետք է կարգավորվի միայն կողմերի փոխադարձ զիջումների միջոցով՝ խաղաղության եւ ոչ թե պատերազմի մթնոլորտում։
Եվ վերջում չափազանց կարեւոր եմ համարում իմ երախտագիտությունը հայտնել Միավորված ազգերի կազմակերպության գլխավոր քարտուղարին ԵԱՀԿ Մինսկի խմբի համանախագահության ջանքերի եւ մոտեցումների հանդեպ իր անվերապահ աջակցության համար։
Պարոն նախագահ,
Մեր խորհրդակցությունների թեման, այն է՝ «Միավորված ազգերի կազմակերպությունը բոլոր մարդկանց համար. գլոբալ առաջնորդություն եւ համընդհանուր պատասխանատվություն խաղաղ, արդար եւ կայուն հասարակությունների զարգացման համար», ենթադրում է հետեւողական մոտեցում Օրակարգ—2030—ին եւ կայուն զարգացման նպատակներին։ Միավորված ազգերի կազմակերպությունը եւ նրա զարգացման օրակարգը պետք է լինեն ներդաշնակ եւ մատչելի բոլորի համար։ Ոչ ոք չպետք է անտեսվի, ինչը ենթադրվում է մեր հավաքական ջանքերում։
Ավելի վաղ՝ այս տարվա հուլիսին, Բարձր մակարդակի քաղաքական ֆորումի ժամանակ Հայաստանը ներկայացրեց իր առաջին կամավոր ազգային զեկույցը կայուն զարգացման նպատակների իրականացման վերաբերյալ։ Այս կարեւոր իրադարձությունը համընկավ դարակազմիկ քաղաքական զարգացումների հետ, որոնք բնորոշվում են ակտիվ ժողովրդավարական գործընթացներով եւ լայնամասշտաբ բարեփոխումներով։
Հայաստանը հավատարիմ է գիտելիքահեն եւ նորարարական հարթակների արարման իր հանձնառությանը, որը կոչված է արագացնել զարգացման օրակարգի իրականացումը։ Այս առումով, մենք ընդունում ենք ՄԱԿ—ի եւ նրա մասնագիտացված գործակալությունների անփոխարինելի դերը, ինչպես նաեւ այլ գործընկերների հետ համագործակցության կարեւորությունը։ Որպես ECOSOC— ի նորընտիր անդամ եւ մարդու իրավունքների պաշտպանության խորհրդի անդամ, Հայաստանը կնպաստի ներառական եւ կայուն աճին, ինչպես նաեւ մարդու իրավունքների եւ հիմնարար ազատությունների պաշտպանությանը։
Տիկնայք եւ պարոնայք,
2018 թվականն այն տարին է, երբ կնշենք մարդու իրավունքներին առնչվող երկու կարեւորագույն փաստաթղթերի՝ Մարդու իրավունքների համընդհանուր հռչակագրի եւ Ցեղասպանության հանցագործության կանխարգելման եւ դատապարտման մասին կոնվենցիայի 70—ամյակը։ Այդ փաստաթղթերից յուրաքանչյուրն ունի իր սեփական պատմությունը, եւ նրանցից յուրաքանչյուրը դարձել է միջազգային իրավունքի զարգացման համար անկյունաքար։
Նրանք մեզ համար հիմք ծառայեցին ցեղասպանության հանցագործության դեմ գլոբալ համաժողովի նիստերի շարք նախաձեռնելու համար։ Այս տարի այն նվիրված կլինի կրթության, մշակույթի եւ թանգարանների միջոցով ցեղասպանության կանխարգելմանը։ Ակնկալում եմ ձեր ներդրումն ու գործուն մասնակցությունը Ֆորումի աշխատանքներին։
Տիկնայք եւ պարոնայք,
«Ապրել միասին»—ը Ֆրանկոֆոնիայի միջազգային կազմակերպության 17—րդ գագաթնաժողովի նշանաբանն է, որը տեղի կունենա հոկտեմբերին 2800—ամյա մայրաքաղաք Երեւանում։ Հայաստանի համար մեծ պատիվ ու պատասխանատվություն է՝ աշխարհասփյուռ ֆրանկոֆոն ընտանիքին իր անդամակցությունը, մշակույթի, կրթության եւ նորարարության բնագավառներում համագործակցության միջոցով հանդուրժողականության եւ փոխադարձ հարգանքի ջատագով լինելը։ Ես վերահաստատում եմ Ֆրանկոֆոնիայի գագաթնաժողովին մասնակցության մեր հրավերը, որը ենթադրում է միեւնույն համատեքստում նախատեսված բազմաթիվ միջոցառումների անցկացում։
Շնորհակալություն»։
Վարչապետ Փաշինյանը ՄԱԿ—ի կենտրոնակայանում մասնակցել է նաեւ «Խաղաղապահ գործողություններ» թեմայով բարձր մակարդակի քննարկումներին։

Կատեգորիա: Պաշտոնական | Դիտումներ: 309 | Ավելացրեց: Martos | - Վարկանիշ -: 0.0/0
Մեկնաբանություններն ընդամենը՝: 0
ComForm">
avatar
Մուտքի ձև

Որոնել

Օրացույց
«  Սեպտեմբեր 2018  »
ԵրկԵրկՉրկՀնգՈւրՇբԿր
     12
3456789
10111213141516
17181920212223
24252627282930

Սոց ցանցեր

Ժամանակահատված

Copyright Metsamorcity.do.am © 2024