«Շանթ–2018» ռազմավարական հրամանատարաշտաբային զորավարժությունների շրջանակում ՀՀ վարչապետ Նիկոլ Փաշինյանի գլխավորությամբ երեկ տեղի է ունեցել ՀՀ կառավարության պայմանական արտահերթ նիստը, հայտնում են ՀՀ կառավարության տեղեկատվության եւ հասարակայնության հետ կապերի վարչությունից։
Կառավարության անդամները վարչապետ Նիկոլ Փաշինյանին զեկուցել են իրենց համակարգման ոլորտներում, ըստ զորավարժությունների սցենարի, առկա իրավիճակի մասին եւ ներկայացրել որոշակի հարցերի լուծման ուղղությամբ տրված հանձնարարականների կատարման ընթացքը։
Երկրի վարչապետը կարեւորել է «Շանթ–2018» ռազմավարական հրամանատարաշտաբային զորավարժությունների արդյունավետ իրականացումը եւ սցենարային իրավիճակից բխող զեկույցները լսելուց հետո հանձնարարել շարունակել համակարգված եւ օպերատիվ աշխատանքները՝ պետական կառավարման համակարգի բնականոն եւ լիարժեք գործունեությունն ապահովելու համար։