Սեպտեմբերի 2—ին Արցախի ժողովուրդը Հայաստանի եւ սփյուռքի հետ կնշի ԼՂՀ հռչակման 26—րդ տարեդարձը։ Այդ կապակցությամբ ստեղծված է տոնակատարության միջոցառումների կազմակերպման եւ համակարգման կառավարական հանձնաժողով՝ ԱԺ նախագահ Աշոտ Ղուլյանի նախագահությամբ։
Ինչպես հայտնի դարձավ տոնական միջոցառումների ծրագրից, համալիրը բավական հագեցած է, բազմազան։ Ա. Ղուլյանի խոսքով, հանձնաժողովի նպատակն է տոնական տրամադրություն ստեղծել հանրապետության ողջ տարածքում, ուշագրավ ձեռնարկումներով արտաքին աշխարհին տեսանելի դարձնել այն ճանապարհը, որ անցել է ինքնիշխան Արցախի Հանրապետությունը՝ 1991 թվականից ի վեր։ Հանձնաժողովի անդամներին հանձնարարված է առավել մեծ պատասխանատվություն, նախաձեռնություն եւ անձնական ակտիվություն դրսեւորել։ Այս օրերին վերջին աշխատանքներն են իրականացվում մայրաքաղաքի եւ շրջկենտրոնների փողոցների ու հրապարակների, հուշահամալիրների, տեսարժան վայրերի բարեկարգման եւ կանաչապատման ուղղությամբ, պատասխանատուների կողմից ջանքեր են գործադրվում տոնական միջոցառումները պատշաճ մակարդակով կազմակերպելու համար։
Ըստ կառավարական հանձնաժողովի նախագահի, տոնակատարությունները կմեկնարկեն սեպտեմբերի 1—ին՝ Վարդենիս— Մարտակերտ ավտոմայրուղու հանդիսավոր բացման արարողությամբ։ Ուսումնական տարվա առաջին պարապմունքը դպրոցներում եւ մյուս կրթօջախներում, որ նվիրված է ԼՂՀ հռչակման տարեդարձին, վարելու են ԱԺ պատգամավորները, կառավարության անդամներ, պաշտպանության բանակի բարձրաստիճան սպաներն ու արցախյան պատերազմի վետերանները։ Անչափ հագեցած է լինելու մշակութային եւ մարզական միջոցառումների ծրագիրը։ Մայրաքաղաքում եւ շրջկենտրոններում կազմակերպելու են տարբեր մարզաձեւերի մրցումներ եւ ցուցադրական խաղեր, համերգներ, ցուցահանդեսներ։ Սեպտեմբերի 1—ին Շուշիի հիմնանորոգված մշակույթի պալատը հյուրընկալելու է արվեստի սիրահարներին։ Նրանց դատին կներկայացվի Ավետ Ստեփանյանի «Սասունցի Դավիթ» օպերայի բեմադրությունը։
ԼՂՀ հռչակման տարեդարձի օրը՝ սեպտեմբերի 2—ին, հայկական երկու հանրապետությունների կառավարական պատվիրակությունները կայցելեն Ստեփանակերտի հուշահամալիր եւ ծաղիկներ կխոնարհեն Մեծ հայրենականում ու արցախյան ազատամարտում նահատակված հայորդիների հիշատակին։ Նույն օրը բազմազան մշակութային միջոցառումներ են ծրագրվում ինչպես Ստեփանակերտում, այնպես էլ՝ բերդաքաղաք Շուշիում։
Տոնակատարությունները կեզրափակվեն մայրաքաղաքի «Վերածնունդ» հրապարակում կայանալիք համերգով, որին, ի դեպ, կմասնակցի նաեւ ամերիկացի հայտնի երգիչ Դանիել Բեքերը։ Տոն օրվա վերջին ակորդը կլինի ավանդական հրավառությունը։ hhpress.am

Դ. ՄԻՔԱՅԵԼՅԱՆ