Վարչապետ Հովիկ Աբրահամյանի գլխավորությամբ կառավարությունում երեկ շարունակվել են տեղական արտադրանքի արտահանման խթանման վերաբերյալ քննարկումները, հայտնում են ՀՀ կառավարության տեղեկատվության եւ հասարակայնության հետ կապերի վարչությունից։ Կառավարության ղեկավարին, մասնավորապես, ներկայացվել են մի շարք առաջարկություններ՝ ստեղծվելիք արտահանման խթանման խորհրդի գործունեության գերակա ուղղությունների, մեխանիզմների եւ գործիքակազմի վերաբերյալ։ Ծավալվել է մտքերի շահագրգիռ փոխանակություն, արծարծվել են խորհրդի աշխատակարգին եւ գործունեության առաջնահերթություններին վերաբերող հարցեր։ Վարչապետը, ամփոփելով քննարկումը, հորդորել է պատասխանատու գերատեսչությունների ղեկավարներին՝ համատեղել ջանքերը ոլորտում առաջընթաց արձանագրելու համար։ Հովիկ Աբրահամյանը հանձնարարել է ձեռք բերված պայմանավորվածությունների հիման վրա լրամշակել փաստաթուղթը եւ ներկայացնել ստորագրման։