«Ժառանգություն» կուսակցության առաջնորդ Րաֆֆի Հովհաննիսյանը երեկ Ազատության հրապարակում անցկացվող հանրահավաքի ժամանակ նախ խոսեց Երեւանի ավագանու ընտրություններին ներկայացված «Բարեւ, Երեւան» դաշինքի ընտրացուցակի մասին։
Այնուհետ ընթերցեց այն նամակը, որը խոստացել էր ուղարկել հանրապետության նախագահին։ Այն պարունակում է մի շարք առաջարկներ, որոնց իրականացմամբ, ինչպես նշված է տեքստում, «Ժառանգությունը» պատրաստ է Ձեզ հետ կես ճանապարհին հանդիպել, հաղթահարել համազգային հիմնախնդիրները, հանգուցալուծում տալ, փոխել մեր երկրի կարգը, մենաշնորհները, արտագաղթը»։
Հովհաննիսյանը նշված նամակով առաջարկում է նախագահական նոր ընտրությունների անցկացում կամ արտահերթ խորհրդարանական ընտրություններ 2013—ի ընթացքում, ընտրական օրենսդրությունում կատարել փոփոխություններ, թողնել բացառապես համամասնականը, ապահովել արտերկրում ապրող քաղաքացիների քվեարկությունը կամ նրանց հանել ցուցակներից։
Առաջարկվում է առնվազն հինգ մարզպետերի ազատել աշխատանքից եւ այդ պաշտոններում Րաֆֆի Հովհաննիսյանի ներկայացրած մարդկանց նշանակել։
«Ժառանգության» պահանջներից է նաեւ հետեւյալ ոլորտների ղեկավարներ նշանակել Րաֆֆի Հովհաննիսյանի ներկայացրած անձանց՝ ՀՀ գլխավոր դատախազություն, հարկային եւ մաքսային պետական ծառայություն, ԱԱԾ, արտգործնախարարություն, ԿԳ նախարարություն, վերահսկիչ պալատ, արդարադատության խորհուրդ, հակամենաշնորհային հանձնաժողով։ Առաջարկները ներկայացնելուց հետո Հովհաննիսյանն ընդգծեց, թե նշված դրույթները անբեկանելի են։
Հ. Հովհաննիսյանը տեղեկացրեց, որ հաջորդ հանրահավաքին հայտարարությամբ հանդես կգա եւ «ճանապարհային քարտեզ» կառաջադրի։
Հանրահավաքում ելույթ  ունեցավ նաեւ Րաֆֆի Հովհաննիսյանի հայրը՝ պատմաբան Ռիչարդ Հովհաննիսյանը, ով ասաց է, որ «մեր ազգը հանդարտության կարիք ունի»։ Նա երկխոսության կոչ արեց. «Հուսամ, երկխոսության, փոխզիջումի ճանապարհ կգտնվի»։
Նա հույս ունի, որ ժողովրդի չարչարանքը, Րաֆֆի Հովհաննիսյանի զոհողությունը իզուր չեն լինի։ «Մենք այս չարչարանքից հետո անպայման պետք է ունենանք հարություն»,–ասաց Ռ. Հովհաննիսյանը։
Ի դեպ, ի պատասխան NEWS.am—ի հարցի, թե, արդյոք, ստացե՞լ են «Ժառանգություն» կուսակցության առաջնորդ Րաֆֆի Հովհաննիսյանի նամակ—առաջարկությունը եւ պատասխանելո՞ւ են նրան, նախագահի մամուլի քարտուղար Արմեն Արզումանյանն ասել է. «Հայաստանի նախագահին հասցեագրված բոլոր նամակները պատշաճ կարգով ուսումնասիրվում եւ արձագանք են ստանում»։