Նախօրեի երեկոյան Իրանի եւ Իրաքի սահմանին տեղի է ունեցել 7.3 մագնիտուդ հզորությամբ երկրաշարժ։ Ստորգետնյա ցնցման ուժգնությունն էպիկենտրոնում կազմել է 9—10 բալ։ Երկրաշարժին հաջորդել է 4.5—5.0 մագնիտուդով չորս հետցնցում։ Երկրաշարժը զգացվել է ՀՀ հարավային եւ կենտրոնական հատվածում՝ 3 բալ ուժգնությամբ։
Եվրոպական—միջերկրածովյան սեյսմոլոգիական կենտրոնի տվյալներով՝ ստորգետնյա ցնցումների էպիկենտրոնը գտնվում էր Իրանի Սարպոլ Է Զահաբ քաղաքից 32 կմ հյուսիս եւ Իրաքի Սուլեյմանիա քաղաքից 100 կմ հարավ—արեւելք ընկած շրջանում։ Օջախը գտնվում էր 10 կմ խորության վրա։
Շուրջ 70 հազար իրանցիներ հզոր երկրաշարժից հետո մնացել են առանց օթեւանի եւ շտապ կարգով ժամանակավոր կացարանի կարիք ունեն։ Այդ մասին, ինչպես տեղեկացնում է «ՌԻԱ նովոստին» հայտնել է իրանական Կարմիր խաչի մի աղբյուր։
Իրանի նախագահ Հասան Ռոհունանին կարգադրել է անհրաժեշտ օգնություն ցուցաբերել տուժածներին։ Աղետի գոտի են ուղարկվել փրկարարների լրացուցիչ ստորաբաժանումներ, Կարմիր խաչի տեղի մասնաճյուղն այնտեղ ծավալել է որոնողական ու փրկարարական գործողություններ։
Երկրաշարժից տուժել է Դարբանդիհանի ամբարտակը, որը գտնվում է Տիգրիս գետի վտակի վրա, Սուլեյմանիայի նահանգում։ Հիդրոտեխնիկական կառույցին աննշան վնաս է պատճառվել, տեղի բնակիչների համար վտանգ չկա։
Առավել շատ զոհեր եւ ավերածություններ արձանագրվել են Իրանի Քերմանշահի եւ Իլամի նահանգներում։ Հենց այդ նահանգներին է բաժին ընկել երկրաշարժի հիմնական հարվածը։ «Mehr News»—ի տվյալներով՝ Քերմանշահի նահանգում մինչ այժմ չի գործում բջջային կապը, սակայն առավոտվա դեմ հաջողվել է մասնակիորեն վերականգնել էլեկտրաէներգիայի մատակարարումը եւ հեռախոսային կապը։
Մի շարք շրջաններում խմելու ջրի մատակարարման ընդհատումներ են սկսվել։ Քաղաքացիական պաշտպանության ուժերի ներկայացուցիչների տեղեկատվությամբ՝ նահանգում բացել են դաշտային հոսպիտալներ՝ նախատեսված 7 հազար մահճակալի համար։
Տեղական իշխանությունները հաղորդում են ծածկոցների, սննդամթերքի եւ փոխներարկման համար դոնորական արյան կարիքի մասին։ Սարփոլ է Զահաբ քաղաքում, որտեղ ամենից շատ են զոհերն ու ավերածությունները, հոսպիտալը չի կարողանում ընդունել տուժածներին, ուստի նրանց բանակային ուղղաթիռներով ուղարկում են այլ հիվանդանոցներ, այդ թվում՝ Թեհրան, հաղորդել է «ՏԱՍՍ»—ը։
Երեկ, օրվա վերջին իշխանությունները հայտնել են, որ Քերմանշահի նահանգում երկրաշարժի զոհերի թիվը հասել է 450—ի։ Հաղորդվում է նաեւ 7 հազար տուժածների մասին։
Ավերածություններ ու տուժածներ կան նաեւ Իրաքյան Քուրդիստանում։
Հայաստանի արտակարգ իրավիճակների նախարարությունը Հայաստանում Իրանի դեսպանատան եւ Իրանում Հայաստանի դեսպանատան միջոցով կապ է հաստատել Իրանի իշխանությունների հետ եւ պատրաստակամություն հայտնել օգնություն տրամադրելու աղետի հետեւանքների վերացման գործընթացում։ Անհրաժեշտության դեպքում մեր փրկարարները կմեկնեն Իրան։
Մենք խորապես վշտացած ենք կործանարար երկրաշարժի մասին լուրով, որը տեղի է ունեցել նոյեմբերի 12—ին Իրանի եւ Իրաքի սահմանին։ Այս մասին նշված է Հայաստանի ԱԳՆ «Twitter»—ի էջում։
«Մեր անկեղծ ցավակցությունն ենք հայտնում զոհվածների ընտանիքներին եւ 2 երկրների ժողովուրդներին։ Տուժածներին արագ ապաքինում ենք մաղթում»,–նշել են դեսպանատանը։
Նախնական տվյալներով՝ Իրանում եւ Իրաքում տեղի ունեցած երկրաշարժից տուժածների մեջ հայեր չկան, «Tert.am»—ին հայտնել է ՀՀ արտաքին գործերի նախարարության մամուլի խոսնակ Տիգրան Բալայանը։
«Առայժմ տեղեկատվությունը ճշտվում է։ Այդ շրջաններում հայեր չեն բնակվում»,–ասել է նա։
|