Մեկական վառված մոմ պատուհաններին ու ջահերով երթ Արմավիր քաղաքի հրապարակից ճանաչման եւ հատուցման պահանջատիրությամբ։ Ապրիլի 23—ի երեկոյան Արմավիրի քաղաքի երիտասարդները միասնաբար քաղաքի հրապարակից ջահերով երթ էին կազմակերպել դեպի քաղաքային զբոսայգի, եղեռնի զոհերի հուշակոթող, որտեղ էլ այրվել է թուրքական դրոշը, հետո մոմեր վառվել անմեղ զոհերի հոգիների հանգստության համար։ Իսկ երեկ առավոտյան Արմավիր քաղաքում ցեղասպանության զոհերի հիշատակին հարգանքի տուրք են մատուցել մարզային ու քաղաքային իշխանությունները, կազմակերպությունները, քաղաքացիները։ Ցեղասպանության զոհերի հիշատակին հոգեհանգստի կարգ կատարեցին Արմավիրի թեմի հոգեւորականները, որից հետո Արմավիր քաղաքի Ս. Սարգիս եկեղեցու հոգեւորական տեր Ստեփանոս քահանա Մելիքյանը հանրությանը ներկայացրեց ցեղասպանության 100—ամյակի տարելիցի միջոցառումներին ընդառաջ Ամենայն հայոց կաթողիկոս Գարեգին 2—րդ հայրապետի եւ Մեծի Տանն Կիլիկիո Արամ Ա կաթողիկոսի համատեղ կոչը՝ ուղղված Թուրքիայի իշխանություններին։
Զոհերի հիշատակին հարգանքի տուրք է մատուցվել Ս. Էջմիածնում, Մեծամորում, Արմավիրի մարզի համայնքներում։ hhpress.am