Հայաստանի կառավարությունը՝ ի դեմս ՀՀ տարածքային կառավարման նախարարության ջրային տնտեսության պետական կոմիտեի, միջազգային կազմակերպությունների ֆինանսական աջակցությամբ արմատական բարեփոխումներ է իրականացնում ջրային տնտեսության ոլորտում՝ այն համարելով երկրի սոցիալ— տնտեսական զարգացման գերակա ուղղություններից մեկը։ Իրականացված աշխատանքների արդյունքում դրական տեղաշարժեր են գրանցվել ջրամատակարար ընկերությունների սպասարկման ոլորտում գտնվող համայնքների ջրամատակարարման տեւողության ավելացման, անվտանգ եւ հուսալի ջրամատակարարման ապահովման ուղղությամբ։
Միեւնույն ժամանակ, Հայաստանի Հանրապետության գյուղական համայնքներից մոտ 560—ը գտնվում են ջրամատակարար ընկերությունների սպասարկման տարածքից դուրս։ Տասնյակ տարիների ընթացքում այդ բնակավայրերում ջրամատակարարման եւ ջրահեռացման համակարգերի բարելավմանն ուղղված որեւէ ներդրում չի կատարվել, ինչի արդյունքում դրանք հայտնվել են անմխիթար վիճակում։
Նշված համայնքների ջրամատակարարման եւ ջրահեռացման համակարգերի բարելավումը ՀՀ կառավարության կողմից ընդգրկվել է գերակա խնդիրների ցանկում եւ գերմանական KfW բանկի ծրագրերի շրջանակներում տրամադրվել է 500.000 եվրո դրամաշնորհ՝ այս բնակավայրերում առաջին անգամ լայնածավալ ուսումնասիրություններ իրականացնելու համար։ Ուսումնասիրությունների նպատակն է գտնել ջրամատակարարման եւ ջրահեռացման համակարգերի շահագործման եւ պահպանման ինստիտուցիոնալ լուծումները, հստակեցնել իրավական դաշտը, ինչպես նաեւ իրականացնել անհրաժեշտ ներդրումների գնահատումն ու առաջնահերթության սահմանումը։
Ուսումնասիրությունների արդյունքում մեկ տարի անց այս համայնքներում նախատեսվում է իրականացնել ջրամատակարարման եւ ջրահեռացման համակարգերի բարելավմանն ուղղված ներդրումային ծրագրեր։ hhpress.am

ՀՀ նախագահ, ՀՀԿ նախագահ Սերժ Սարգսյանը երեկ ընդունել է 2012թ. ՀՀ խորհրդարանական ընտրություններում Եվրոպայի խորհրդի խորհրդարանական վեհաժողովի (ԵԽ ԽՎ) նախընտրական դիտորդական առաքելության պատվիրակությանը՝ բարոնուհի Էմմա Նիքոլսոնի գլխավորությամբ։
Երկուստեք բարձր է գնահատվել Եվրոպայի խորհրդին անդամակցող Հայաստանի Հանրապետության համագործակցությունը ԵԽ կառույցների հետ եւ այդ կազմակերպության շրջանակներում Հայաստանի ակտիվ մասնակցությունը համաեվրոպական օրակարգի բազմաթիվ խնդիրների քննարկմանը։
Նախագահ Սերժ Սարգսյանը կարեւորել է ԵԽ դերը մարդու իրավունքների եւ ժողովրդավարության, օրենքի գերակայության արժեքների որդեգրման եւ զարգացման գործում, միաժամանակ նշելով, որ Հայաստանի մասնակցությունը ԵԽ—ին կարեւոր դեր ունի մեր երկրում բարեփոխումների իրականացման գործում։ Սերժ Սարգսյանը նշել է, որ Հայաստանում ամենատարբեր ոլորտներում արդեն իսկ բարեփոխումների ուղղությամբ զգալի աշխատանք է կատարվել, որը հնարավորություն կտա առաջիկայում անցկացնել ժողովրդավարական չափանիշներին համապատասխան ընտրություններ, իսկ դա, նախագահի համոզմամբ, իր հերթին, կխթանի երկրում ժողովրդավարության խորացումն ու ամրապնդումը։
ՀՀ նախագահ, ՀՀԿ նախագահ Սերժ Սարգսյանը եւ ԵԽ ԽՎ դիտորդական առաքելության պատվիրակության անդամները քննարկել են Հայաստանում առաջիկա խորհրդարանական ընտրությունների անցկացման եւ դրանց դիտարկման հետ կապված մի շարք հարցեր։