Հայաստանի գլխավոր դատախազությունը զգուշացնում է՝ ընտրախախտները կենթարկվեն պատասխանատվության եւ նշում, որ մեր իրավական համակարգն ունի վճռականություն, կամք, եւ ի զորու է պայքարել հնարավոր ընտրախախտումների դեմ։ Դատախազությունն իր կայքէջում տեղադրել է հանրային իրազեկման թվով երկու տեսահոլովակ, որոնց միջոցով քաղաքացիներին տեղեկացնում է իրենց ընտրական իրավունքների մասին՝ հիշեցնելով, որ ընտրական իրավունքի իրականացմանը խոչընդոտելը՝ կաշառք տալը, ընտրությունների արդյունքները կեղծելը, հանցագործություն է։
Ընտրական գործընթացում հնարավոր ընտրախախտումները կանխելու եւ դրանց օպերատիվ արձագանքելու նպատակով ՀՀ գլխավոր դատախազ Աղվան Հովսեփյանի հրամանով ձեւավորվել է աշխատանքային խումբ, որը հսկողություն կիրականացնի հաղորդումների ընդունման, գրանցման եւ քննարկման նկատմամբ։

Քաղաքագետների միության նախաձեռնությամբ ընտրություններին մասնակցող քաղաքական ուժերի մասնակցությամբ ընտրական գործընթացները վերահսկող միասնական շտաբ ստեղծելու հռչակագիրը ստորագրած երեք ուժերը՝ ԲՀԿ, ՀՅԴ, ՀԱԿ, պայմանավորվել են չեզոքացնել «Ժառանգությանը» (որը նույնպես ստորագրել է այդ հռչակագիրը)։ Այս մասին ասուլիսում ասել է «Ժառանգություն» կուսակցության փոխնախագահ Ռուբեն Հակոբյանը։ Նա նշել է, որ միասնական շտաբ ստեղծելու մասին ՀՅԴ—ի, ՀԱԿ—ի, ԲՀԿ—ի եւ «Ժառանգության» ներկայացուցիչների կողմից ստորագրած հռչակագրից հետո խոսակցություններ են տարածվում, թե «Ժառանգությունը» ստորագրել է, բայց հետո հրաժարվել ու ներկայացրել առաջարկներ եւ փորձում է ձախողել շտաբի ստեղծմանը։ «Որպեսզի այս շտաբը իմիտացիոն բնույթ չկրի, մենք առաջարկել ենք, որ հռչակագիրը ստորագրեն կուսակցությունների առաջին դեմքերը»,–ընդգծել է նա։
«Ազատ դեմոկրատներ» կուսակցության ներկայացուցիչ, «Ժառանգության» համամասնական ցուցակում ընդգրկված Ալեքսանդր Արզումանյանն ասաց, որ «Ժառանգությունը» հրապարակային դաշտում է գործում, ստվերային պայմանավորվածություններ չունի։