Գլխավոր էջ » 2014 » Մարտ » 19 » ՀՀ ԱԺ նախագահը Ժնեւում հանդիպել է Լատվիայի Սաեյմայի նախագահի հետ
16:26
ՀՀ ԱԺ նախագահը Ժնեւում հանդիպել է Լատվիայի Սաեյմայի նախագահի հետ
Երեկ աշխատանքները շարունակեց Միջխորհրդարանական միության 130—րդ վեհաժողովը, որին մասնակցում է ՀՀ ԱԺ պատվիրակությունը՝ ԱԺ նախագահ Հովիկ Աբրահամյանի գլխավորությամբ, հայտնում են ԱԺ հասարակայնության եւ տեղեկատվության միջոցների հետ կապերի վարչությունից։ Վեհաժողովը շարունակեց քննարկումները «Միջխորհրդարանական միության 125—ամյակը. մեր հանձնառությունը խաղաղությանն ու ժողովրդավարությանը» թեմայով։ Վեհաժողովի շրջանակներում ՀՀ ԱԺ նախագահ Հովիկ Աբրահամյանը հանդիպեց Լատվիայի Սաեյմայի նախագահ Սոլվիտա Աբոլտինայի հետ։ Հանդիպման ընթացքում զրուցակիցները քննարկեցին հայ—լատվիական խորհրդարանական հարաբերությունների խորացմանը, միջազգային խորհրդարանական կառույցներում փոխգործակցությանը, Եվրամիություն—Հայաստան համագործակցության զարգացմանն առնչվող հարցեր։ Փաստելով հայ—լատվիական համագործակցության ներկա բարձր մակարդակը՝ կողմերը շեշտեցին, որ անհրաժեշտ է առաջ շարժվել՝ օգտագործելով բոլոր հնարավորությունները եւ առկա մեծ ներուժը։ Երկուստեք կարեւորվեց միջխորհրդարանական կապերի հետագա ամրապնդումը, խորհրդարանական դիվանագիտության դերը միջպետական հարաբերություններում։ Հովիկ Աբրահամյանը գոհունակությամբ արձանագրեց, որ երկու բարեկամ երկրների միջեւ հարաբերությունները զարգանում եւ խորանում են, ինչին նպաստում են բարձր մակարդակի բազմաթիվ փոխայցելությունները։ Նրա խոսքով՝ վերջին շրջանում առավել ընդլայնվել է Հայաստանի եւ Լատվիայի միջեւ իրավապայմանագրային դաշտը, ինչը լավ նախադրյալներ է ստեղծում երկու երկրների միջեւ տարբեր բնագավառներում առավել ակտիվ համագործակցություն ծավալելու համար։ Կողմերն անդրադարձան տարածաշրջանային խնդիրներին, միջազգային վերջին զարգացումներին։ Կարեւորվեց բոլոր խնդիրների եւ հակամարտությունների կարգավորումը խաղաղ բանակցությունների ճանապարհով։ Անդրադառնալով Մաքսային միությանն անդամակցելու Հայաստանի որոշմանը՝ Հովիկ Աբրահամյանն ընդգծեց, որ այն չի խանգարում ԵՄ—ի հետ Հայաստանի հարաբերությունների հետագա զարգացմանը եւ խորացմանը։ Լատվիայի խորհրդարանի նախագահը նույնպես կարեւոր համարեց երկու երկրների խորհրդարանների համագործակցության զարգացումը՝ բարձր գնահատելով Հովիկ Աբրահամյանի պաշտոնական այցը Լատվիա հայ—լատվիական միջպետական եւ միջխորհրդարանական կապերի զարգացման եւ սերտացման առումով։ Տիկին Աբոլտինան կարեւոր համարեց Հայաստանի պատրաստակամությունը զարգացնելու եւ ամրապնդելու Եվրամիության հետ հարաբերությունները, մասնավորապես Արեւելյան գործընկերության շրջանակներում։ «Լատվիան պատրաստ է աջակցել Հայաստանի յուրաքանչյուր նախաձեռնությանը, որն ուղղված կլինի Եվրամիության հետ համագործակցության զարգացմանը»,–ընդգծեց Սոլվիտա Աբոլտինան։ Հանդիպման ժամանակ քննարկվեցին փոխադարձ հետաքրքրություն ներկայացնող այլ հարցեր եւս։
