«Հայկական մշակութային ժառանգության կոթողները ոչնչացվում են այն երկրներում, որտեղ հայերի դեմ իրականացվել է ցեղասպանություն»,–երեկ ասուլիսի ժամանակ կարծիք հայտնեց հայկական ճարտարապետությունն ուսումնասիրող հիմնադրամի ղեկավար Սամվել Կարապետյանը։
«Հայկական մշակութային ժառանգության կոթողների ոչնչացումը միտված է միջազգային հանրությունից թաքցնելու իրականացրած ցեղասպանությունը»,–ասաց նա, մատնանշելով հայկական հուշարձանների ոչնչացումը ոչ միայն Ադրբեջանի եւ Թուրքիայի, այլ նաեւ Վրաստանի տարածքում։ Միաժամանակ հուշարձանագետը նշեց, որ Թուրքիայում հայկական մշակութային ժառանգության ոչնչացումը տեղի է ունենում միմիայն պատմական Հայաստանի տարածքում, այլ ոչ թե Ստամբուլում կամ թուրքահայ այլ համայնքներում։
Բանախոսը շեշտեց, որ հարեւան երկրներից միայն Իրանն է, որ որդեգրել է մշակութապահպան կեցվածք։ «Այս երկիրը մեր նկատմամբ երբեք ցեղասպան գործունեություն չի իրականացրել եւ ոչինչ չի թաքցնում»,–ընդգծեց նա։ Սամվել Կարապետյանի խոսքով՝ Իրանի ամբողջ տարածքում հաշվառված է շուրջ 400 հայկական եկեղեցի, երեք վանական համալիր՝ Սուրբ Թադեոսը, Մաղարթան եւ Ծործորն ընդգրկված են ՅՈՒՆԵՍԿՕ—ի համաշխարհային ժառանգության ցանկում։