"2012թ.
ընտրությունների արժանահավատ, պատասխանատու եւ հավասարակշռված
լուսաբանում” թեմայով այսօր Կոնգրես հյուրանոցում ԶԼՄ-ների
ներկայացուցիչների համար երկօրյա սեմինար-քննարկում է կազմակերպվել
"Իրավունքի Եվրոպա” միավորում ՀԿ-ի, ԵԱՀԿ Երեւանի գրասենյակի, ԵՄ
պատվիրակության եւ ԱՄՆ դեսպանատան աջակցությամբ:
ԵԱՀԿ Երեւանի գրասենյակի ղեկավար Անդրեյ Սորոկինը բացման խոսքում նշեց,
որ ԶԼՄ-ների գործունեությունը քարոզարշավի ժամանակ շատ կարեւոր է ազատ եւ
արդար ընտրությունների իրականացման համար: "Զուտ իրավական համակարգը չի
երաշխավորել հավասարակշռված եւ արժանահավատ լուսաբանում”,-նշեց նա ու
հավելեց, որ խոսքի ազատության իրացումը պետք է զուգորդվի օբյեկտիվ
լուսաբանման հետ:
ՀՀ-ում ԵՄ պատվիրակության ղեկավար Տրայան Հրիսթեան եւս կարեւորեց
ընտրությունների լուսաբանումը քաղաքական կառույցների ու քաղաքացիների,
ինչպես նաեւ միջազգային հանրության համար: Նա շեշտեց մանրակրկիտ, ստուգված
եւ անկողմնակալ լուսաբանման անհրաժեշտությունը` ընտրությունների ընթացքում
հնարավոր բախումնային իրավիճակներում: ԱՄՆ դեսպանատան քաղաքական հարցերի
պատասխանատու Քրիստոֆեր Անդերսենը նշեց, որ մի շարք ծրագրերի իրականացման
միջոցով աջակցել են Հայաստանին ժողովրդավարության հաստատման համար:
Նրա խոսքով, ազատ եւ արդար ընտրությունների իրականացումը կարեւոր է
Հայաստանի համար այն իմաստով, որ վստահություն կայանա նաեւ երկրի ներսում:
Քրիստոֆեր Անդերսենը նաեւ նշեց, որ ազատ եւ արդար ընտրությունները ԱՄՆ
համար կարեւոր են այն իմաստով, որ ՀՀ –ն ամրապնդի իր դիրքերը միջազգային
հանրությունում: "Խոսքերը հեշտ է ասել, ժողովրդավարություն կայացնելը`
ավելի երկարատեւ ու բարդ գործընթաց է:
Աշխատանքները պետք է կատարվեն այնպես, որ հենց քվեարկության օրը կայանան
ազատ եւ արդար ընթրություններ` համապատասխանեն ոչ միայն տառին, այլեւ
ոգուն”,-նշեց նա եւ հավելեց, որ ԸՕ-ը չի կարող ապահովել ազատ
ընտրություններ առանց քաղաքական կամքի: Քրիստոֆեր Անդերսենը հավելեց, որ
միայն կառավարությունը չէ, որ պետք է ապահովի ազատ եւ արդար
ընտրություններ, դա նաեւ ԶԼՄ-ների եւ քաղաքացիական հասարակության խնդիրն
է` պահանջել հաշվետվողականություն կառավարությունից:
"Մենք այս գործում չեզոք ենք, երկիրն ու ժողովուրդը պետք է պահանջի հաշվետվողականություն իր սեփական կառավարությունից”: henaran.am