Ընդդիմադիրների գրոհած դպրոցը պատկանում է Հայ առաքելական եկեղեցուն և ենթարկվում է Դամասկոսի հայոց թեմին: Հայկական դպրոցը գտնվում է Համիդիա շրջանում, որը բնակեցված է մեծամասամբ քրիստոնյա արաբներով:
Ընդդիմադիր ուժերը, որոնք թալանել են հայկական եկեղեցին, դպրոցը վերածել են հիվանդանոցի և իրենց հանգստավայրի: Սիրիական բանակը զերծ է մնում տվյալ շրջանին հարվածելուց, քանի որ այնտեղ քաղաքացիական մեծ բնակչություն կա:
Ինչպես eMedia.am–ի հետ զրույցում նշել է Մայր Աթոռ Սուրբ Էջմիածնի տեղեկատվական համակարգի տնօրեն Տեր Վահրամ քահանա Մելիքյանը, Մայր Աթոռի տնօրինությունը կապ է հաստատել Դամասկոսի Հայոց թեմի առաջնորդ Արմաշ եպիսկոպոս Նալբանդյանի հետ, ով հաստատել է ընդդիմադիր ուժերի կողմից հայկական եկեղեցու ու դպրոցի շենքի գրավման մասին տեղեկությունը։
«Հայ համայնքի ու եկեղեցու կողմից այդ ուժերի հետ կապ է հաստատվել, որ վնաս չտրվի ո՛չ եկեղեցուն, ո՛չ դպրոցին։ Անհրաժեշտ փաստաթղթերը դպրոցից արդեն դուրս են բերվել, ու ներկայումս հայությունը միջնորդական ջանքեր է գործադրում, որ նպաստի խնդրի խաղաղ կարգավորմանը»,– ասել է Տեր Վահրամ քահանա Մելիքյանը։
Նա նաև նշել է, որ զոհեր ու վիրավորներ չկան, հաղորդում է emedia.am-ը։
