Հայաստանում ցորենի բերքահավաքի 72—73 տոկոսն արդեն կատարված է։ Այն մոտավորապես կազմում է 165—170 հազար տոննա բերք։ «Արմենպրեսի» հաղորդմամբ՝ օգոստոսի 23—ին լրագրողների հետ հանդիպմանը ՀՀ գյուղատնտեսության փոխնախարար Սամվել Գալստյանը նշել է, որ ընթացիկ տարում հացահատիկի բերքը, յուրաքանչյուր միավոր հեկտարում, նախորդ տարվա համեմատ ցածր կլինի, սակայն լրացուցիչ ցանքատարածությունների հաշվին համախառն ներքին արդյունքը կլրացվի։
Պտուղ—բանջարեղենի բարձր բերքատվության համար ընթացիկ տարում ստեղծվել են նպաստավոր պայմաններ։ Նախորդ տարվա 787 000 տոննա բանջարեղենի փոխարեն այս տարի կհավաքվի 840—845 հազար տոննա։ Այս տարի կաճեն նաեւ ծիրանի մթերման ծավալները. 2011—ին մթերված 40 հազար տոննայի փոխարեն 2012 թ. մթերվել է 70 հազար տոննա բերք, որից 12 հազարն արտահանվել է։ Կարտոֆիլի բերքի հետ եւս խնդիրներ չկան. այն բավարար քանակությամբ է։
Փոխնախարարի փոխանցմամբ՝ այս տարվա օգոստոսի 20—ի դրությամբ մթերվել է 235—240 հազար տոննա խաղող։ Հանրապետությունում առատ են նաեւ դեղձի պաշարները։