Նախագահը հանդիպել է հասարակության, իշխանությունների եւ հոգեւոր դասի ներկայացուցիչների հետ

ՀՀ նախագահ Սերժ Սարգսյանը երեկ նախագահի նստավայրում հանդիպում է ունեցել հասարակության տարբեր շերտերի ներկայացուցիչների՝ մշակույթի գործիչների, առողջապահության ոլորտի, զանգվածային լրատվության միջոցների ներկայացուցիչների, հասարակական, քաղաքական գործիչների, Հանրային խորհրդի անդամների, ինչպես նաեւ օրենսդիր եւ գործադիր մարմինների ներկայացուցիչների, ՀՀ օրենքով ստեղծված մշտապես գործող մարմինների ղեկավարների, Ամենայն հայոց կաթողիկոսի գլխավորությամբ հոգեւոր դասի ներկայացուցիչների հետ։ Հանրապետության նախագահը հանդես է եկել ելույթով։
«Վեհափառ տեր,
Հարգելի՛ գործընկերներ,
Երեկ վերջապես հանգուցալուծվեց ոստիկանության պարեկապահակային ծառայության գնդի վրա զինյալների խմբի կատարած հարձակման հետեւանքով ստեղծված իրավիճակը; Հանգուցալուծվեց բոլորիս համար, թերեւս, ամենաընդունելի ճանապարհով. ազգային անվտանգության ծառայությունը, ոստիկանությունը, պետական պահպանության ծառայությունը, ներքին զորքերն իրենց հետեւողական եւ համադրված գործողություններով ստիպեցին զինված խմբի անդամներին վայր դնել զենքը եւ հանձնվել իշխանություններին։ Անչափ գոհ եմ, որ մեզ հաջողվեց խուսափել նման իրավիճակների համար դասական համարվող լուծումից, որի իրականացման մանրակրկիտ ծրագիրն, իհարկե, նույնպես մշակված էր։
Ունեցանք երկու զոհ եւ բազմաթիվ վիրավորներ։ Իմ ցավակցությունն եմ հայտնում ոստիկանության զորքերի զինծառայող, ենթասպա Յուրի Տեփանոսյանի ընտանիքին, հարազատներին եւ բարեկամներին։ Մեր հիացմունքն ու հարգանքն ենք փոխանցում նաեւ ոստիկանության գնդապետ Արթուր Վանոյանի ընտանիքին՝ իրական նվիրյալի, ով անվարան անցավ արցախյան գոյամարտից մինչեւ ապրիլյան պատերազմ, բայց ընկավ հայրենակցի գնդակից հայրենիքի հանդեպ պարտքն անմնացորդ կատարելու պահին։ Փա՛ռք քեզ, հպարտ գնդապետ։
Ինչպես նշեցի, այս ժամանակահատվածում Հայաստանի Հանրապետության իշխանության մարմինները ձեռնարկեցին բոլոր հնարավոր միջոցները մարդկային կորուստներից խուսափելու համար։ Այդ առումով առաջին հերթին շնորհակալություն եմ հայտնում իրավապահ մարմինների ներկայացուցիչներին՝ իրենց աշխատանքի համար։ Սառնասրտությունը եւ մեծահոգությունը պրոֆեսիոնալիզմի եւ սեփական ուժի գիտակցման ցուցիչներն են։ Դուք դրանք լիովին ցույց տվեցիք։ Շնորհակալ եմ գրագետ աշխատանքի համար։
Շնորհակալ եմ Հիպոկրատին երդում տվածներին՝ մեր բժիշկներին ու բուժաշխատողներին, նրանց՝ հիացմունքի արժանի կեցվածքի համար, գլուխ եմ խոնարհում նրանց պրոֆեսիոնալիզմի, նրանց ոգու արիության առաջ։
Շնորհակալություն եմ հայտնում այս օրերին ողջախոհության խորհրդանիշ դարձած մեր գեներալին՝ Արցախի հերոս Վիտալի Բալասանյանին։
Հարգելի՛ գործընկերներ,
Անընդունելի իրավիճակն ավարտվել է, սակայն ամբողջական հանգուցալուծումը դեռեւս առջեւում է։ Առաջին հերթին պետք է իրականացվի մանրազնին հետաքննություն, համակողմանի եւ անաչառ քննություն, բաց դատավարություն։ Յուրաքանչյուր ոք պետք է պատասխան տա իր արարքների համար միայն ու միայն օրենքի առաջ։ Որեւէ այլ դրսեւորում չի լինելու, անձնական վրեժխնդրության բոլոր փորձերը կասեցվելու են օրենքի ուժով։ Հայաստանի Հանրապետությունում ծավալվող բոլոր գործընթացները տեղի են ունենալու բացառապես մեր պետության Սահմանադրության եւ օրենքների շրջանակներում։
Եկել է եզրակացություններ կատարելու ժամանակը։ Այս իրադարձությունների ամբողջական վերլուծությունը դեռ երկար ժամանակ կպահանջի։ Սակայն մի բան ակնհայտ է. ներհայաստանյան հասարակական եւ քաղաքական կյանքում անհրաժեշտ է արագացնել արմատական փոփոխությունների գործընթացը։ Առաջին հերթին իսպառ պետք է վերացնենք բռնությամբ հարցեր լուծելու աղետալի մտայնության գոյությունն իսկ։ Մենք այլեւս իրավունք չունենք հանդուրժելու զենքով հարցեր լուծելու որեւէ միտում անգամ. հաջորդը կարող է կործանարար լինել մեր երկրի համար։
Անցած երկու շաբաթը եւ այդ ընթացքում մեր ունեցած կորուստներն անթույլատրելի են՝ մարդկային, հասարակական, արժեքային կորուստներից սկսած մինչեւ այն հսկայական հարվածը, որ հասցվեց մեր տնտեսությանը։ Աշխարհի որեւէ երկիր նման բան իրեն թույլ տալու իրավունքը չունի։ Առավել եւս դրա իրավունքը չուներ Հայաստանը։
Այսուհետեւ եւս մենք որեւէ մեկին թույլ չենք տալու, որ պատանդ առնի մեր երկիրը։
Մենք որեւէ մեկին թույլ չենք տալու, որ քայքայի մեր պետության հիմքերը։
Զենքով եւ բռնությամբ Հայաստանում հարցեր չեն լուծվելու։
Երեւանը Բեյրութ կամ Հալեպ չէ։ Նախորդ դարաշրջանի՝ սառը պատերազմի տարիների լուծումները թող ոչ մեկը չփորձի Մերձավոր Արեւելքից ներմուծել Հայաստան։ Թող սա չհասկացողները ուսումնասիրեն Լիբանանի քաղաքացիական պատերազմի պատմությունը կամ այսօր դեռ ծավալվող՝ Սիրիայի քաղաքացիական պատերազմի հետեւանքները եւ իրենց եզրակացությունները կատարեն դրանցից։
Ես շնորհակալ եմ բոլոր այն քաղաքական գործիչներին, ովքեր իսկապես իրենց դրսեւորեցին որպես քաղաքական—պետական գործիչներ եւ, հասկանալով այս ամենը, առաջին իսկ օրվանից ձայն բարձրացրին տեղի ունեցողի անընդունելի լինելու մասին։ Նրանք, ի տարբերություն շատ քիչ կարճատեսների, լավ են հասկանում՝ որտեղ է ավարտվում քաղաքական մրցակցության սահմանը եւ սկսվում հայրենիքի անվտանգության հարթությունը։ Սուր իրավիճակները հաճախ լակմուսի դեր են կատարում՝ հասարակության եւ պատմության համար մատնացույց անելով հասուններին եւ տարանջատելով կարճատեսներին ու պատեհապաշտներին։
Ես շնորհակալ եմ մեր մշակույթի երեւելիներին, մեր հասարակական գործիչներին, մեր իրական մտավորականներին, ովքեր շատ լավ հասկացան, որ հրապարակավ դատապարտելով անընդունելին, սթափեցնող խոսք հասցնելով զինյալներին, իրականում նպաստում են խնդրի անարյուն լուծմանը, իրականում մատնանշում են այդ մարդկանց փրկության ճանապարհը։ Ափսոս, որ անհիմն ոգեւորողները, հստակ գիտակցելով, որ նպաստում են զինյալների կործանմանը, չկարողացան զսպել իրենց մեջ կուտակած մաղձը, լիուլի թափեցին այն՝ միայն թե քաոս լինի, միգուցե ալեկոծումները պատահաբար կեղտը մակերես հանեն։ Զզվելի է։
Փա՛ռք Աստծո, որ առողջ բանականությունը գերիշխում է մեր երկրում։
Հայաստանում գերիշխեց մեկ պարզ ճշմարտություն, որը, թվում էր, կասկածի առարկա չպետք է լիներ ի սկզբանե։ Եվ այդ ճշմարտությունը արժեքային դաշտում է, մեր աշխարհընկալման, մեր տեսակի, մեր ժառանգության մեջ է։ Ցանկացած ոք կարող է չսիրել իշխանություններին, կարող է չսիրել կառավարությանը, չսիրել նախագահին եւ կտրուկ դեմ լինել այն քաղաքականությանը, որն իրականացվում է, բայց չսիրելն ամենեւին հիմք չէ հերոսացնելու համար զենքով հարցեր լուծողին։ Իշխանությունները կգան ու կգնան, ահաբեկչության խրախուսումը քաղցկեղի պես կմնա ու կտարածվի, կոչնչացնի մեր ժողովրդի կողմից ստեղծած ամեն ինչ։ Սրանից սարսափել է պետք, սա հիմնովին արմատախիլ անել է պետք։ Տիկնա՛յք եւ պարոնա՛յք, սիրելի[երիտասարդներ, ահաբեկչությունը խրախուսելը մահացու մեղք է։ Որեւէ պատճառով, անգամ ամենահիմնավոր պատճառով, հեռո՛ւ մնացեք այդ սարսափից։ Ո՛չ ասեք ահաբեկչությանը եւ դրա ցանկացած դրսեւորմանը, որտեղ էլ որ այն տեղի ունենա։ Ո՛չ ասենք մեր երկրի, մեր ժողովրդի, մեր սերունդների եւ մեր հայրենիքի համար։ Ո՛չ ասենք այդ քաղցկեղին։ Հեռո՛ւ վանենք մեզնից։ Շատ հեռու։
Հարգելի՛ բարեկամներ,
Ես շնորհակալ եմ մեր լրագրողներին իրենց անմնացորդ աշխատանքի համար եւ անարյուն հանգուցալուծմանը նպաստելու համար։ Ես նաեւ ներողություն եմ խնդրում մեր լրագրողներից հուլիսի 29—ի՝ լույս 30—ի գիշերվա դեպքերի համար. սա մեր ամենաէական բացթողումն էր այս օրերի ընթացքում։ Բոլոր հետեւություններն, անշուշտ, արվելու են։ Ձեր ներողամտությունը հայցելով՝ միայն լրագրողներին, բայց ոչ իրավապահներին, խնդրում եմ մոռանալ այդ դեպքերի մասին, քանի որ իրոք վստահ եմ, որ այլեւս նման բան չի կրկնվելու, եւ նաեւ ուզում եմ, որ այդ դեպքերն այսուհետեւ անգամ ենթագիտակցական որեւէ ազդեցություն չունենան ձեր ազատ գործելաոճի վրա։
Հիմա հնչող քննադատության մասին։ Խոսքս, իհարկե, ընդգծված ահաբեկչական ձեռագրով գործող, իրենց մտադրությունները հայրենասիրական եւ սոցիալական արդարության կոչերի ներքո թաքցնող զինյալների մասին չէ, խոսքս մեր ժողովրդի մի հատվածի մտահոգությունների մասին է։ Այո՛, Հայաստանի իշխանությունները կատարյալ չեն։ Այո՛, Հայաստանում շատ թերի հարցեր եւ բարդ խնդիրներ կան։ Մեր նպատակը դրանց լուծումներն արագացնելն է։
Այս փուլում մեր նպատակը նաեւ ազգային համաձայնության իշխանություն ձեւավորելն է, որտեղ լուծումների իրականացումը կլինի լայն համաձայնության դաշտի պատասխանատվության ներքո։ Սահմանադրական բարեփոխումները հենց դրա մասին էին, հենց այդպիսի իշխանություն ձեւավորելու հիմքն է դրվել այդ բարեփոխումներով։ Ազգային համաձայնության կառավարությունն իրեն չգտած ինչ—որ մեկի՝ դեպի աթոռ սողոսկելու մասին չէ, այն քաղաքական պատասխանատվության հնարավորինս լայն տեղաբաշխման եւ կիսելու մասին է, ինչի ինստիտուցիոնալ ողջ հենքը մենք արդեն ապահովել ենք։ Վստահաբար պնդում եմ, որ ընդամենը ամիսներ անց մենք ունենալու ենք հենց այդպիսի կառավարություն, հենց այդպիսի իշխանություն։
Մենք այդ ճանապարհով ենք գնում, եւ այդ ճանապարհը քաղաքական ուժերի, քաղաքական գործիչների դերակատարման մասին է։ Կրկնում եմ՝ քաղաքական գործիչների, այլ ոչ թե զենքով ահաբեկչության գնացողների եւ նրանց սատարողների։ Փա՛ռք Աստծո, պետություն եւ երկիր կառուցելու արժեհամակարգը կիսող քաղաքական գործիչների պակաս, ինչպես տեսաք, մենք այսօր չունենք։ Այդպիսիք շատ են քաղաքական բոլոր հոսանքներում։ Եվ դա մեր երկրի հարստությունն է։
Եվս մի խնդրի անդրադառնամ, որի մասին բազմաթիվ անգամներ մենք խոսել ենք։ Խոսքս Ղարաբաղի հիմնահարցի եւ, այսպես ասած, «հողեր հանձնելու» մասին է։ Արդեն, թերեւս, անհաշվելի են մեր հստակ դիրքորոշման հրապարակային հնչեցումներն անձամբ իմ կողմից։ Կրկնում եմ՝ Լեռնային Ղարաբաղի խնդրի կարգավորման ճանապարհին միակողմանի զիջումներ չեն լինելու։ Բացառվում է։ Լեռնային Ղարաբաղը երբեք չի լինելու Ադրբեջանի կազմում։ Բացառվում է։ Մեկ անգամ եւս կրկնում եմ՝ բացառվում է։ Ես իմ ողջ գիտակցական կյանքը իրականում նվիրել եմ այս խնդրին։ Եվ իմ ժողովրդի համար ընդունելի տարբերակի հասնելու համար միշտ պատրաստ եմ եղել զոհաբերել ոչ միայն ցանկացած պաշտոն, այլեւ կյանքս։ Դա այդպես է եղել երեկ, այդպես է այսօր, այդպես է լինելու վաղը։
Հարգելի՛ գործընկերներ,
Ամփոփելով շեշտեմ՝ մենք, որպես պետություն, այս փորձությունից դուրս եկանք ավելի ուժեղացած։ Եվ մենք այսօր շատ ավելի նպատակադրված ենք երկրում դրական փոփոխությունների մեր օրակարգը բազմապատիկ արագությամբ առաջ տանելու համար։ Իսկ այդ մասին մենք շատ ավելի մանրամասն կխոսենք առաջիկայում։
Շնորհակալ եմ ուշադրության համար»,–ասել է Սերժ Սարգսյանը։