Վարչապետի թեկնածու Կարեն Կարապետյանի թեկնածության առաջիկա հաստատումից հետո Հայաստանում տնտեսական ոլորտում ինչ հնարավոր փոփոխություններ կարելի ակնկալել։ «Tert.am»—ի այս հարցին տնտեսագետ Վարդան Բոստանջյանը պատասխանել է. «Ներդրումները տնտեսական այնպիսի կատեգորիաներ են, որ ուզենք թե չուզենք, կհոսեն այնտեղ, որտեղ պիտի հոսեն։ Յուրաքանչյուր ներդրում, երկարաժամկետ կայուն շահ է հետապնդում։ Հայաստանն այդ առումով գրավիչ չի եղել, եւ ավելին, Հայաստանում ոչ միայն դրսի, այլ նաեւ ներսի գործարարներն էլ են վախենում ներդրումներ անել։ Հիմա Կարեն Կարապետյանն ունի վստահության բավականաչափ պաշար, ինքն ընդունելի է ինչպես Արեւմուտքի, այնպես էլ Ռուսաստանի համար, ինչպես նաեւ մեր հասարակության համար։ Ժամանակակից անձնավորություն է, կրթության մակարդակ ու ցենզ ունի եւ գործարար մթնոլորտում աշխատասեր է, կազմակերպող։ Այս բոլորի պարագայում, գումարած նաեւ թիմի առկայությունը, պետք է հուսալ, որ հենց առաջին հերթին ՀՀ—ում ներդրումային մթնոլորտը աստիճանաբար պետք է դառնա դրական»։
Հայաստանի գործատուների հանրապետական միության նախագահ Գագիկ Մակարյանը ընդհանրապես հաջողակ վարչապետ լինելու երեք նախապայման է տեսնում. իրավիճակը ճիշտ վերլուծելու, գնահատելու եւ առկա տեղեկատվությունը ճիշտ օգտագործելու կարողությունը։
Ինչ վերաբերում է հարցին, թե վարչապետի թեկնածու առաջադրված Կարեն Կարապետյանը բավարարո՞ւմ է այդ նախապայմաններին, նա նշել է. «Կարծում եմ, որ նա երեք չափանիշներով էլ կարող է ուժեղ հանդես գալ՝ ինֆորմացիայի պակաս չունի, ինքը աշխատել է բիզնեսի հետ, շփվել է եւ ինֆորմացիայի օգտագործման ու հայթայթման առումով, կարծում եմ, ճկուն է։ Մենեջմենթի առումով՝ ինքն ունի լավ մենեջերական հատկանիշներ, բնավորությամբ էլ պետք է կարողանա այդ խստությունը պահել, ելնելով իրավիճակներից՝ փորձի ճկուն լինել։ Ինքը պետք է լինի սկզբունքային իր լիազորություններն օգտագործելու համար, հակառակ դեպքում նա կլինի միշտ խոցելի»։
Վարչապետի թեկնածու Կարեն Կարապետյանը ունակ է պայքարելու ստվերի, կոռուպցիայի, հովանավորչության ու մենաշնորհների դեմ, «NEWS.am»—ի հետ զրույցում կարծիք է հայտնել ԱԺ ՀՀԿ խմբակցության անդամ Սամվել Նիկոյանը։
«Կարեն Կարապետյանը մարդ տեսակով ունակ է այդ ուղղությամբ քայլեր կատարելու։ Տիրապետում է ամբողջովին հայաստանյան իրավիճակին, նրանք, ովքեր ասում են՝ հինգ տարի դրսում է եղել, ես նրանց ասում եմ՝ նա ամբողջովին տիրապետում է խնդիրներին ու լավ գիտի մեր տնտեսության վիճակն ու առաջնահերթությունները»,—ասել է նա։