Առաջիկա երեք օրվա ընթացքում Երեւանում Արեւելյան Եվրոպայի 25 երկրների ներկայացուցիչներ կքննարկեն քիմիական զենքի կոնվենցիայի իրականացման գործընթացներն ու ընթացակարգերը։ Մասնակիցները կքննարկեն, թե ի՞նչ խնդիրներ կան քիմիական զենքի առնչությամբ տարբեր երկրներում եւ ինչպե՞ս համատեղ հաղթահարել դրանք՝ ստեղծելով նեղ տարածաշրջանային համագործակցություն։ Թեպետ մեր տարածաշրջանում այդպիսի խնդիրներ չկան, սակայն քիմիական զենքի կոնվենցիան իրականացնում է նաեւ մեկ այլ գործառույթ եւ վերահսկում է երկակի նշանակության տարրերի շրջանառություն։ Կոնվենցիան սահմանում է քիմիական տարրերի որոշակի քանակություն, եւ յուրաքանչյուր երկիր ներկայացնում է հաշվետվություն, թե քիմիական նյութերի ինչ քանակ է գնվել։ Այդ առումով Երեւանում կարեւորում են այդ քննարկումն ու կոնվենցիայի դրույթների պահպանումը։ «Հայաստանում երկակի տարրերի հետ կապված խնդիրներ չկան, սակայն հաշվի առնելով տարածաշրջանային խնդիրները, առկա է ժամկետանց սպառազինության եւ ռազմամթերքի խնդիր, եւ դրանից ազատվելու անհրաժեշտություն է զգացվում»,— «Արմենպրեսի» հետ զրույցում ասաց քիմիական զենքի կոնվենցիայի իրականացման ՀՀ ազգային մարմնի նախագահ Սամվել Մկրտչյանը՝ հավելելով, որ եռօրյա հանդիպման նպատակն է քննարկել առկա բոլոր խնդիրներն ու գտնել լուծումներ, որը պետք է ամրագրվի համաձայնագրով։
Սա քիմիական զենքի կոնվենցիայի Արեւելյան Եվրոպայի երկրների ազգային մարմինների ներկայացուցիչների 13—րդ տարածաշրջանային հանդիպումն է, որը կազմակերպել է ՀՀ ԱԳ նախարարության, քիմիական զենքի կոնվենցիայի իրականացման ՀՀ ազգային մարմինն ու քիմիական զենքի արգելման կազմակերպության քարտուղարությունը։ Քիմիական զենքի կոնվենցիան միջազգային եզակի պայմանագրերից է, որը նպատակ ունի զանգվածային ոչնչացման տեսակներից մեկը՝ քիմիական զենքը, ոչ միայն արգելել, այլեւ գործընթաց իրականացնել եղած պաշարների ոչնչացման համար։