Նախագահ Սերժ Սարգսյանը երեկ ընդունել է Ամերիկայի Միացյալ Նահանգների պետքարտուղարի Եվրոպայի եւ Եվրասիայի հարցերով փոխտեղակալ Բրիջիթ Բրինքին, հայտնում են ՀՀ նախագահի մամլո գրասենյակից։
Հանրապետության նախագահը ողջունել է հյուրին եւ կարեւորել նման այցերի պարբերականությունը, որոնք, նախագահի համոզմամբ, դրական են անդրադառնում տարբեր ոլորտներում երկկողմ միջպետական հարաբերությունների զարգացման վրա։ Նկատի առնելով, որ տիկին Բրինքի Հայաստան այցի օրակարգում է նաեւ տնտեսական հարցերով հայ—ամերիկյան միջկառավարական հանձնաժողովի ընթացիկ գործունեությունը, Սերժ Սարգսյանը նշել է, որ հայկական կողմը նախապատրաստվում է աշնանը Վաշինգտոնում կայանալիք հանձնաժողովի հերթական նիստին։
Նախագահը բարձր է գնահատել ՀՀ տնտեսական զարգացմանը, տարբեր ոլորտներում բարեփոխումներին, ժողովրդավարության եւ քաղաքացիական հասարակության կայացմանը տարիներ շարունակ ցուցաբերված ԱՄՆ աջակցությունն ու տարածաշրջանում կայունության ապահովման ուղղությամբ Միացյալ Նահանգների կառավարության շարունակական ջանքերը եւ շնորհակալություն հայտնել ԱՄՆ կառավարությանը։
Բրիջիթ Բրինքը ներկայացրել է Հայաստան իր այցի շրջանակներում պետական պաշտոնյաների, երիտասարդ ձեռնարկատերերի, քաղաքացիական հասարակության, խորհրդարանականների հետ ունեցած հանդիպումներից տպավորությունները, ինչպես նաեւ միջկառավարական հանձնաժողովի հաջորդ նիստի պատշաճ նախապատրաստության նպատակով իրականացվող աշխատանքները։ Նշելով, որ նա թեեւ Հայաստան է ժամանել առավելապես տնտեսական համագործակցության հարցերի վրա իր ուշադրությունը կենտրոնացնելու նպատակով, տիկին Բրինքը համոզվածություն է հայտնել, որ տարածաշրջանի կայունությունն ու անվտանգությունը, այդ թվում՝ ԼՂ հիմնախնդրի կարգավորումը զգալիորեն կնպաստեն տնտեսության զարգացմանը եւ տարածաշրջանի բարօրությանը։ Այդ համատեքստում նա ՀՀ նախագահից հետաքրքրվել է վերջերս Սանկտ Պետերբուրգում ԼՂ հիմնախնդրի հարցով կայացած հանդիպման արդյունքներով եւ հակամարտության կարգավորման գործընթացում հնարավոր առաջընթացի հեռանկարի վերաբերյալ նախագահ Սերժ Սարգսյանի տեսակետով։ Հանրապետության նախագահը հյուրին հանգամանորեն ներկայացրել է բանակցային գործընթացի վերջին զարգացումները։
Հանդիպմանը զրուցակիցներն անդրադարձել են նաեւ Հայաստանում իրականացվող բարեփոխումներին, Հայաստան—Եվրամիություն համագործակցության զարգացման ուղղությամբ իրագործվող քայլերին եւ փոխադարձ հետաքրքրություն ներկայացնող այլ հարցերին։

Բարձրաստիճան հյուրին ընդունել են նաեւ ՀՀ փոխվարչապետ Վաչե Գաբրիելյանը եւ ՀՀ ԱԳ նախարար Էդվարդ Նալբանդյանը։