Բրազիլական Ռիո դե Ժանեյրոն արդեն չորս տարի շարունակ երազանքի քաղաք է բազմահազար մարզիկների ու միլիոնավոր մարզասերների համար, ովքեր ցանկանում են մասնակցել սպորտի ու խաղաղության՝ քառամյակի գլխավոր տոնին։
Ավանդույթի համաձայն՝ օլիմպիական խաղերի ընթացքում ամբողջ աշխարհում պետք է տիրեն խաղաղությունն ու համերաշխությունը, մարդասիրությունն ու գթասրտությունը, դադարեցվեն պատերազմները։ Ցավոք, 21—րդ դարը հետզհետե հեռանում է հաստատված ավանդույթներից։ Աշխարհի տարբեր անկյուններում գլուխ բարձրացրած հակամարտությունները որեւէ կերպ օլիմպիական սկզբունքներին ներդաշնակելու նշաններ ցույց չեն տալիս։
Բացառություն չէ նաեւ մեր տարածաշրջանը։ Երբ անցյալ տարի Բաքվում եվրոպական խաղեր էին անցկացվում, սահմանին անդորր էր, որովհետեւ մեր երկիրն ու Արցախը հասկանում են խաղաղության արժեքն ու քաղաքակրթական իմաստը։ Հիմա վիճակն այլ է, եւ միանգամայն ակնհայտ է՝ ում պատճառով։
Հունական Օլիմպիա ավանում՝ Հերայի նշանավոր տաճարում երեկ կայացավ օգոստոսին մեկնարկելիք 31—րդ ամառային օլիմպիական խաղերի ջահը վառելու պաշտոնական արարողությունը։ Հուսանք, որ այնուամենայնիվ օլիմպիական տարում օլիմպիական ջահի լույսը ինչ—որ հրաշքով կլուսավորի այն ղեկավարների մթագնած ուղեղը, որոնք երկիր ասելով հասկանում են միայն իրենց ընտանիքը եւ հանուն որի պատրաստ են զոհել մյուսներին։
|