«Իմ քայլը» դաշինքն Ազգային ժողովի դեկտեմբերի 9—ին կայացած արտահերթ ընտրությունների արդյունքում կստանա պատգամավորի 88 մանդատ, «Բարգավաճ Հայաստան» կուսակցությունը՝ 26, եւ «Լուսավոր Հայաստան» կուսակցությունը՝ 18 մանդատ։ «Իմ քայլի» չորս մանդատը կստանա Հայաստանի եզդի, ռուս, ասորի եւ քուրդ ազգային փոքրամասնությունների 1—ական ներկայացուցիչ։ 
Համապատասխան որոշումը հաստատվել է ՀՀ կենտրոնական ընտրական հանձնաժողովի դեկտեմբերի 16—ի նիստում։ Ընդ որում, «Իմ քայլի» 42—ական պատգամավոր ընտրվել են համապետական եւ տարածքային ընտրական ցուցակներով, ԲՀԿ—ի դեպքում՝ 13—ական, եւ ԼՀԿ—ի դեպքում՝ 9—ական։
ՀՀ ԿԸՀ պաշտոնական կայքից տեղեկացրել են, որ մեկ այլ որոշմամբ հանձնաժողովը որոշում է ընդունել վերոնշյալ ընտրությունների արդյունքների վերաբերյալ՝ նշելով, որ «Հայաստանի Հանրապետության Ազգային ժողովի 2018 թվականի դեկտեմբերի 9—ին կայացած արտահերթ ընտրությունների նախապատրաստման եւ քվեարկության ընթացքում տեղի չեն ունեցել Հայաստանի Հանրապետության ընտրական օրենսգրքի այնպիսի խախտումներ, որոնք կարող էին ազդել ընտրության արդյունքի վրա»։
Բողոքարկման ժամկետը մինչեւ դեկտեմբերի 21—ն է։

***
Նախագահ Արմեն Սարգսյանը շնոհավորական ուղերձ է հղել վարչապետի պաշտոնակատար Նիկոլ Փաշինյանին՝ Ազգային ժողովի ընտրություններում նրա գլխավորած «Իմ քայլը» դաշինքի տարած հաղթանակի առթիվ, հայտնում են ՀՀ նախագահի մամլո գրասենյակից։ Հանրապետության նախագահը շնոհավորել է նաեւ «Բարգավաճ Հայաստան» կուսակցության նախագահ Գագիկ Ծառուկյանին եւ «Լուսավոր Հայաստան» կուսակցության նախագահ Էդմոն Մարուքյանին խորհրդարանական ընտրություններում արձանագրած հաջողության համար։
Նախագահ Արմեն Սարգսյանը համոզմունք է հայտնել, որ այսուհետ եւս նրանց գործունեությունը եւ ծրագրերը կբխեն Հայաստանի եւ Արցախի հանրապետությունների, Հայաստանի Հանրապետության բոլոր քաղաքացիների եւ համայն հայության շահերից։