Նախագահ Սերժ Սարգսյանը երեկ ընդունել է Արժույթի միջազգային հիմնադրամի (ԱՄՀ) հայաստանյան առաքելության ղեկավար Մարկ Հորթոնին։
Ողջունելով հյուրին Հայաստանում՝ հանրապետության նախագահը բարձր է գնահատել ԱՄՀ հետ իրականացվող ծրագրերն ու համագործակցությունը եւ շնորհակալություն է հայտնել հիմնադրամի կողմից Հայաստանին ցուցաբերվող աջակցության համար։ Նախագահը հույս է հայտնել, որ ՀՀ կառավարության եւ Կենտրոնական բանկի ներկայացուցիչների հետ համակողմանի քննարկումներից հետո ԱՄՀ ներկայիս առաքելությունն արդյունավետ կլինի, մասնավորապես, մեր տնտեսության վրա արտաքին հատվածի բացասական հետեւանքների գնահատման, դրանց հաղթահարման եւ կայուն տնտեսական աճի խթանման ուղղությամբ լուծումներ գտնելու առումով։
Զրուցակիցներն անդրադարձել են հիմնադրամի առաքելության շրջանակներում եւ ՀՀ կառավարության ու կենտրոնական բանկի հետ աշխատանքի ընթացքում վերջին տարիներին արձանագրված ձեռքբերումներին, դեռեւս առկա խնդիրներին, դրանց լուծման ուղիներին եւ մեր երկրի հետագա առաջընթացի հետ կապված ԱՄՀ գնահատականներին ու խորհուրդներին։