ԱՄՆ նախագահ Բարակ Օբաման հայտարարել է, որ Աֆղանստանում ամերիկացի զինվորի կողմից 16 խաղաղ բնակիչի սպանությունից հետո ԱՄՆ չի շտապելու ամերիկյան զորամիավորումներն Աֆղանստանից դուրս բերելու հարցում: Սպիտակ տան ղեկավարի խոսքով, միջազգային զորամիավորումները պետք է դուրս բերվեն պատասխանատու ժամկետներում:

 Սպանության հետեւանքով արդեն լարվել են հարաբերություններն Աֆղանստանի եւ ամերիկյան զորամիավորումների միջեւ:

 Նշենք, որ նախապես որոշված ժամկետների համաձայն, ամերիկյան զորամիավորումները պետք է դուրս բերվեն Աֆղանստանից 2014-ին:

 Քանդահար նահանգի գյուղերից մեկում խաղաղ բնակիչների ուղղությամբ կրակ բացած զինվորականը կարող է ցմահ ազատազրկման դատապարտվել: Այս մասին հայտնել է ԱՄՆ պաշտպանության նախարար Լեոն Պանետան:

 Երեկ ավելի քան 600 ուսանող ցույցի է դուրս եկել՝ արեւելյան Ջալալաբադ քաղաքում: Նրանք դատապարտել են կատարվածը եւ "Մա՛հ Ամերիկային, մա՛հ Օբամային" եւ այլ հակաամերիկյան կոչեր վանկարկել: Ցույցեր են անցկացվում նաեւ Քանդահարում: yerkirmedia.am