Վերջին ամիսներին արեւմտյան լրատվամիջոցները պարբերաբար անդրադառնում են
այս թեմային եւ քննարկում, թե որքանով է նպատակահարմար եվրոպական մրցույթի
անցկացումը բռնապետական քաղաքականություն որդեգրած երկրում։
«Նոր կասկածներ են ի հայտ գալիս մրցույթը հյուրընկալելու՝ Ադրբեջանի
կարողության վերաբերյալ», - գրում է այսօր բրիտանական «Ինդեփենդենթը» եւ
նշում, որ մրցույթից ընդամենը երկու ամիս առաջ իշխանությունները տեղի
երաժիշտներին բռնության են ենթարկել ու ազատազրկել՝ նախագահ Ալիեւին
քննադատելու համար։
Դեպքը տեղի է ունեցել անցած շաբաթ օրը, Բաքվում ընդդիմության կազմակերպած
հանրահավաքի ժամանակ երկու երիտասարդ ադրբեջանցի երաժիշտներ քննադատել են
Ալիեւին ու նրա ընտանիքի անդամներին, ինչից հետո դատարանը նրանց տասնօրյա
կալանքի է դատապարտել՝ խուլիգանություն կատարելու համար։ Ավելի ուշ
երաժիշտները ասել են, որ ազատազրկումից բացի ոստիկանները նաեւ ծեծել են
իրենց ու զրկել հարազատների ու փաստաբանների հետ տեսակցելու իրավունքից։
«Զավեշտալի է, որ «Եվրատեսիլ»-ը հյուրընկալելուց ամիսներ առաջ Ադրբեջանի
իշխանությունը ուժ է գործադրում՝ երաժիշտներին լռեցնելու ու ազատազրկելու
համար», - այս առթիվ հայտարարել է միջազգային «Ամնեսթի» իրավապաշտպան
կազմակերպությունը եւ կոչ արել անկախ հետաքննություն իրականացնել միջադեպի
վերաբերյալ։
«Ադրբեջանն այս մրցույթը ընկալում է որպես իր տնտեսական աճն ի ցույց դնելու
հնարավորություն եւ միլիոնններ է ներդնում, որպեսզի ամեն ինչ հարթ ու
սահուն անցնի», - փաստում է բրիտանական պարբերականն ու ընդգծում, որ դրան
հակառակ հետզհետե նոր ու մտահոգիչ փաստեր են ի հայտ գալիս ընդդիմախոսների
նկատմամբ Ալիեւի վարչակազմի կիրառած բռնությունների վերաբերյալ։
«Այդ շարքում երաժիշտների հետ կապված միջադեպը վերջիններից մեկն է միայն:
Ավելի վաղ այս ամիս համացանցում տարածվել էր «Ազատություն» ռադիոկայանի
թղթակից Խադիջա Իսմայիլովայի ինտիմ կյանքի մասին պատմող տեսանյութը», -
գրում է «Ինդեփենդեթ»-ը եւ հիշեցնում, որ լրագրողը հայտնի է հենց Ալիեւի եւ
մերձավոր շրջապատի կաշառակերության մասին հաղորդումներով։
Թեմային անդրադարձել է նաեւ «Բիբիսի»-ն, որն, ի դեպ, հաղորդումը սկսել է «Ազատություն» ռադիոկայանի թղթակցի հետ զրույցով:
«Վստահ եմ՝ տեսախցիկը տեղադրել ու տեսանյութը տարածել են կառավարության
ներկայացուցչները», - ասել է Իսմայիլովան եւ զգուշացրել, որ «կագեբեական
մեթոդներով» լրտեսության զոհ կարող են դառնալ նաեւ «Եվրատեսիլ»-ի
օտարերկրյա հյուրերը։
«Բիբիսի»-ն փաստում է, որ սա առաջին դեպքը չէ, երբ Ադրբեջանում մարդկանց
ինտիմ կյանքի մասին պատմող տեսանյութերը օգտագործվում են որպես գործիք՝
ընդդիմախոսներին լռեցնելու համար:
«Մենք հույս ունեինք, որ «Եվրատեսիլ»-ի հետ կապված պատրաստություններն ու
միջազգային հանրության ուշադրությունը կընդարձակեր ազատությունները
Ադրբեջանում, սակայն իրականում իշխանությունները ավելի մեծ ուժով են
ճնշումներ գործադրում», - «Բիբիսի»-ին ասել է միջազգային «Արթիկլ 19»
կազմակերպության ներկայացուցիչը։
|