Նախագահ Սերժ Սարգսյանը հուլիսի 11–ին ընդունել է ԱՊՀ երկրների մշակութային համագործակցության խորհրդի նիստի եւ ՅՈւՆԵՍԿՕ—ի հիմնադրման 70—ամյակին նվիրված՝ «Մշակութային քաղաքականություն, քաղաքականություն մշակույթի համար. մշակույթի դերը «ԵՏ—2015» զարգացման օրակարգում» խորագրով միջազգային կոնֆերանսի պատվիրակությունների ղեկավարներին։
Հանրապետության նախագահը ողջունել է հյուրերին մեր երկրում եւ կարեւորել նրանց մասնակցությամբ Երեւանում այս օրերին անցկացվող մշակութային խնդիրների շուրջ մասնագիտական խորը քննարկումները՝ ԱՊՀ երկրների մշակութային համագործակցության խորհրդի նիստի եւ ՅՈւՆԵՍԿՕ—ի միջազգային կոնֆերանսի շրջանակներում, շեշտելով, որ ոչինչ ժողովուրդներին այնքան չի միավորում, որքան մշակույթը։ «Մենք մեծ ուշադրություն ենք դարձնում մշակութային քաղաքականությանը, այդ թվում՝ մշակութային դիվանագիտությանը։ Մեր խնդիրն է՝ պահպանել արժեքները, որ դարերի ընթացքում ստեղծել է մեր ժողովուրդը ողջ աշխարհով մեկ, անշուշտ, նաեւ՝ պահպանել ու զարգացնել, հնարավորություն տալ Հայաստանի տարածքում ստեղծել նոր արժեքներ՝ անկախ ազգային պատկանելությունից։ Շատ ուրախալի է, որ ժամանակի ընթացքում մենք ակտիվացնում ենք մեր համագործակցությունը ՅՈՒՆԵՍԿՕ—ի հետ, իհարկե նաեւ կարեւորում ենք մշակույթի ոլորտում ԱՊՀ շրջանակներում մեր փոխգործակցությունը»,— ասել է նախագահ Սերժ Սարգսյանը, միաժամանակ ընդգծելով, որ աշխարհը բարդ եւ դժվարին ժամանակներ է ապրում՝ մի կողմից ստեղծվում են բարձրարժեք մշակութային գործեր, մյուս կողմից, ցավոք, ծայրահեղականները ոչնչացնում են համաշխարհային մշակութային հարստության մաս կազմող այդ անփոխարինելի արժեքները, ուստի նաեւ այդ խնդիրների շուրջ երեւանյան քննարկումները, նախագահի համոզմամբ, չափազանց արդիական ու կարեւոր են։
Սերժ Սարգսյանի խոսքով, «Մշակութային քաղաքականություն, քաղաքականություն մշակույթի համար» միջազգային կոնֆերանսի, ինչպես նաեւ ԱՊՀ երկրների մշակութային համագործակցության խորհրդի նիստի անցկացումը Երեւանում համալրում են վերջին շրջանում մեր երկրում կայացած կարեւորագույն մի շարք միջազգային համաժողովների եւ գիտաժողովների, այդ թվում՝ «Ընդդեմ ցեղասպանության հանցագործության» առաջին գլոբալ ֆորումի, Եվրոպական բարձրագույն կրթական տարածքի նախարարական գագաթնաժողովի, Բոլոնիայի գործընթացի 4—րդ քաղաքական ֆորումի ու մի քանի օր առաջ մեկնարկած՝ Ցեղասպանագետների միջազգային ընկերակցության 12—րդ համաժողովի շարքը։
Նախագահը մաղթել է հանդիպման մասնակիցներին արդյունավետ աշխատանք եւ համոզվածություն հայտնել, որ քննարկումների արդյունքում ընդունվելիք փաստաթուղթը կարտացոլի մշակութային ժառանգությունը պահպանելու եւ սերունդներին փոխանցելու, միջմշակութային երկխոսությունը խթանելու եւ մշակութային բազմազանությունն ապահովելու՝ բոլոր մասնակիցների ընդհանուր ձգտումը։
Հանդիպման ժամանակ ՀՀ մշակույթի նախարար Հասմիկ Պողոսյանը ներկայացրել է աշխարհի մի շարք երկրների մշակույթի ոլորտի քաղաքականության պատասխանատուների, Հայաստանում հավատարմագրված դիվանագիտական առաքելությունների ու միջազգային կազմակերպությունների ղեկավարների, ոլորտի փորձագետների մասնակցությամբ լիագումար նիստի եւ կլոր սեղանների ձեւաչափերով Երեւանում անցկացվող քննարկումների ընթացքը, հավաստիացրել, որ հագեցած գործնական ծրագրի հետ միասին, հյուրերի համար նախատեսված է մշակութային ծրագիր, ինչը թույլ կտա նրանց ավելի լավ ճանաչել Հայաստանն ու հայ ժողովրդին, նրա դարավոր պատմությունն ու հարուստ մշակույթը։
Հանդիպման մասնակիցները շնորհակալություն են հայտնել ՀՀ նախագահին՝ ջերմ հյուրընկալության եւ Հայաստանում նման կարեւոր միջոցառումներ անցկացնելու հնարավորության եւ աջակցության համար։
Նախագահի նստավայրում մշակույթի ոլորտի ներկայացուցիչները եւ ՀՀ նախագահը դիտել են Վենետիկի ժամանակակից արվեստի բիենալեում լավագույն ազգային տաղավար ճանաչված եւ «Ոսկե առյուծ» մրցանակի արժանացած ՀՀ տաղավարի մասին պատմող ֆիլմը, որից հետո նախագահ Սերժ Սարգսյանը տաղավարի համադրող Ադելինա Կյուբերյան Ֆոն Ֆյուրշթենբերգին (Շվեյցարիա) պարգեւատրել է «Հայրենիքին մատուցած ծառայությունների համար» 2—րդ աստիճանի մեդալով՝ հայ մշակույթը միջազգային հանրությանն ըստ արժանվույն ներկայացնելու, հայ—շվեյցարական բարեկամական կապերի զարգացման եւ ամրապնդման գործում ներդրած մեծ ավանդի համար։