ՄԵԾԱՄՈՐ METSAMOR CITY երկուշաբթի, 18.11.2019, 11:19
Ողջույն Հյուր | RSS
Կայքի մենյու

Բաժնի անվանակարգերը
Հանրապետություն [599]
Կրթություն և գիտություն [38]
Մարզային [14]
Պաշտոնական [462]
Մշակույթ [15]
Հասարակություն [800]
Սպորտ [1]
Տեսակետ [49]
Տարածաշրջան [79]
Զանազան [185]
Քաղաքականություն [627]
Համայնք [38]

Մինի - չաթ
 
200

Վիճակագրություն

Ընդամենը առցանց: 1
Հյուրեր: 1
Հաճախորդներ 0

Գլխավոր էջ » 2015 » Հուլիս » 30 » Ուժերը միավորելու, համախմբելու հարթակ /Կոռուպցիայի դեմ պայքարի խորհրդի անդրանիկ նիստը/
15:42
Ուժերը միավորելու, համախմբելու հարթակ /Կոռուպցիայի դեմ պայքարի խորհրդի անդրանիկ նիստը/

Վարչապետ Հովիկ Աբրահամյանի նախագահությամբ կառավարությունում երեկ տեղի է ունեցել կոռուպցիայի դեմ պայքարի խորհրդի առաջին նիստը, հայտնում են ՀՀ կառավարության տեղեկատվության եւ հասարակայնության հետ կապերի վարչությունից։ Բացելով նիստը՝ վարչապետը նշել է. «Կոռուպցիայի դեմ պայքարը ՀՀ կառավարության կողմից իրականացվող ներքին քաղաքականության կարեւորագույն ուղղություններից է։ Իսկ կոռուպցիայի դեմ պայքարի հիմնական երաշխիքներից մեկը հակակոռուպցիոն քաղաքականության արդյունավետ իրականացումն ապահովող ինստիտուցիոնալ համակարգն է։ Այդ նպատակով ՀՀ կառավարության 2015 թվականի փետրվարի 19–ի N 165–Ն որոշմամբ ստեղծվել է Կոռուպցիայի դեմ պայքարի խորհուրդը։ Խորհուրդն իրականացնում է հակակոռուպցիոն բարեփոխումների համակարգումն ու դրանց կատարման նկատմամբ հսկողությունը Հայաստանում։ Ցանկանում եմ եւս մեկ անգամ կարեւորել կոռուպցիայի դեմ պայքարի գործընթացում բոլոր շահագրգիռ կողմերի մասնակցությունը եւ համագործակցությունը։
Մեր նպատակն է այս ձեւաչափի շուրջ համախմբել այն ուժերին, կազմակերպություններին, ովքեր իսկապես ասելիք ու պատկերացում ունեն մեր ընդհանուր նպատակներին հասնելու ճանապարհին։ Սա հարթակ է, որտեղ կարելի է միավորել, համախմբել ուժերը, փորձառությունը եւ գնալ վճռական քայլերի։ Հավաստիացնում եմ՝ կառավարությունը գիտակցում է կատարվելիք քայլերի անհրաժեշտությունն ու կարեւորությունը եւ հետեւողականորեն առաջ է մղելու հակակոռուպցիոն բարեփոխումներին ուղղված գործընթացը։
Մենք ունենք կամք եւ վճռականություն ու պատրաստ ենք ամենօրյա աշխատանքով քայլ առ քայլ առաջ գնալուն։ Մեր աշխատանքները լինելու են թափանցիկ, եւ մենք ամեն ինչ կանենք, որպեսզի դրանց արդյունքները հանրության համար լինեն տեսանելի։ Թեպետ մեր գործընկերների մի մասը հրաժարվեց մասնակցել խորհրդի աշխատանքներին, մենք հրավիրել ենք իրենց ներկա գտնվելու այսօրվա նիստին։ Հուսով եմ, որ թե՛ Ազգային ժողովի ընդդիմադիր խմբակցությունները, եւ թե՛ հասարակական կազմակերպությունները, որոնք հրաժարվեցին որպես խորհրդի անդամներ ներգրավվել խորհրդի աշխատանքներում, այնուամենայնիվ, կհամագործակցեն խորհրդի հետ ու իրենց գիտելիքները եւ մասնագիտական փորձը կներդնեն կոռուպցիայի դեմ համատեղ պայքարում։ Միայն այս ճանապարհով է հնարավոր ձեւավորել միասնական տեսակետներ, մոտեցումներ եւ առաջ շարժվել։
Ուզում եմ նշել, որ այսօրվա նիստի ընթացքում քննարկվելու են մի շարք կարեւոր հարցեր։ Մասնավորապես, ներկայացվելու է ՀՀ հակակոռուպցիոն նոր ռազմավարությունը, քննարկվելու է իրավաբանական անձանց քրեական կամ վարչական պատասխանատվության ենթարկելու հարցը, որը հսկայական կարեւորություն ունի տնտեսության զարգացման եւ կոռուպցիոն մեխանիզմներում բիզնեսի ներգրավվածության կանխարգելման տեսանկյունից։ Սույն հարցի քննարկումը կարեւորվում է նաեւ միջազգային համագործակցության առումով։
Հաջորդիվ ներկայացվելու են խորհրդի եւ խորհրդին կից գործող փորձագիտական հանձնախմբի աշխատակարգերի նախագծերը, փորձագետների ընտրության կարգի նախագիծը, ինչպես նաեւ վերջիններիս ներկայացվող չափանիշները։ Ներկայացվելու է ԱՄՆ ՄԶԳ (USAID) հետ համագործակցության համաձայնագրի նախագիծը՝ կից փաստաթղթերով։
Այնուհետեւ քննարկվելու են հայտարարագիր չներկայացնելու համար պատասխանատվության միջոցների սահմանումը, տեղեկատվության ազատության ոլորտում առկա իրավիճակը եւ խնդիրները, հասարակության ներգրավվածությունը քաղաքականության մշակման եւ կոռուպցիայի դեմ պայքարին եւ, այդ առումով, նախարարներին կից հանրային խորհուրդների գործունեությունը։ Եվ վերջում ներկայացվելու է Հայաստանի Հանրապետության կողմից միջազգային առաջադեմ Արդյունահանող ճյուղերի թափանցիկության նախաձեռնությանն անդամակցելու պատրաստակամությունը։ Մաղթում եմ բոլորիս արդյունավետ աշխատանք»։
Այնուհետեւ խորհուրդը ձեռնամուխ է եղել օրակարգային հարցերի քննարկմանը։ Օրակարգի առաջին հարցով ՀՀ արդարադատության նախարարի առաջին տեղակալ Արսեն Մկրտչյանը ներկայացրել է ՀՀ հակակոռուպցիոն ռազմավարությունը եւ դրա իրականացման 2015–2018 թթ. միջոցառումների ծրագիրը։ Նշվել է, որ Հակակոռուպցիոն ռազմավարության գլխավոր նպատակը բարեխիղճ եւ պատասխանատու պաշտոնյաների միջոցով Հայաստանում կոռուպցիայի մակարդակի եւ տարածվածության նվազեցմանը նպաստելն է, պետական կառավարման մարմինների նկատմամբ քաղաքացիների վստահության ամրապնդումն ու կոռուպցիայի նկատմամբ անհանդուրժողականության սկզբունքի խթանումը։ Արսեն Մկրտչյանը նշել է, որ ռազմավարությունը բաղկացած է չորս գլխից. առաջին գլխում անդրադարձ է կատարվում ՀՀ կողմից իրականացվող հակակոռուպցիոն քաղաքականությանը, երկրորդ գլխում սահմանվում են կոռուպցիայի դեմ պայքարի հիմնական միջոցները, երրորդում՝ հակակոռուպցիոն ծրագրերի առաջնահերթ իրականացման ոլորտները, իսկ չորրորդում՝ ՀՀ հակակոռուպցիոն ռազմավարության իրականացման 2015–2018 թթ. միջոցառումների ծրագրի մոնիթորինգի եւ գնահատման ցուցանիշների համակարգը։ Մտքերի փոխանակության ընթացքում ընդգծվել է, որ ռազմավարության մշակման աշխատանքների շրջանակում բոլոր մարզերում տեղի են ունեցել շահագրգիռ քննարկումներ քաղաքացիական հասարակության ներկայացուցիչների հետ, եւ ռազմավարության ամփոփաթերթում ներկայացվել են բարձրացված եւ էլեկտրոնային եղանակով ստացված առաջարկությունները, ինչպես նաեւ դրանց ընդունվելու կամ չընդունվելու վերաբերյալ առաջարկությունները։ Ամփոփելով կարծիքները՝ վարչապետն առաջարկել է հաստատել ներկայացված փաստաթուղթը եւ ներկայացնել կառավարություն որպես իրավական ակտ ընդունելու համար։ «Այս ռազմավարությունը մշակվել է խորհրդի անդամների եւ շահագրգիռ մյուս մարմինների առաջարկությունների հիման վրա, արդարադատության նախարարության կողմից դրված է եղել նաեւ հանրային քննարկման»,–նշել է Հովիկ Աբրահամյանը եւ հանձնարարել կառավարության աշխատակազմին՝ ռազմավարության վերջնական տարբերակը ստանալուց հետո նախապատրաստել կառավարության նիստի օրակարգում ընդգրկելու համար։ Հայաստանում Եվրոպական միության պատվիրակության ներկայացուցիչը ողջունել է կոռուպցիայի դեմ պայքարի խորհրդի գործունեության մեկնարկը եւ գոհունակություն հայտնել խորհրդի աշխատանքներին ԵՄ ներգրավվածության կապակցությամբ։
Երկրորդ հարցով քննարկվել է իրավաբանական անձանց քրեական կամ վարչական պատասխանատվության ենթարկելու հարցը։ Արդարադատության նախարարի առաջին տեղակալը, մանրամասներ ներկայացնելով հարցի վերաբերյալ, նշել է, որ կոռուպցիայի դեմ պայքարի գործիքներից մեկը կոռուպցիոն հանցագործությունների արդյունավետ քննությունն ու բացահայտումն է, եւ տնտեսության համար առավել վտանգավոր են իրավաբանական անձանց կողմից կատարվող կոռուպցիոն իրավախախտումները։ Երկրների մեծամասնությունն իրավաբանական անձանց կոռուպցիոն վարքագիծը կանխելու նպատակով նախատեսել են իրավաբանական անձանց կոռուպցիոն իրավախախտումների համար վարչական կամ քրեական պատասխանատվության մեխանիզմներ, իսկ ՀՀ–ում նման ինստիտուտներ չեն գործում։ Գործող օրենսդրության համաձայն՝ իրավաբանական անձի կոռուպցիոն վարքագծի համար պատասխանատվության է ենթարկվում այդ գործունեության համար պատասխանատու ֆիզիկական անձը, ինչը, ըստ զեկուցողի, ՀՀ օրենսդրության բացերից է եւ կոռուպցիայի կանխարգելմանը խոչընդոտող հանգամանք։ Արսեն Մկրտչյանը տեղեկացրել է, որ ՀՀ կառավարության հավանությանն արժանացած հանրային կառավարման համակարգում կոռուպցիայի դեմ պայքարի հայեցակարգի եւ ՀՀ նոր քրեական օրենսգրքի նախագծի հայեցակարգի մի շարք դրույթներով նախատեսվում է սահմանել կոռուպցիոն հանցագործությունների համար իրավաբանական անձանց վարչական կամ քրեական պատասխանատվության ենթարկելու շրջանակը, եւ հավելել, որ իրավաբանական անձանց կոռուպցիոն իրավախախտումների համար վարչական կամ քրեական պատասխանատվության նախատեսումը կոռուպցիայի դեմ պայքարի հրատապ քայլերից է։ Ամփոփելով հարցի շուրջ հնչեցված դիտարկումները՝ կառավարության ղեկավարը արդիական եւ կարեւոր է համարել ներկայացված հարցը. «Համաձայն եմ, որ երբեմն կազմակերպությունները որոշակի առավելություն ստանալու համար կոռուպցիոն գործարքների մեջ են մտնում, որը խաթարում է առողջ եւ հավասար մրցակցությունը։ Հանձնարարում եմ արդարադատության նախարարությանը՝ մշակվող ՀՀ նոր քրեական եւ վարչական իրավախախտումների վերաբերյալ օրենսգրքում արտացոլել այս մոտեցումները եւ կառավարության կողմից սահմանված ժամկետում շրջանառության մեջ դնել համապատասխան լուծումներով»։
Հաջորդիվ ՀՀ կառավարության աշխատակազմի ղեկավար–նախարար Դավիթ Հարությունյանը ներկայացրել է ՀՀ կոռուպցիայի դեմ պայքարի խորհրդի աշխատակարգը, որով կանոնակարգվում են խորհրդի գործունեության հետ կապված հարաբերությունները՝ աշխատանքների կազմակերպում, նիստերի հրավիրում, արձանագրությունների կազմում, որոշումների ընդունում եւ այլն։ Ներկայացվել է նաեւ ՀՀ կոռուպցիայի դեմ պայքարի խորհրդին կից գործող փորձագիտական հանձնախմբի աշխատակարգը։ Փորձագիտական հանձնախումբը խորհրդին կից գործող փորձագետների խումբ է, որի հիմնական խնդիրը ռազմավարության եւ հակակոռուպցիոն ոլորտային ծրագրերի մշակմանն աջակցելն է, ծրագրերի մոնիթորինգ եւ գնահատում իրականացնելը եւ ծրագրերի իրականացման վերաբերյալ խորհրդին ամփոփ հաշվետվություններ ներկայացնելը։ Խորհուրդը հաստատել է ներկայացված նախագծերը եւ հանձնարարել ՀՀ կառավարության աշխատակազմի ղեկավար–նախարարին՝ որոշումների վերջնական տարբերակը ներկայացնել ստորագրման։
Խորհուրդը քննարկել եւ հաստատել է նաեւ ՀՀ կառավարության համապատասխան որոշումից բխող ՀՀ կոռուպցիայի դեմ պայքարի խորհրդին կից գործող փորձագիտական հանձնախմբի փորձագետների ընտրության կարգը եւ սահմանել նրանց ներկայացվող չափանիշները, որոնցով պետք է կանոնակարգվեն փորձագիտական հանձնախմբի եւ երկու միջազգային փորձագետի մրցութային հիմունքներով ընտրության հետ կապված հարաբերությունները։ «Ես կարծում եմ, որ այս հարցի ընդունումը շատ կարեւոր է հակակոռուպցիոն ամբողջ համակարգի աշխատանքի արդյունավետության տեսանկյունից։ Փորձագետների ընտրության ճիշտ չափանիշները սահմանելու եւ համապատասխան գիտելիքներով օժտված փորձագետներ ընտրելու դեպքում մենք կունենանք օբյեկտիվ պատկեր հակակոռուպցիոն ռազմավարության իրականացման ընթացքի վերաբերյալ եւ թերությունների դեպքում օպերատիվ կփորձենք դա կարգավորել»,–հարցի առնչությամբ ասել է վարչապետ Հովիկ Աբրահամյանը եւ հանձնարարել ՀՀ կառավարության աշխատակազմի ղեկավար–նախարար Դավիթ Հարությունյանին՝ որոշման վերջնական տարբերակը ներկայացնել ստորագրման։
Հաջորդ հարցով ՀՀ կառավարության աշխատակազմի ղեկավար–նախարար Դավիթ Հարությունյանը մանրամասներ է ներկայացրել ՀՀ կառավարության եւ ԱՄՆ Միջազգային զարգացման գործակալության (USAID) միջեւ ստորագրվելիք համագործակցության համաձայնագրի եւ դրան կից փաստաթղթերի նախագծերի վերաբերյալ։ Նա նշել է, որ ԱՄՆ ՄԶԳ–ն պատրաստակամություն է հայտնել աջակցել ՀՀ կառավարությանը՝ կյանքի կոչելու ՀՀ հակակոռուպցիոն ռազմավարությունն եւ դրանից բխող միջոցառումները։ Ծրագրի ընդհանուր արժեքը 750 հազար ԱՄՆ դոլար է, ՀՀ կառավարությունը մասնակցելու է ծրագրի համաֆինանսավորմանը մինչեւ 25 տոկոսի չափով, այդ թվում՝ բնաիրային տեսքով։ Օժանդակությունն ուղղված է լինելու փորձագիտական հանձնախմբի ստեղծմանը, 2015–2018 թթ. հակակոռուպցիոն ռազմավարության գործարկմանը եւ շահագրգիռ կողմերի համար հասարակայնության հետ կապերի ռազմավարության եւ իրականացման ծրագրի մշակմանն ու իրականացմանը։ Դավիթ Հարությունյանի խոսքով՝ ծրագիրը հնարավորություն կտա ներգրավել բարձրակարգ միջազգային եւ տեղական փորձագետների՝ հակակոռուպցիոն ռազմավարության գործարկման համար գերակա ճանաչված կրթության, պետական եկամուտների, առողջապահության եւ ոստիկանության կողմից քաղաքացիներին տրամադրվող ծառայությունների ոլորտներում կարիքների եւ ռիսկերի գնահատման, խնդիրների վերլուծության, կոռուպցիոն ռիսկերի չեզոքացման, մասնագիտական եւ մեթոդական խորհրդատվության տրամադրման, ինչպես նաեւ հասարակության տարբեր թիրախային խմբերի իրազեկվածության աստիճանի բարձրացման նպատակով։ Խորհուրդը հավանության է արժանացրել ներկայացված համաձայնագրի կնքման առաջարկությունը։ «Սա ԱՄՆ միջազգային զարգացման գործակալության հետ մեր արդյունավետ աշխատանքի եւս մեկ վառ օրինակ է, եւ մենք շնորհակալ ենք այս կարեւոր գործընթացին աջակցելու պատրաստակամության համար»,–հավելել է ՀՀ վարչապետը եւ հանձնարարել համաձայնագրի վերջնական տարբերակը նախապատրաստել կառավարության հաջորդ նիստի օրակարգում ընդգրկելու համար։
Այնուհետեւ խորհուրդը քննարկել է հայտարարագիր չներկայացնելու համար պատասխանատվության միջոցների սահմանման հարցը։ ՀՀ բարձրաստիճան անձանց էթիկայի հանձնաժողովի նախագահ Սիրանուշ Սահակյանը նշել է, որ կոռուպցիայի դեմ պայքարի ոլորտում ՀՀ ստանձնած պարտավորությունների կատարման համատեքստում կարեւոր եւ պարտադիր միջոցառում է հայտարարագրման գործընթացը կանոնակարգող նորմերի պահանջները չկատարելու համար իրավական ներգործության միջոցների սահմանման կիրառման գործուն ընթացակարգերի մշակումը։ Նա նշել է, որ 2015 թ. մարտին ՀՀ արդարադատության նախարարության կողմից շրջանառության մեջ է դրվել վարչական իրավախախտումների վերաբերյալ օրենսգրքում փոփոխություններ կատարելու օրինագիծը, որի շրջանակում նախատեսվում է հայտարարագրման կանոնակարգումները խախտելու համար պատասխանատվության միջոցների կիրառում։ Մասնավորապես, որպես ընդունելի պատասխանատվության տեսակ ընտրվել է վարչական պատասխանատվությունը, որպես տույժի տեսակներ՝ նախազգուշացումը եւ տուգանքը։ Սիրանուշ Սահակյանն ընդգծել է, որ ՀՀ բարձրաստիճան անձանց էթիկայի հանձնաժողովը լիովին սատարում է նման քայլերի ձեռնարկումը եւ միաժամանակ մի շարք նկատառումներ է ներկայացրել, որոնք, ըստ նրա, կնպաստեն բարձրաստիճան պաշտոնատար անձանց հայտարարագրման համակարգի ամբողջականության ապահովմանը եւ գործիքակազմի կատարելագործմանը։ Ծավալվել է մտքերի փոխանակություն, հնչել են մի շարք կարծիքներ եւ առաջարկություններ։ Ամփոփելով քննարկումը՝ վարչապետը նշել է. «Հանրային ծառայության մասին» ՀՀ օրենքի ընդունումից ի վեր բազմաթիվ քննադատություններ են եղել հայտարարագրման ինստիտուտի անկատարության վերաբերյալ։ Ես համաձայն եմ, որ հայտարարագրման ինստիտուտը համեմատաբար նոր է եւ գուցե օրենսդրությամբ ամբողջապես կարգավորված չէ։ Սակայն այս ոլորտում ահռելի աշխատանք է կատարվել, դա բոլորս պետք է արձանագրենք։ Հենց այդ աշխատանքի շնորհիվ է, որ զանգվածային լրատվության միջոցները կարողանում են հետեւել հայտարարագրման ընթացքին, բացթողումներ նկատել եւ քննադատել։ Ես գտնում եմ, որ հայտարարագրման գործընթացում թերացող պաշտոնյաները պետք է ենթարկվեն պատասխանատվության։ Առաջին քայլն իրականացնելու համար հանձնարարում եմ արդարադատության նախարարությանը երկամսյա ժամկետում կառավարության քննարկմանը ներկայացնել վարչական իրավախախտումների վերաբերյալ ՀՀ օրենսգրքում փոփոխություններ կատարելու նախագիծ, որով էթիկայի հանձնաժողովին հնարավորություն կտրվի հայտարարագրման գործընթացի կանոնները խախտելու համար պաշտոնատար անձանց ենթարկել պատասխանատվության»։
Կոռուպցիայի դեմ պայքարի խորհրդի առաջին նիստին մասնակցող հասարակական կազմակերպությունների ներկայացուցիչները ողջունել են խորհրդի աշխատանքների մեկնարկը եւ կարեւորել իշխանության մարմինների ու քաղաքացիական հասարակության միջեւ երկխոսության նման ձեւաչափի առկայությունը։ «Ինֆորմացիայի ազատության կենտրոն» ՀԿ նախագահ Շուշան Դոյդոյանը նշել է, որ Կոռուպցիայի դեմ պայքարի խորհրդի աշխատանքի կարեւոր նախապայմանը քաղաքացիական հասարակության վստահության ձեւավորումն է՝ խորհրդի աշխատանքի շոշափելի արդյունքները։ Շուշան Դոյդոյանը նշել է, որ վերջին տարիներին տեղեկատվության ազատության ոլորտում լուրջ առաջընթաց է արձանագրվել, եւ որպես արդյունքներ նշել է պետական կառավարման բոլոր մարմիններում տեղեկատվության ազատության պատասխանատու անձանց առկայությունը, կառավարության կողմից տեղեկատվության տրամադրման կարգի մշակումը եւ այլն։ Իր ելույթում նա անդրադարձել է նաեւ տեղեկատվության ազատության ոլորտում առկա իրավիճակին եւ խնդիրներին՝ նշելով, որ տեղեկատվության մատչելիությունը կոռուպցիայի դեմ պայքարի արդյունավետության ապահովման հիմնական գործիքն է, որովհետեւ այն ապահովում է կառավարության գործունեության հրապարակայնությունն ու թափանցիկությունը, մարդկանց հիմնական իրավունքների իրացումը եւ իշխանության, կառավարության գործունեության հանդեպ վստահության ձեւավորումը։ «Անընդունելի եմ համարում, որ 10 տարուց ավելի «Տեղեկատվության ազատության մասին» ՀՀ օրենքը գործում է, սակայն այդ բնագավառը կարգավորող ենթաօրենսդրական ակտերը չեն ընդունվել»,–նշել է վարչապետը եւ հանձնարարել ՀՀ արդարադատության նախարարությանը՝ երկամսյա ժամկետում ՀՀ կառավարության աշխատակազմ ներկայացնել ոլորտը կարգավորող ենթաօրենսդրական ակտերի նախագծերը։ Հաջորդիվ ելույթով հանդես է եկել Երեւանի մամուլի ակումբի փորձագետ, Արեւելյան գործընկերության քաղաքացիական հասարակության ֆորումի Հայաստանի ազգային պլատֆորմի քարտուղարության գործադիր տնօրեն Հերիքնազ Հարությունյանը, ով եւս ողջունել է Կոռուպցիայի դեմ պայքարի խորհրդի առաջին նիստի անցկացումը եւ քաղաքացիական հասարակության ներկայացուցիչների մասնակցությունը նիստին։ Իր խոսքում Հերիքնազ Հարությունյանն անդրադարձել է ՀՀ նախարարներին կից հանրային խորհուրդների ստեղծման հարցին եւ ներկայացրել իշխանության հետ համագործակցության տարբեր ձեւաչափերում քաղաքացիական հասարակության ներգրավվածության վերաբերյալ անցկացված հետազոտություն–հարցման արդյունքները, որն իրականացվել է ԵՄ ֆինանսավորմամբ «Քաղաքացիական հասարակություն. երկխոսություն հանուն առաջընթացի» ծրագրի շրջանակում։ Խոսելով հանրային խորհուրդների գործունեության մասին՝ նա կարեւորել է դրանց նկատմամբ հասարակական վստահության ձեւավորումը եւ երկխոսության արդյունավետ մեխանիզմների ստեղծումը։ Ամփոփելով մտքերի շահագրգիռ քննարկման արդյունքները եւ հնչած կարծիքները՝ վարչապետը կարեւորել է պետական մարմինների կողմից քաղաքականության մշակման գործում քաղաքացիական հասարակության մասնակցությունը։ Կառավարության ղեկավարն ընդգծել է, որ հանրային խորհուրդների ակտիվ եւ արդյունավետ գործունեությունը կարեւոր է տեղեկատվության, գաղափարների փոխանակման, հասարակության պահանջների բարձրացման, երկխոսության ձեւավորման համար. «Մենք կարեւորում ենք քաղաքացիական հասարակության կարծիքը քաղաքականության եւ օրենսդրության մշակման հարցերում եւ պետք է համապատասխան գործիքներ եւ հարթակներ ստեղծենք, որպեսզի այդ համագործակցությունն արդյունավետ լինի։ Հանձնարարում եմ ՀՀ արդարադատության նախարարությանը քննարկել հնչեցված զեկույցի առաջարկությունները եւ ՀՀ կառավարության աշխատակազմ ներկայացնել ՀՀ նախարարներին կից հանրային խորհուրդների օրինակելի աշխատակարգը»։
Կոռուպցիայի դեմ պայքարի խորհրդի առաջին նիստի ավարտին ազդարարվել է ՀՀ կառավարության պատրաստակամությունը՝ անդամակցելու Արդյունահանող ճյուղերի թափանցիկության նախաձեռնությանը (EITI)։ ՀՀ կառավարության աշխատակազմի ղեկավար–նախարար Դավիթ Հարությունյանը նշել է, որ միջազգային այս կազմակերպությունը կառավարությունների, արդյունահանող ընկերությունների եւ քաղաքացիական հասարակության կոալիցիա է, որը հնարավորություն է տալիս բարձրացնել արդյունահանող ոլորտում բիզնես գործունեության թափանցիկությունը եւ ապահովել մրցակցային նպաստավոր պայմաններ։ Հարցի առնչությամբ վարչապետ Աբրահամյանը նշել է. «Ես շատ կարեւորում եմ այս կազմակերպությանն անդամակցելու նախաձեռնությունը եւ անձամբ հետեւելու եմ անդամակցության գործընթացը բարեհաջող ավարտին հասցնելուն։ Հայաստանի Հանրապետությունը միշտ կարեւորել է բիզնեսի համար թափանցիկ, կանխատեսելի եւ մրցակցային խաղի ապահովումը։ Նախաձեռնությանն անդամակցելու մեր մտադրությունը եւս մեկ անգամ ցույց է տալիս, թե որքան ենք կարեւորում միջազգային ստանդարտների ներդրումը Հայաստանում, ինչպես նաեւ Հայաստանի ակտիվ մասնակցությունն աշխարհում ընթացող պրոցեսներին, որոնք շատ արագ են փոխվում։ Ցանկանում եմ կառավարության անունից հանձնարարական տալ Դավիթ Հարությունյանին, որպեսզի համակարգի այդ գործընթացները եւ համապատասխան ստանդարտի ներդրման աշխատանքները»։
Ամփոփելով Կոռուպցիայի դեմ պայքարի խորհրդի առաջին նիստի աշխատանքները եւ քննարկումների արդյունքները՝ Հովիկ Աբրահամյանը նշել է. «Խորհրդի նիստում խոսեցինք պետության եւ հասարակության գործունեության տարբեր ոլորտներում կոռուպցիայի բացասական դերի մասին։ Նշվեց, որ նաեւ հսկայական է կոռուպցիայի բացասական ազդեցությունը երկրի տնտեսության զարգացման, տնտեսական ներդրումների իրականացման վրա։ Նման գործընթացները շատ բացասական ազդեցություն են ունենում։
Մեզ համար երկրի տնտեսական կայուն զարգացումն ապահովելն օրակարգային խնդիր է։ Այս տեսանկյունից կարեւորում եմ կոռուպցիայի դեմ պայքարում գործարար աշխարհի հետ ակտիվ համագործակցության իրականացումը։ Նման համագործակցությունն ապահովելու նպատակով կարծում եմ նպատակահարմար է կոռուպցիայի դեմ պայքարի խորհրդի գործունեության շրջանակում ստեղծել համապատասխան հարթակ, եւ հանձնարարում եմ ՀՀ կառավարության աշխատակազմին՝ տարվա ընթացքում հանդիպումներ կազմակերպել գործարար աշխարհի՝ խոշոր, միջին եւ փոքր բիզնեսի ներկայացուցիչների հետ, որպեսզի վերջիններս հնարավորություն ունենան բարձրացնելու կոռուպցիոն երեւույթների հետ կապված իրենց հուզող հարցերը, ներկայացնեն իրենց տեսակետները, իսկ մենք քննարկումների արդյունքում փորձենք արդյունավետ լուծումներ գտնել։
Կարծում եմ, որ համագործակցության նման հարթակն արդյունավետ կլինի բիզնեսի զարգացմանը խոչընդոտող կոռուպցիոն ռիսկերի նվազեցման եւ տնտեսության զարգացման համար։ Մեր այսօրվա նիստը համարում եմ արդյունավետ, որովհետեւ մեր քննարկումը շատ անկեղծ էր, եւ համոզված եմ, որ ապագայում լինելու է ավելի թափանցիկ ու անկեղծ»։ Կառավարության ղեկավարը շնորհակալություն է հայտնել խորհրդի բոլոր անդամներին, հասարակական կազմակերպություններին՝ արդյունավետ աշխատանքի համար, եւ նշել, որ որպես վարչապետ անելու է ամեն ինչ՝ երկխոսության մթնոլորտ ձեւավորելու եւ երկիրն առաջ տանելու նպատակով։
Կատեգորիա: Հանրապետություն | Դիտումներ: 124 | Ավելացրեց: Martos | - Վարկանիշ -: 0.0/0
Մեկնաբանություններն ընդամենը՝: 0
ComForm">
avatar
Մուտքի ձև

Որոնել

Օրացույց
«  Հուլիս 2015  »
ԵրկԵրկՉրկՀնգՈւրՇբԿր
  12345
6789101112
13141516171819
20212223242526
2728293031

Սոց ցանցեր

Ժամանակահատված

Copyright Metsamorcity.do.am © 2019