1939 թվականին, Հիտլերյան Գերմանիան հրահրեց համաշխարհային տիրապետության հաստատման համար խելացնոր պատերազմ, 1941 թվականին հարձակվեց ԽՍՀՄ-ի վրա` նպատակ ունենալով ստրկացնել և իր գերիշխանությունը հաստատել նրա ժողովուրդների վրա:
Հայ ժողովուրդը, որը դեռ նոր էր թոթափել Առաջին համաշխարհային պատերազմի ահասարսուռ հետևանքները և կրում էր Ստալինյան միահեծան վարչակարգի ռեպրեսիան, ամնասն չմնաց Երկրորդ Համաշխարհային պատերազմի արյունահեղ պայքարից: Հայաստանը կազմավորեց և պատերազմ ուղարկեց իր ազգային դիվիզիաները, ուր Հիտլերյան ներխուժման դեմ մարտնչեցին հարյուր հազարավոր հայորդիներ: Տալով անվանի շատ զորահրամանատարներ և հերոսներ, հայ զինվորները պսակվեցին անմոռանալի փառքով:
Բաղձալի հաղթանակը կերտվեց թանկ գնով, Հայաստանի հարյուր-հազարավոր զավակներ զոհվեցին հանուն խաղաղության և հայրենիքի վաղվա օրվա կերտման համար: Պատերազմի ավարտը նախանշեց երկրի տնտեսության և խաղաղ ստեղծագործ շինանարարության նոր փուլ, Հայրենական պատերազմի մասնակից վետերաները գալիքի հանդեպ նոր հավատով կերտեցին մեր նորագույն պատմության լուսավոր էջերը:
Մայիսյան հաղթանակի այս օրը մենք համակվում ենք համախմբվածության և ազգային ոգու արժանապատվության զգացումով, որի շնորհիվ ձեռք բերվեցին մեր հաջողություններն ու հաղթանակները:
ՙՈչ ոք չի մոռացվել, ոչինչ չի մոռացվել՚. այս կոչը ուղեկցում է մեզ միշտ, և գլուխ ենք խոնարհում պատերազմական սերնդի առաջ, որոնց զրկանքների և զոհողությունների գնով կերտվեց հայրենիքի ապագան:
Մեր համայնքում են ապրում Հայրենական պատերազմի պանծալի վետերաներ` Ավագ Գրիգորյանը, Սուրեն Աղաջանյանը և Պավել Բարսեղյանը , որոնց հայրենասիրական գործը պարտավորվորեցնում է մեզ հիշել նրանց լուման` խաղաղ ու հուսալի մեր ժամանակների կերտման համար:
Հաղթանակի 70 ամյակի կապակցությամբ քաղաքապետարանի և համայնքի ավագանիների անունից շնորհավորում եմ մեր վետերաներին և ցանկանում նրանց առողջություն, երկար տարիների կյանք և անձնական երջանկություն:
Մայիսը նաև մեր ժամանակների հաղթական խորհուրդն է կրում, մենք ազգովի նշում ենք Շուշիի ազատագրման օրը և փառաբանում արցախյան ճակատամարտում իրենց անուները անմահացրած քաջարի հայորդիներին: Մենք մեր մաղթանգն ու շնորհավորանքն ենք հղում ԵԿՄ անդամներին ու բոլոր վետերաներին, ցանկանալով նրանց երջանկություն, առողջություն և ամենայն բարօրություն աշխատանքում ու կյանքում:
Ռոբերտ Գրիգորյան
Մեծամորի քաղաքապետ
