Վարչապետ Հովիկ Աբրահամյանի գլխավորությամբ տեղի է ունեցել ֆինանսական շուկայի իրավիճակին նվիրված խորհրդակցություն՝ ՀՀ–ում Համաշխարհային բանկի, Արժույթի միջազգային հիմնադրամի ներկայացուցիչների եւ պատասխանատու գերատեսչությունների ղեկավարների մասնակցությամբ, հայտնում են ՀՀ կառավարության տեղեկատվության եւհասարակայնության հետ կապերի վարչությունից։
Խորհրդակցության ընթացքում քննարկվել են Հայաստանի ֆինանսական շուկայում վերջին օրերին ստեղծված իրավիճակը, հնարավոր զարգացումները եւ հետագա քայլերը։ Երկուստեք կարեւորվել է լողացող փոխարժեքի քաղաքականության շարունակումը՝ տնտեսությունը երկարաժամկետ անկայունությունից զերծ պահելու համար։ Միաժամանակ կարեւոր են համարվել ֆինանսական շուկայում իրավիճակի կայունացմանը եւ սպառողական ապրանքների անհիմն թանկացումների բացառմանն ուղղված գործողությունները։
ՀԲ–ի եւ ԱՄՀ–ի ներկայացուցիչները բարձր են գնահատել ՀՀ կառավարության եւ ՀՀ կենտրոնական բանկի կողմից գործադրվող ջանքերը եւ ձեռնարկվող միջոցառումները, կարեւորել ֆինանսական շուկայի կայունացմանն ուղղված հետագա համատեղ աշխատանքը։